អ្នកប្រាជ្ញរូបវិទ្យា Stephen Hawking ទទួលមរណភាព ក្នុងវ័យ៧៦ឆ្នាំ
រូបវិទូ ដែលជាអ្នកវិទ្យាសាស្ត្រជាតិអង់គ្លេសដ៏ល្បីល្បាញបំផុត ក្នុងប្រវត្តិសាស្ត្រសម័យថ្មី លោក Stephen Hawking បានទទួលមរណភាព នៅថ្ងៃពុធទី ១៤ មីនា ២០១៨ ក្នុងជន្មាយុ ៧៦ឆ្នាំ។ លោកបានខិតខំស្រាវជ្រាវ ទម្លាយអាថ៌កំបាំងរបស់ចក្រវាឡ ទាំងខ្លួនលោកមានជំងឺ ធ្លាក់ខ្លួនពិការ និយាយមិនចេញ កម្រើកបានតែម្រាមដៃមួយ សម្រាប់វាយអក្សរ។
ចុះផ្សាយនៅថ្ងៃ៖ កែប្រែថ្ងៃទី៖
លោក Stephen Hawking មានឈ្មោះល្បីរន្ទឺ ពេញពិភពលោក តាមរយៈស្នាដៃស្រាវជ្រាវជាច្រើន ប្រមាណ១៣០ អត្ថបទ ស្តីអំពីអវកាស អំពីរូបវិទ្យា ភាពងងឹត ... ដែលសឹងថាមានតែអ្នកវិទ្យាសាស្ត្រខ្លាំងៗមួយក្តាប់តូចអាចអានយល់។ ភាពល្បីល្បាញរបស់លោក មានកាន់តែខ្លាំង តាមរយៈការសរសេរសៀវភៅមួយក្បាលស្តីអំពី ប្រវត្តិខ្លីនៃពេល “A brief history of Time” ចេញលក់នៅឆ្នាំ១៩៨៨ និងជាសៀវភៅដែលលក់ដាច់ជាងបង្អស់ នៅលើពិភពលោក ដោយលក់អស់ដល់ទៅរាប់លានក្បាល។
ក្នុងពិភពលោកអ្នកវិទ្យាសាស្ត្រ បន្ទាប់ពីអ្នកប្រាជ្ញ Albert Einstein គឺលោក Stephen Hawking នេះហើយ។
ទន្ទឹមនឹងសមត្ថភាពផ្នែកបញ្ញាគ្មានប្រៀប លោក Stephen Hawking ត្រូវរស់ប្រឈមនឹងភាពពិការ ដែលបង្កឡើងដោយជំងឺខូចប្រព័ន្ធប្រសាទដ៏កម្រ។ ជំងឺដែលបានធ្វើឱ្យបាត់បង់សមត្ថភាពផ្នែកសពាង្គកាយស្ទើរទាំងស្រុង អាចបញ្ចេញអារម្មណ៍ មតិយោបល់ តែតាមរយៈម្រាមដៃមួយគត់ ចុចក្តារកុំព្យូទ័រសរសេរ និងការកន្ទ្រាក់សាច់មុខ សម្រាប់ធ្វើសំយោគសំឡេង ប៉ុន្តែមានបញ្ញា និងខួរក្បាលខ្លាំងក្រៃ។ ចូលចិត្តកំប្លុកកំប្លែង លោក ធ្លាប់បាននិយាយថា ពិការភាពរបស់លោកជាចំណែកមួយភាពល្បីល្បាញ។
កើតនៅOxford ថ្ងៃទី៨ មករា ឆ្នាំ១៩៤២ ត្រូវនឹង៣០០ថ្ងៃគត់ក្រោយមរណភាពរបស់ Galilée។ លោក Stephen Hawking ជាក្មេងដែលខ្ជិល មិនសូវចូលចិត្តសាលារៀនទេ រវល់គិតស្រមៃ និងបង្កើតល្បែងលេងជាក្រុមដែលមានក្បួនច្បាប់ប្លែកៗ ផលិតកាំជ្រួច ឬគំរូកុំព្យូទ័រ ... ពោលគឺលោកមានជំនាងខ្លាំងលើផ្នែកវិទ្យាសាស្ត្ររូបវិទ្យា ដែលបានចូលសិក្សាយកជំនាញនៅមហាវិទ្យាល័យ Oxfordនៅឆ្នាំ១៩៥៩។
លោកមានភាពវ័យឆ្លាត ងឿងឆ្ងល់ និងតស៊ូព្យាបាល ប្លែកខុសពីមនុស្សទូទៅ។ បីឆ្នាំក្រោយមកទៀត នៅឆ្នាំ១៩៦២ លោកបានបន្តការសិក្សានៅសាកលវិទ្យាល័យ Cambridge ដើម្បីបន្តការស្រាវជ្រាវផ្នែកតារាវិទ្យា។ ប៉ុន្តែជាសំណាងអាក្រក់ ពេលចូលដល់វ័យ២១ឆ្នាំ (១៩៦៤) លោកបានធ្លាក់ខ្លួនឈឺ ជំងឺដ៏ខូចប្រព័ន្ធប្រសាទដ៏កម្រ មានឈ្មោះថា ជំងឺChacot ដែលធ្វើឱ្យលោកធ្លាក់ខ្លួនពិការបន្តិចម្តងៗ។ កាលណោះ គ្រូពេទ្យ គិតថាលោកអាចមានពេលរស់បានតែពីរឆ្នាំប៉ុណ្ណោះ ! មិនថាតើលោកអាចបញ្ចប់និក្ខេបទថ្នាក់បណ្ឌិតរបស់លោកបានឬអត់ឡើយ។ ដំណឹងនេះបានធ្វើឱ្យលោកមានជំងឺធ្លាក់ទឹកចិត្ត តែត្រូវបានជាដោយសារនិស្ស័យស្នេហ៍ ជួបយុវតីនិស្សិត Jane Wilde ដែលលោកបានរៀបការជាមួយនៅឆ្នាំ១៩៦៥ និងរួមរស់ជាមួយ មានកូនបីនាក់ ក្នុងរយៈពេល៣០ឆ្នាំ។
នៅឆ្នាំ១៩៧៤ លោកលែងមានសមត្ថភាពហូបចុក និងងើបឈរអង្គុយដោយខ្លួនឯង ហើយត្រូវបាត់បង់សមត្ថភាពនិយាយស្តីទាំងស្រុងនៅឆ្នាំ១៩៨៥។
ប៉ុន្តែស្មារតី និងបញ្ញា គ្មានប្រែប្រួល ! បំណងដ៏សាមញ្ញរបស់លោក គឺសិក្សាស្រាវជ្រាវដើម្បីបានយល់ទាំងស្រុង ពីចក្រវាឡ ថាហេតុអ្វីបានជាដូច្នេះ និងហេតុអ្វីបានជាកើតឡើង។
នៅក្នុងទសវត្សរ៍ឆ្នាំ១៩៧០ លោកបានអភិវឌ្ឍន៍ទ្រឹស្តី ស្តីពី ភាពងងឹត ប្រហោងខ្មៅ និងពន្លឺ ព្រមទាំងកាំរស្មី ដែលពេលនេះជាប់ជាក្បួនសិក្សាឈ្មោះថា កាំរស្មីHawking។ លោកគឺជាជនទីមួយ ដែលសិក្សាពន្យល់អំពីដំណើរការនៃចក្រវាឡ អំពី យន្តការកង់ទិច និងដែលគួរតែអាចបានទទួលពានរង្វាន់ណូបែលរូបវិទ្យាផង ប្រសិនបើមានពិសោធន៍បង្ហាញ។
នៅឆ្នាំ១៩៨៨ លោកបានបោះផ្សាយសៀវភៅ អំពីប្រវត្តិនៃពេល សម្រាប់ពន្យល់អ្នកអានជាពលរដ្ឋសាមញ្ញ អំពីគោលការណ៍នៃលោហធាតុវិទ្យា ពីបន្ទុះធំទៅទ្រឹស្តីខ្សែអក្សរ។ ពុំដែលធ្លាប់មានទេ សៀវភៅវិទ្យាសាស្ត្រទទួលបានការអាចច្រើនយ៉ាងដូច្នេះ !
បានក្លាយជាអ្នកវិទ្យាសាស្ត្រដ៏មានប្រជាប្រិយភាព ! លោកបានបង្កើនយុទ្ធនាការឃោសនាគាំទ្រការស្រាវជ្រាវវិទ្យាសាស្ត្រ នារយៈពេលប៉ុន្មានឆ្នាំចុងក្រោយនេះ។ ដោយមាននិស្ស័យកំប្លុកកំប្លែង ពូកែខាងទំនាក់ទំនង លោកក៏មានចំណែក និងដើរតួក្នុងរឿងភាគ Star Trek រឿង The Big Bang Theory និងរឿង The Simpsons៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ