បារាំង៖មានស្លាប់ ៣នាក់ និងរបួស ៥នាក់នៅក្នុងព្រឹត្តិការណ៍វាយប្រហាររបស់អង្គការរដ្ឋអ៊ីស្លាម
នៅក្នុងប្រទេសបារាំង មានមនុស្សស្លាប់យ៉ាងតិច ៣នាក់ និងរបួស ៥នាក់ផ្សេងទៀតនៅក្នុងព្រឹត្តិការណ៍វាយប្រហារចំនួន ៣ដងនាថ្ងៃសុក្រ ទី២៣ មីនានៅប៉ែកខាងត្បូងប្រទេស។ ព្រឹត្តិការណ៍វាយប្រហារទាំង ៣ដងនោះបានធ្វើឡើងដោយបុរសខ្មាន់កាំភ្លើងម្នាក់ដែលប្រកាសខ្លួនជាសមាជិករបស់អង្គការរដ្ឋអ៊ីស្លាម។ លោករដ្ឋមន្រ្តីក្រសួងមហាផ្ទៃយេរ៉ា កូឡុំបានប្រកាសថា បុរសខ្មាន់កាំភ្លើងដែលត្រូវបានកម្លាំងប៉ូលិសបាញ់សម្លាប់នៅថ្ងៃរសៀលមានឈ្មោះរ៉េឌាន់ ឡាក់ឌីម (Redouane Lakdim) អាយុ ២៦ឆ្នាំ និងមានដើមកំណើតម៉ារ៉ុក។ ក្នុងថ្ងៃដដែល អង្គការរដ្ឋអ៊ីស្លាមបានប្រកាសសារភាពជាស្នាដៃរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងជំហានដំបូងនាពេលព្រឹកថ្ងៃសុក្រ ទី២៣ មីនា បុរសខ្មាន់កាំភ្លើងបានប្លន់យកឡានមួយរបស់អ្នកដំណើរក្នុងស្រុក Carcassonne ដោយបាញ់អ្នកបើកបរឲ្យរបួស និងបាញ់សម្លាប់អ្នកជិះក្បែរនោះ។ បន្ទាប់មកនៅពេលយកឡានបើកតាមផ្លូវ បុរសខ្មាន់កាំភ្លើងក៏បានបាញ់ប៉ូលិសម្នាក់ឲ្យរបួស ហើយបន្ទាប់មកទៀត រូបគេក៏បានទុកឡានចោល រួចចូលទៅក្នុងហាងលក់ទំនិញមួយឈ្មោះ Supper U ក្នុងស្រុក Trèbes ដែលមានចម្ងាយប្រមាណជា ១០គីឡូម៉ែត្រពីស្រុក Carcasonne។
គឺនៅក្នុងហាងលក់ទំនិញ Supper U នោះហើយដែលបុរសខ្មាន់កាំភ្លើងរូបនោះបានចាប់មនុស្សធ្វើជាថ្នូរដោយបាញ់សម្លាប់ចំនួន ២នាក់។ នៅពេលនោះ បុរសខ្មាន់កាំភ្លើងបានប្រកាសខ្លួនជាសមាជិករបស់អង្គការរដ្ឋអ៊ីស្លាម។ ភ្លាមៗនោះ កម្លាំងប៉ូលិស និង PM ក៏បានចុះអន្តរាគមន៍ដល់ទីកន្លែង និងបានរំដោះអតិថិជននៅក្នុងហាងលក់ទំនិញនោះ។ បន្ទាប់មកទៀត មានវរសេនីយ៍ឯក PM ម្នាក់បានយល់ព្រមប្រគល់ខ្លួនធ្វើជាចំណាប់ខ្មាំងដើម្បីឲ្យបុរសខ្មាន់កាំភ្លើងដោះលែងចំណាប់ខ្មាំងស៊ីវិលម្នាក់។
នៅពេលនោះ រូបវរសេនីយ៍ឯក PM ក៏បានទុកទូរស័ព្ទចោលលើតុ និងដែលទូរស័ព្ទនោះកំពុងត ភ្ជាប់ជាមួយប្រធានក្រុមអន្តរាគមន៍នៅខាងក្រៅដែលបុរសខ្មាន់កាំភ្លើងមិនបានដឹងទេ។ ជាមួយនឹងទូរស័ព្ទនេះ គេបានស្តាប់ឮទាំងអស់នូវសម្លេងពីខាងក្នុង ពិសេសសម្លេងកាំភ្លើងបាញ់ដោយបុរសខ្មាន់កាំភ្លើងលើរូបវរសេនីយ៍ឯក PM ឲ្យរបួស។ គឺនៅពេលនោះឯងដែលកម្លាំង PM បានចូលអន្តរាគមន៍ រួចបាញ់សម្លាប់បុរសខ្មាន់កាំភ្លើងតែម្តង។ ឧប្បត្តិហេតុចាប់មនុស្សធ្វើជាថ្នូរបានបិទបញ្ចប់នៅវេលាម៉ោងជាង ២រសៀលម៉ោងក្នុងប្រទេសបារាំង។
តាមលោករដ្ឋមន្រ្តីក្រសួងមហាផ្ទៃយេរ៉ា កូឡុំ បុរសខ្មាន់កាំភ្លើងមានឈ្មោះ រ៉េឌាន់ ឡាក់ឌីម (Redouane Lakdim) អាយុ ២៦ឆ្នាំ និងមានដើមកំណើតម៉ារ៉ុក។ លោកយេរ៉ា កូឡុំបានឲ្យដឹងទៀតថា ជនឡាក់ឌីមបានរៀបចំសេណារីយ៉ូនេះតែម្នាក់ឯង តែការស៊ើបអង្កេតបានបើកឡើងដើម្បីចង់ដឹងថា តើអាចមានអ្នកឃុបឃិត រួមដៃឬទេ។ ចំណែកអង្គការរដ្ឋអ៊ីស្លាមបានប្រកាសសារភាពថាជាស្នាដៃរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ