ក្រោយការបោះឆ្នោត មេចលនាទាមទារឯករាជ្យកាតាឡូញ៉ាសុំចរចា តែរដ្ឋាភិបាលបដិសេធ
ក្រោយលទ្ធផលនៃការបោះឆ្នោតសភា ដែលក្រុមអ្នកទាមទារឯករាជ្យកាតាឡូញ៉ា បានទទួលសំឡេងភាគច្រើនដាច់ខាតបាននៅក្នុងសភា (៧០លើ១៣៥អាសនៈ) លោក Puigdemont “អនាគត” មេដឹកនាំតំបន់”កាតាឡូញ៉ា បានប្រកាសស្នើសុំចរចាជាមួយប្រមុខរដ្ឋាភិបាលអេស្ប៉ាញ។ ប៉ុន្តែសម្រាប់លោកនាយករដ្ឋមន្ត្រី ដៃគូសន្ទនារបស់រដ្ឋាភិបាល គឺប្រធានគណបក្សCiudadanos ដែលឈ្នះនាំមុខគេបំផុតនៅក្នុងការបោះឆ្នោតសភាទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ដល់វេលាដែលត្រូវបើកការចរចាហើយ ! នេះជាប្រសាសន៍របស់លោក ម៉ារីយាណូ រ៉ាហយ ប្រមុខរដ្ឋាភិបាលអេស្ប៉ាញ នៅរសៀលថ្ងៃសុក្រទី ២២ធ្នូ ក្រោយបានសង្កេតឃើញលទ្ធផលនៃការបោះឆ្នោតសភាតំបន់កាតាឡូញ៉ា។
លោកនាយករដ្ឋមន្ត្រី ប្រធានបក្សប្រជាជនដែលបានចាញ់ឆ្នោតតំបន់យ៉ាងដំណំ សល់តែបីកៅអី បានប្រកាសត្រៀមខ្លួនចរចា និងសហការជាមួយរដ្ឋាភិបាលតំបន់កាតាឡូញ៉ា ដើម្បីផ្សះផ្សាជាតិឡើងវិញ តែប្រឆាំងដាច់រាល់គំនិតផ្តួចផ្តើមណាដែលផ្ទុយនឹងរដ្ឋធម្មនុញ្ញប្រទេស។ តើនេះមានន័យថា លោកបដិសេធមិនចរចាជាមួយ ក្រុមអ្នកទាមទារផ្តាច់ទឹកដី ដែលទើបឈ្នះឆ្នោតមានសំឡេងភាគច្រើនដាច់ខាតនៅក្នុងសភា តាមសំណើរបស់លោក Puigdemont ទេឬ ?!
គ្មានចម្លើយបញ្ជាក់ដោយត្រង់ និងចំៗទេ! លោក រ៉ាហយ បានត្រឹមអះអាងថា រដ្ឋាភិបាលនឹងធ្វើការចរចាជាមួយបក្សCiudadanos ដឹកនាំដោយលោកស្រី Ines Irrimadas ដែលជាបក្សឈ្នះនាំមុខគេ និងបានទទួលសំឡេងគាំទ្រដល់ទៅជាង ១,១លាននាក់ (២៥%)។
សូមបញ្ជាក់ថា នៅមុនពីរបីម៉ោង អតីតប្រមុខដឹកនាំតំបន់កាតាឡូញ៉ា Puigdemont ដែលកំពុងរស់និរទេសខ្លួននៅប៊ែលហ្សិក តាំងពីថ្ងៃទី ៣០តុលាមក បានធ្វើសេចក្តីថ្លែងការណ៍មួយដែរពីទីក្រុងព្រុចសែល ស្នើសុំជួបជាមួយប្រមុខរដ្ឋាភិបាលអេស្ប៉ាញ លោក រ៉ាហយ ក្នុងនាមជាអ្នកឈ្នះឆ្នោត នៅប្រទេសប៊ែលហ្សិក ឬទីណាមួយក្នុងសហភាពអឺរ៉ុប។ ប្រមុខចលនាទាមទារផ្តាច់ទឹកដីរូបនេះ ក៏បានអំពាវនាវសុំការគាំទ្រពីសហភាពអឺរ៉ុបទៀត។
បើតាមលទ្ធផលឆ្នោត លោក Puigdemont ត្រូវក្លាយជាប្រមុខដឹកនាំតំបន់កាតាឡូញ៉ាជាថ្មី ប៉ុន្តែលោកមិនបានគូសបញ្ជាក់អំពីចេតនា និងពេលវេលាដែលត្រូវត្រលប់ចូលស្រុកវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ