លោក James Mattis ទាមទារឲ្យសមាជិកអូតង់បង្កើនថវិកាការពារជាតិ
នៅឱកាសនៃការប្រជុំមួយរបស់អូតង់នាថ្ងៃពុធនេះ លោក Mattis រដ្ឋមន្ត្រីការពារជាតិអាមេរិក បានសុំស្នើសមភាគីរបស់លោកខាងអ៊ឺរ៉ុប អោយធ្វើការគោរពកិច្ចសន្យារបស់ខ្លួននៅលើការបង្កើនថវិកាសម្រាប់កិច្ចការពារជាតិទៅតាមវិធានដែលបានកំណត់ទុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នៅក្នុងសម័យប្រជុំមួយរបស់បណ្តារដ្ឋមន្ត្រីការពារជាតិ របស់អង្គការអូតង់នៅថ្ងៃពុធនេះ ប្រមុខការពារជាតិអាមេរិកលោក James Mattis បានថ្លែងថា សហរដ្ឋអាមេរិក សុំស្នើអោយប្រទេសអ៊ឺរ៉ុបដែលជាសមាជិករបស់អូតង់ គោរពលើកិច្ចសន្យារបស់ខ្លួននៅលើការបង្កើនការចំណាយថវិការសម្រាប់កិច្ចការពារជាតិ។
កន្លងមកប្រធានាធិបតីអាមេរិក លោក Donald Trump ធ្លាប់បានគម្រាម ថាអាមេរិកនឹងដកការគាំទ្ររបស់ខ្លួនចំពោះបណ្តាប្រទេសសមាជិកអង្គការអូតង់ ដោយលោកបានវិនិច្ឆ័យថា ការចំណាយលើថវិកាសម្រាប់ការពារជាតិនៅពុំគ្រប់គ្រាន់។
ក្នុងន័យនេះហើយ បានជាក្រុមប្រទេសសមាជិកអូតង់ បានដាក់ជូនជាលើកទីមួយនូវផែនការនានារបស់ខ្លួនដើម្បីបញ្ជាក់ថា ប្រទេសរបស់ខ្លួន នឹង ឈានទៅដល់គោលដៅនៅលើការចំណាយថវិការសម្រាប់កិច្ចការពារជាតិដែលមានចំនួនស្មើនឹង ២% នៃផលិតផលក្នុងស្រុកសរុបនៅឆ្នាំ២០២៤។
លើកលែងអាមេរិក ប្រទេសចំនួន ១៥ ក្នុងចំណោម ប្រទេសទាំង២៨របស់អូតង់ ចាប់ពីអំណេះ តទៅមានយុទ្ធសាស្រ្តមួយរបស់ខ្លួនដើម្បីឈានទៅដល់គោលដៅខាងលើ ។ គោលដៅដែលត្រូវបានសម្រេចឡើងនៅក្នុងឆ្នាំ ២០១៤ ដើម្បីឆ្លើយតបទៅនឹងទង្វើរបស់រុស្ស៊ី ដែលយកតំបន់ Crimé របស់ អ៊ុយក្រែន ធ្វើជាដែនដីរបស់ខ្លួន។ គួររំលឹកថា ថវិកា សម្រាប់ការចំណាយលើផ្នែកយោធា នាជំនាន់នោះមានការស្រុតចុះ។
យោងតាមលោកស្រី Katie Wheelbarger ដែលជាមន្ត្រីជំនួយការម្នាក់របស់រដ្ឋមន្ត្រីការពារជាតិអាមេរិក "លោក James Mattis នឹងធ្វើសេចក្តីថ្លែងទៅដល់បណ្តាប្រទេសដែលនៅពុំទាន់មានកម្មវិធីសម្រាប់ការចំណាយលើកិច្ចការពារជាតិរបស់ខ្លួន ឲ្យបានដល់ចំនួន ២% នៃផលិតផលក្នុងស្រុកសរុបនោះ នឹង ក៏ត្រូវធ្វើការអភិវឌ្ឈន៍នៅលើកម្មវិធីរបស់ខ្លួនដែរ។
យោងតាមទិន្ន័យរបស់អង្គការអូតង់ ប្រទេសអង់គ្លេស Grèce Roumanieនិងរដ្ឋនៃតំបន់បាល់ចំនួន៣ដែលមាន Estonie, Lettonie et Lituanie បានបង្កើនថវិការយោធាបានទៅដល់ ២% ឬ ក៏ ជិត ឈាន ដល់តួលេខនេះដែរ។
ចំណែកប្រទេសបារាំង បានគ្រោងទុកការបង្កើនថវិការសម្រាប់កិច្ចការពារជាតិរបស់ខ្លួនបានចំនួនជាង១/៣ នៅក្នុង រវាងឆ្នាំ២០១៧ និង២០២៥ ហើយប្រទេសតួកគីវិញ នឹងបានសម្រេចលើផែនការចំណាយលើកិច្ចការពារជាតិនេះ ដ៏ឆាប់រហ័សដែរ។
ប្រទេសអេស្ប៉ាញវិញ បានធ្វើការបញ្ជាក់ឲ្យដឹងថា ប្រទេសខ្លួននៅពុំទាន់ឈានទៅដល់គោលដៅខាងលើនេះទេ។ ប្រទេសបែលហ្សិកនិងអ៊ីតាលីវិញ នៅតែយឺតយ៉ាវ។ រីឯ អាល្លឹមង់ ថ្វីត្បិតតែមានគម្រោងដ៏សំខាន់នៅលើការបង្កើនថវិការសម្រាប់យោធាក្តី ក៏នៅតែមានការពិបាកក្នុងការឈានទៅដល់គោលដៅខាងលើនេះ។ ចំណែកប្រធានាធិបតីអាមេរិកវិញ បានស្នើបង្កើនការចំណាយសម្រាប់កិច្ចការពារនៅអឺរ៉ុបចំនួន១ពាន់៧០០លានដុល្លារអាមេរិកសម្រាប់ឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ