តើអ្វីដែលលោកប្រធានាធិបតីរុស្ស៊ីពូទីនប្រាថ្នាសម្រេចឲ្យបានក្នុងអាណត្តិថ្មី
ចុះផ្សាយនៅថ្ងៃ៖
ស្តាប់ - ០៦:២២
ជាតុល្យាការ នៃការបោះឆ្នោតថ្ងៃ ១៨ មីនាកន្លងទៅ ជ្រើសរើសប្រធានាធិបតិរុស្ស៊ី សម្រាប់ អាណត្តិថ្មី បេក្ខភាព លោក វ៉្លាឌីមៀរ ពូទីន បានទទួលសម្លេងគាំទ្រច្រើនជាង ក្នុងការបោះឆ្នោត លើក មុនៗ ទាំងអស់ គឺដល់ ទៅ ៧៦,៦៩% ឬលើសពី ៣ភាគ៤ ឯណោះ នៃសម្លេងប្រជាពលរដ្ឋ ដែលបាន ទៅបោះឆ្នោត។ ឥឡូវ ភារកិច្ចដែលចោទ នៅពីមុខគាត់ គឺត្រូវឆ្លើយឲ្យបានយ៉ាងសក្តិសម តបនឹងជំនឿទុក ចិត្តនេះ ពី សំណាក់បណ្តាជន លើ រូបគាត់។ តាំងពី ២ ថ្ងៃ មុនពេលបោះឆ្នោតម៉្លេះ ដោយយោងទៅលើ លទ្ធផលឥតប្រែប្រួលនៃ ការស្ទង់មតិដែលថា គាត់នឹងឈ្នោះឆ្នោតជាថ្មី លោកប្រមុខរដ្ឋពូទីន បានផ្ទុកផ្តាក់ ខុទ្ទកាល័យគាត់ ដែល មានសហការីប្រមាណ ២.០០០ នាក់ ឲ្យតាក់តែងឡើងជាគោលដៅជាតិមួយចំនួន សម្រាប់ ៦ ឆ្នាំ ទៅមុខ នៃអាណត្តិថ្មីនេះ។
ជាបឋម អំពីនិយមន័យនៃពាក្យថាខុទ្ទកាល័យប្រធានាធិបតីរុស្ស៊ីដែលមានឈ្មោះជាផ្លូវការថា រដ្ឋបាលវិមានក្រេមឡាំង ផ្សំឡើងពីអង្គភាពចំនួនប្រមាណ ២០ ឯណោះ មានឯកទេសកម្ម តាំងពីបញ្ហា ច្បាប់ សង្គម-សេដ្ឋកិច្ច កិច្ចការអន្តរជាតិ រហូតដល់វប្បធម៌ និង កីឡាទៅផង ម៉្លោះហើយបានជាមាន សហការី-ការិនីធ្វើការច្រើនម៉្លឹងៗ ដល់ទៅ ២.០០០ នាក់។
តើអ្វីដែលលោកពូទីនប្រាថ្នាសម្រេចឲ្យបាន
យើងជាប់ក្នុងទំនាយទទួលជោគជ័យ។ អញ្ចឹងមែនទេ? យើងនឹងក្តោបក្តាប់យកមកបំពេញ គឺការងារ ទ្រង់ទ្រាយធំសំបើម ក្នុងនាមប្រទេសរុស្ស៊ី លោកពូទីនបានថ្លែងយ៉ាងនេះ លើទីលាននៅជាប់នឹងកំពែង វិមានក្រេមឡាំង ទៅកាន់មហាជនដែលគាំទ្រគាត់ ក្នុងយប់ថ្ងៃ១៨ ឆ្លងចូល ថ្ងៃ១៩ មីនា។ មកទល់ពេល នោះ រាល់តែការិយាល័យបោះឆ្នោត បានបិទបញ្ចប់ការងារខ្លួនទៅហើយ។ ដូច្នេះ លោកពូទីន បានថ្លែងទៅ កាន់ជនានុជនពេលនោះ គឺក្នុងឋានៈជាអ្នកឈ្នោះឆ្នោតសម្រាប់អាណត្តិថ្មីតែម្តង។
រីឯគោលដៅជាតិចោទដោយលោកពូទីន ជាទូទៅ គឺប៉ះលើវិស័យសេដ្ឋកិច្ច និង សង្គម។ ក្នុងនោះ មាន ការទាមទារឲ្យរុស្ស៊ី បានចូលក្នុងក្រុម ៥ ប្រទេសនាំមុខគេខាងសេដ្ឋកិច្ចនៅក្នុងលោក និងធានាឲ្យកំណើន សេដ្ឋកិច្ចរុស្ស៊ី មានចង្វាក់ខ្ពស់ជាង ចង្វាក់កំណើនសេដ្ឋកិច្ចក្នុងលោក និងការកើនឡើងនៃ ប្រាក់ចំណូល មែនពិត របស់បណ្តាជន និង កើនឡើងថែមទៀត ទំហំប្រាក់សោធននិវត្តន៍។
ក្នុងការផ្ទុកផ្តាក់របស់លោកពូទីន ក៏មានភារកិច្ចប្លែកៗយ៉ាងច្រើន ផ្នែកសង្គមនិងប្រជាសាស្ត្រ ឧទាហរណ៍ ដំឡើងអាយុមធ្យមរបស់ពលរដ្ឋរុស្ស៊ី ពី ៧៣ ឆ្នាំ ក្នុងឆ្នាំទៅមិញ ឲ្យឡើងដល់ ៧៨ ឆ្នាំ ក្នុងឆ្នាំ ២០២៤ ជាឆ្នាំបញ្ចប់អាណត្តិថ្មីរបស់គាត់ ហើយទៅទល់ឆ្នាំ ២០៣០ ឲ្យឡើងដល់ ៨០ ឆ្នាំ ដូចនៅក្នុង ក្លឹបនៃបណ្តា បស្ចិមប្រទេស ដែលពលរដ្ឋគេ អាយុមធ្យម គឺក្នុងកម្រិតនេះ។ នៅមានភារកិច្ចមួយចំនួនទៀត ដែលប៉ះលើនយោបាយលំនៅ។ លោកពូទីន សន្យាថា ក្នុងអាណត្តិថ្មីរបស់ គាត់ មួយឆ្នាំៗ នឹងមានពលរដ្ឋរុស្ស៊ី មិនតិចជាង ៥ លាននាក់ឡើយ ឡើងទៅនៅក្នុង លំនៅដ្ឋានថ្មី។ ទៅទល់ថ្ងៃ ១៥ មេសា នាយកខុទ្ទកាល័យលោក ពូទីន ត្រូវបង្ហាញជូនគាត់ នូវ កម្មវិធីកែប្រែមុខមាត់ ហេដ្ឋារចនាសម្ព័ន្ធប្រទេស បែបយ៉ាង បណ្តាញផ្លូវថ្នល់ អាកាសយានដ្ឋាន កំពង់ផែ ទីក្រុង។
ការផ្ទុកផ្តាក់ មួយទៀត គឺតាក់តែងវិធានការដែលឆ្ពោះទៅ កែឲ្យកាន់តែល្អឡើង បរិយាកាស Business ក្នុងប្រទេស ដើម្បីទៅទល់ចុងអាណត្តិគាត់ នៅឆ្នាំ ២០២៤ Business តូចតាចក្នុងប្រទេស រួមវិភាគទាន បានដល់ទៅ ៤០% ទៅក្នុង ផលិតផលសរុបក្នុងប្រទេស ហៅថា GDP ហើយចំនួនអ្នកដែលជាប់ដៃរវល់ក្នុង Business ខ្នាតតូច កើនឡើង ពី ១៩ លាននាក់សព្វថ្ងៃនេះ លុះដល់ ២៥ លាននាក់។ ក្នុងពាក្យសន្យារបស់លោកពូទីន ក៏មានទាំង ការបង្កើនទំហំហិរញ្ញប្បទាន ទៅក្នុងវិស័យ សុខាភិបាល សិក្សាធិការ ព្រមទាំងពន្លឿនកំណើននៃផលិតភាពការងារ ក្នុងប្រទេស។
តើការផ្ទុកផ្តាក់ទាំងនេះអាចបំពេញរួចឬទេ?
តាមការប្រមាណនៃពួកអ្នកជំនាញ ក្នុងលក្ខណៈនៃចង្វាក់កំណើនសេដ្ឋកិច្ចនៅទាបនៅឡើយ អមទៅដោយ ទណ្ឌកម្មបស្ចិមលោក និង នយោបាយត្បិតត្បៀតថវិកាយ៉ាងតឹងរ៉ឹង គឺមុខជា ពិបាកបំពេញតាមពាក្យសន្យា របស់លោកពូទីន។ ប៉ុន្តែ ព្យាករណ៍ជាផ្លូវការនៃ ក្រសួងអភិវឌ្ឍន៍សេដ្ឋកិច្ចរុស្ស៊ី សឲ្យឃើញថា ការផ្ទុកផ្តាក់របស់ប្រធានាធិបតី ឲ្យពន្លឿនចង្វាក់កំណើនសេដ្ឋកិច្ច គឺអាចបំពេញរួច លុះណាតែក្នុងល័ក្ខខ័ណ្ឌ ធ្វើកំណែទម្រង់រចនាសម្ព័ន្ធ។ ស្របនឹង សេណារីយ៉ូជាគោលដៅរបស់ក្រសួង ទៅទល់ឆ្នាំ ២០២០ ចង្វាក់កំណើនសេដ្ឋកិច្ចរុស្ស៊ី នឹង ស្ទុះដល់ ៣,១%។ ទ្រនិចលេខនេះ តាមព្យាករណ៍របស់ក្រសួង គឺ ខ្ពស់ជាងចង្វាក់កំណើនសេដ្ឋកិច្ច ពិភពលោក។
បើស្របនឹងព្យាករណ៍ភាគច្រើនវិញ ចង្វាក់កំណើនសេដ្ឋកិច្ចរុស្ស៊ី នឹងមានទំនោរទៅខាងការធ្លាក់ចុះ ហើយ វា នឹងទាបជាងយ៉ាងបង្គួរ ពីចង្វាក់កំណើននៅក្នុងលោក។ ជាក់ស្តែង តាមព្យាករណ៍ធ្វើក្នុងខែមករា ដោយ មូលនិធិរូបិយវត្ថុអន្តរជាតិ IMF សេដ្ឋកិច្ចពិភពលោក ក្នុងឆ្នាំ ២០១៨-២០១៩ នឹងកើនឡើងក្នុង១ឆ្នាំៗ ដោយចង្វាក់ ៣,៩%។ ចំណែក ទំហំសេដ្ឋកិច្ច ឬ GDP រុស្ស៊ី ក្នុងឆ្នាំ ២០១៨ នេះ នឹងកើនឡើងតែ ១,៧% ហើយក្នុងឆ្នាំក្រោយ ឆ្នាំ ២០១៩ ចង្វាក់កំណើននេះ នឹងស្រុតចុះដល់ ១,៥%។
តើត្រូវចំណាយប៉ុន្មាន ដើម្បីបំពេញគោលដៅជាតិមួយចំនួននោះ ដាក់ចេញដោយលោកពូទីន
ក្នុងសារថ្លែងប្រចាំឆ្នាំ ថ្លែងទៅកាន់រដ្ឋសភានិងប្រជាជាតិ លោកពូទីន ធ្លាប់បានបង្ហើបឲ្យដឹងថា ទឹកប្រាក់ ដែលត្រូវចំណាយ គឺមិនតិចជាង 15 Trillions roubles ឡើយ ឬ ប្រមាណ ២៦៣.០០០ លានដុល្លារ។ តាមយោបល់ មជ្ឈមណ្ឌលអភិវឌ្ឍន៍នៃសាលាសេដ្ឋកិច្ចជាន់ខ្ពស់ ដើម្បីបានទឹកប្រាក់នេះ រុស្ស៊ី អាចបង្កើន ខ្ទង់បំណុលរដ្ឋ។
តើវាសនាខ្ទង់ចំណូលបណ្តាជន នឹងទៅជាយ៉ាងណា?
នយោបាយថវិការបស់រដ្ឋ នឹងស្ថិតនៅដូចមុនដដែល គឺខ្ទង់ចំណាយនៃថវិកានឹងបន្តរួញខើចទៅ ប៉ុន្តែ សម្រាប់ការី-ការិនី ដែលធ្វើការដោយពឹងផ្អែកលើថវិការដ្ឋ នឹងទទួលប្រាក់ខែ និងប្រាក់រ៉ឺត្រែត កើនឡើងទៅតាមកម្រិតអតិផរណា។
ចុះថវិកាយោធាវិញ នឹងមានទម្រង់យ៉ាងណា?
ក្នុងមហាសន្និសីទកាសែត កាលពីចុងឆ្នាំមុន លោកពូទីនបានប្រកាសថា ក្នុងឆ្នាំ ២០១៨ នេះ ខ្ទង់ចំណាយ យោធា នឹងមានទឹកប្រាក់ 2,8 Trillions roubles ឬ ស្មើនឹង ៤៩.១០០ លានដុល្លារ ហើយទាំងសម្រាប់ឆ្នាំ ២០១៩ និង ២០២០ តួលេខនេះ នឹងស្ថិតនៅដដែលឥតប្រែប្រួលទេ។ លោកពូទីនសង្កត់ធ្ងន់ថា រុស្ស៊ី នឹងបន្តផ្តោតការយកចិត្តទុកដាក់ទៅលើការអភិវឌ្ឍន៍កងទ័ពនិងកងនាវា ដោយមិនលង់ខ្លួនទៅក្នុងការរត់ប្រណាំងបំពាក់សព្វាវុធ លុះទាល់តែបំផ្លាញថវិកាជាតិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ