ប្រធានាធិបតីបារាំងបំពេញទស្សនកិច្ចនៅតំបន់ករ្សដែលអ្នកទាមទារផ្តាច់ទឹកដីឈ្នះឆ្នោត
លោក អេម៉ានុយអែល ម៉ាក្រុង កំពុងបំពេញទស្សនកិច្ច ជាលើកដំបូង នៅថ្ងៃនេះ ក្នុងនាមជាប្រធានាធិបតី នៅកោះករ្ស (Corse) ដ៏ល្អប្រិមប្រិយរបស់បារាំង តែជាតំបន់ ដែលចលនាអ្នកទាមទារផ្តាច់ទឹកដីទើបនឹងឈ្នះឆ្នោតឡើងកាន់អំណាច កាលពីខែធ្នូ ឆ្នាំ ២០១៧។ ករ្សជាដែនដីបារាំងដែលមានលក្ខន្តិកៈនយោបាយពិសេសខុសពីតំបន់ដទៃទៀត ទាមទារកាន់តែខ្លាំងឡើងៗចង់ចរចាជាមួយរដ្ឋាភិបាល ឱ្យទទួលស្គាល់លក្ខណៈពិសេសរបស់កោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្នុងដំណើរទស្សនកិច្ចផ្លូវការជាលើកដំបូង រយៈពេលពីរថ្ងៃ នៅលើកោះករ្ស លោកប្រធានាធិបតីបារាំង បានជ្រើសរើសអញ្ជើញទៅគោរពវិញ្ញាណក្ខន្ធ លោក Claude Erignac មេប៉ូលិសតំបន់ករ្ស ដែលត្រូវបានគេធ្វើឃាត ជាគម្រប់ខួប២០ឆ្នាំគត់ នៅថ្ងៃអង្គារទី ៦កុម្ភៈនេះ ជាកិច្ចចាប់ផ្តើម។ ជាជម្រើសប្រកបដោយខ្លឹមសារ ដែលលោកប្រាប់ថាបារាំងប្រឆាំងដាច់ខាតនឹងទង្វើឃាតកម្មលើតំណាងរដ្ឋ។ លោក ក្លូត អេរីញ៉ាក់ ជាតំណាងជាន់ខ្ពស់រដ្ឋាភិបាលដំបូងគេបង្អស់ និងតែមួយគត់របស់បារាំង ដែលត្រូវបានគេលបធ្វើឃាត គិតចាប់តាំងពីសង្គ្រាមលោកមក។
ប៉ុន្តែអ្វីដែលគេរង់ចាំពីទស្សនកិច្ចរបស់ប្រធានាធិបតី ដែលល្បីខាងបើកចំហកិច្ចចរចា គ្មានប្រកាន់រឿង គឺជំហររបស់រដ្ឋាភិបាល ចំពោះកោះ។ អ្នកជាតិនិយមករ្ស ដែលធ្លាប់ជាក្រុមខុសច្បាប់ប្រព្រឹត្តអំពើភេរវកម្ម បានបើកទំព័រនយោបាយថ្មី ចាប់ពីឆ្នាំ ២០១៤មក និងបានឈ្នះឆ្នោត កាលពីខែធ្នូ ឆ្នាំ២០១៧ មានសំឡេងភាគច្រើននៅក្នុងសភាករ្ស និងក្លាយជាអ្នកដឹកនាំកោះ។
សូមអាន ៖ កោះករ្សលើវិថីនៃការទាមទារឯករាជ្យ
ក្រោយពេលជាប់ឆ្នោត លោកប្រធានាធិបតី ម៉ាក្រុង បង្ហើបបង្ហាញនយោបាយស្តីពីតំបន់ករ្សយ៉ាងតិចតួចបំផុត។ លោក ម៉ាក្រុង នឹងជួបពិភាក្សាជាមួយប្រមុខដឹកនាំរដ្ឋាភិបាលតំបន់ និងប្រធានសភាករ្ស នៅល្ងាចថ្ងៃអង្គារនេះ។ ប៉ុន្តែគេត្រូវរង់ចាំ ដល់រសៀលថ្ងៃពុធស្អែក ទើបលោកប្រធានាធិបតីនឹងថ្លែងសុន្ទរកថាស្តីអំពីទស្សនៈវិស័យរបស់រដ្ឋាភិបាល ចំពោះតំបន់ករ្ស។ ជាសុន្ទរកថាដែលគ្រប់គ្នាជាពិសេសក្រុងប៉ារីស រង់ចាំតានដានបំផុត ព្រោះជាឱកាសដែលលោកប្រធានាធិបតីត្រូវបង្ហាញអំពីជំហរស្តីពីក្របខ័ណ្ឌនៃការសើរើរដ្ឋធម្មនុញ្ញ រាប់ទាំងកោះករ្សផង ដូចដែលអ្នកជាតិនិយមករ្សទាមទារចង់បានដែរឬអត់។
សូមបញ្ជាក់ថា ថ្វីបើកោះករ្សមានលក្ខន្តិកៈពិសេស មានស្វ័យភាពខ្លាំងខុសពីតំបន់ផ្សេងរបស់បារាំងមែន ប៉ុន្តែអ្នកជាតិនិយមដែលកំពុងកាន់អំណាចទាមទារចរចាចង់បានស្វ័យភាពបន្ថែមទៀត ដូចជាចង់ឱ្យមានការលើកលែងទោសដល់អ្នកទោសនយោបាយ បញ្ជូលភាសាករ្សជាភាសាផ្លូវការ និងកម្មសិទ្ធលើអចលនទ្រព្យ ព្រមទាំងចង់បានអំណាចនីតិប្រតិបត្តិនិងពន្ធដារករ្សទទួលស្គាល់ដោយរដ្ឋ និងដោយសហភាពអឺរ៉ុប។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ