សហភាពអឺរ៉ុបបើកជំនួបកំពូលជាមួយនឹងសំណុំរឿងក្តៅៗច្រើន
ជំនួបកំពូលសហភាពអឺរ៉ុបត្រូវចាប់បើកនៅថ្ងៃព្រហស្បតិ៍ទី ២២ មីនា ដល់ថ្ងៃសុក្រទី២៣មីនា នៅទីក្រុងព្រុចសែល ជាមួយនឹងសំណុំរឿងក្តៅគគុកជាច្រើនដូចជា ជម្លោះរវាងអង់គ្លេសនិងរុស្ស៊ីជុំវិញការបំពុលអតីតភ្នាក់ងារចារកិច្ច ការអនុម័តកិច្ចព្រមព្រៀងអន្តរកាលក្រោយការចាកចេញរបស់អង់គ្លេស កំណែទម្រង់តំបន់អឺរ៉ូ ស្នើឡើងដោយប្រធានាធិបតីបារាំង កំណែទម្រង់នយោបាយពាណិជ្ជកម្មសហភាពអឺរ៉ុប ដើម្បីឆ្លើយតបទៅនឹងការយកពន្ធនាំចូលដែកថែបនិងអាលុយមីញ៉ូម ដាក់ដោយសហរដ្ឋអាមេរិក …
ចុះផ្សាយនៅថ្ងៃ៖
ស្តាប់ - ០២:០៤
ការពារខ្លួនប្រឆាំងនឹងនយោបាយបំប៉នតែសេដ្ឋកិច្ចជាតិឯងរបស់បណ្តាប្រទេសមួយចំនួនដែលមិនមែនជាសមាជិកសហភាពអឺរ៉ុប អនុវត្តបទដ្ឋានសង្គមនិងបរិស្ថាន ក្នុងការផ្តោះប្តូរពាណិជ្ជកម្ម និងគ្រោងត្រួតពិនិត្យវិនិយោគបរទេសក្នុងវិស័យយុទ្ធសាស្ត្រ ... នេះជាប្រធានបទនៃជំនួបកំពូលដែលសហភាពអឺរ៉ុបត្រូវលើកជជែកពិភាក្សាគ្នាដោះស្រាយ។
ការជជែកពិភាក្សាអាចនឹងប្រព្រឹត្តទៅក្នុងបរិយាកាសពិសេសខុសសព្វមួយដង ដោយហេតុតែបរិបទតម្រូវ ! អាមេរិកកំពុងត្រៀមយកពន្ធនាំចូលដែកថែប និងអាលុយមីញ៉ូមពីចិន ហើយអាចនឹងធ្វើដូចគ្នាជាមួយដៃគូនៅសហភាពអឺរ៉ុប។ សមាជិកសហភាពអឺរ៉ុប ទាំង២៨មានគម្រោងដាក់ទណ្ឌកម្មលើការនាំចូលផលិតផលចំណីអាហារមកពីអាមេរិកតបវិញ ហើយក៏នឹងអាចរាលដាលបន្តដល់វិស័យអ៊ីនធ័រនែតទៀត។ គណៈកម្មការអឺរ៉ុប ត្រូវពិចារណាលើប្រធានដ៏រសើបខ្លាំងមួយដែរ គឺចង់យកពន្ធលើក្រុមហ៊ុនយក្សផ្នែកព័ត៌មានវិទ្យារបស់អាមេរិកដូចជា ក្រុមហ៊ុន Google Apple Facebook និង Amazon ដែលអឺរ៉ុបប្រសិទ្ធិនាមថាក្រុម GAFA។ សំណុំរឿងនេះអាចនឹងត្រូវប៉ះពាល់និងរារាំងដោយប្រទេសអៀរឡង់ និងក្រុមប្រទេសអឺរ៉ុបតូចៗមួយចំនួនតែស្និទ្ធនឹងអាមេរិក។
ប្រធានបទជាអាទិភាពមួយទៀត សម្រាប់ជំនួបលើកនេះ ការចាកចេញរបស់អង់គ្លេសពីសហភាពអឺរ៉ុប។ អឺរ៉ុបនិងអង់គ្លេសបានរកឃើញកិច្ចព្រមព្រៀងអន្តរកាលមួយក្រោយការចាកចេញរបស់អង់គ្លេស កាលពីដើមសប្តាហ៍ ប៉ុន្តែនៅមានចំណុចរសើបជាច្រើនទៀតដែលដោះស្រាយមិនទាន់ចេញ ត្រូវបន្តពិភាក្សាគ្នានៅក្នុងជំនួបកំពូលនេះ នោះគឺបញ្ហាព្រំដែនរវាងសាធារណរដ្ឋអៀរឡង់និងអៀឡង់ខាងជើងរបស់អង់គ្លេស។
ប្រធានបទនយោបាយអន្តរជាតិរបស់សហភាពអឺរ៉ុប ក៏មានចំណែកដ៏សំខាន់មួយដែរនៅល្ងាចនេះ ! សហភាពអឺរ៉ុបត្រូវរៀបចំយុទ្ធសាស្ត្ររបស់ខ្លួន ជាមួយក្រុមប្រទេសនៅតំបន់បាល់កង់ ឬ ភាពតានតឹងរវាងក្រិចនិងស្ហ៊ីប ជាមួយតួកគី និងជាពិសេសរវាងអង់គ្លេសនិងរុស្ស៊ី ដោយសារការបំពុលអតីតភ្នាក់ងារចារកិច្ចរុស្ស៊ីនៅក្នុងទឹកដីអង់គ្លេស។ អង់គ្លេស ដែលនៅជាសមាជិកយ៉ាងពេញសិទ្ធិនិងពេញលេញរបស់សហភាពអឺរ៉ុប ចង់បានសេចក្តីថ្លែងការណ៍រួម ២៨ប្រទេស ថ្កោលទោសការជ្រៀតជ្រែករបស់រុស្ស៊ី។
ដោយឡែក លោកប្រធានាធិបតីបារាំង កំពុងសាកល្បងបញ្ចុះបញ្ចូលដៃគូក្នុងសហភាពឱ្យយល់អំពីតម្លៃនៃការធ្វើកំណែទម្រង់តំបន់ចាយប្រាក់អឺរ៉ូ ! បារាំងត្រូវប្រឹងខ្លាំងមែនទែន បើចង់សម្រេចគូសជាផែនទីចង្អុលផ្លូវបាននៅជំនួបលើកក្រោយ (ខែមិថុនា) ព្រោះមានប្រទេសខ្លះ ដូចយ៉ាងប្រទេសហូឡង់ មិនចង់មិនចង់ឮទេ។ ប៉ុន្តែប្រធានបទនេះហាក់ដូចជាពុំសូវមានអាទិភាពខ្លាំងទេ នៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ