របាយការណ៍៖វិសមភាពនៅទូទាំងពិភពលោកបានកើនឡើងខ្លាំងតាំងពីជិត ៤០ឆ្នាំ និងអាចកាន់តែដុនដាបនៅរង្វង់ឆ្នាំ ២០៥០
ចុះផ្សាយនៅថ្ងៃ៖
ស្តាប់ - ០៥:៥៥
នៅថ្ងៃព្រហស្បតិ៍ ទី១៤ ធ្នូនេះ របាយការណ៍ស្តីពីលទ្ធផលនៃការសិក្សាមួយបានបង្ហាញពីកំណើនវិសមភាពនៅទូទាំងពិភពលោកក្នុងរយៈពេលជិត ៤០ឆ្នាំកន្លងទៅ។ លទ្ធផលនៃការសិក្សានេះ គឺជាផ្លែផ្កាបានមកពីការងាររួមគ្នារវាងក្រុមសេដ្ឋវិទូប្រមាណជា ១០០នាក់មកពីគ្រប់ប្រទេសក្នុងលោក។ តាមរបាយការណ៍ វិសមភាពកំពុងបន្តកើតមាន និងកើនឡើងនៅគ្រប់ទ្វីបទាំងអស់។ របាយការណ៍បានទាញសញ្ញាអាសន្នថា បើថ្នាក់ដឹកនាំនយោបាយមិនស្វះស្វែងគិតគូរទេ នោះវិសមភាពអាចនឹងធ្លាក់ដុនដាបកាន់តែខ្លាំងថែមទៀតនៅរង្វង់ឆ្នាំ ២០៥០ ដែលអាចបង្កឲ្យមានអស្ថិរភាពនយោបាយ។
លទ្ធផលនៃការសិក្សារបស់ក្រុមសេដ្ឋវិទូប្រមាណជា ១០០នាក់មកពីគ្រប់ប្រទេសក្នុងលោកចេញផ្សាយថ្ងៃព្រហស្បតិ៍ ទី១៤ ធ្នូនេះបានធ្វើឡើងពីឆ្នាំ ១៩៨០ ដល់ឆ្នាំ ២០១៦។ ចំណែកប្រធានបទស្នូល និងអាទិភាពរបស់ក្រុមសេដ្ឋវិទូ គឺបានផ្តោតសំខាន់លើទ្រព្យសម្បត្តិ និងប្រាក់ចំណូល។ អ្វីដែលរបាយការណ៍ចង់បង្ហាញនោះ គឺគម្លាតខ្លាំងក្នុងរឿងប្រាក់ចំណូល និងទ្រព្យសម្បតិរវាងប្រជាជនម្នាក់ៗដែលរស់នៅក្នុងប្រទេសផ្សេងៗគ្នា និងក្នុងទ្វីបខុសគ្នាដោយមិនគិតជាក្រុមប្រទេសអភិវឌ្ឍន៍ ក្រុមប្រទេសកំពុងអភិវឌ្ឍន៍ ឬក្រុមប្រទេសក្រីក្រទេ។ របាយការណ៍បានកត់សម្គាល់ឃើញជាទូទៅថាតាំងពីឆ្នាំ ១៩៨០មក កម្រិតប្រាក់ចំណូលមានគម្លាតកាន់តែខ្លាំងរវាងក្រុមអ្នកមាន ក្រុមអ្នកមធ្យម និងក្រុមអ្នកក្រ។
អ្វីដែលក្រុមសេដ្ឋវិទូចង់និយាយ គឺវិសមភាពនៃការទទួលផលពីកំណើនសេដ្ឋកិច្ចរបស់ប្រទេសដែលពួកគេរស់នៅ មានន័យថា គឺពួកអ្នកមានដែលទទួលបានប្រយោជន៍មុនគេ និងច្រើនជាងគេ។ គិតតាំងពីឆ្នាំ ១៩៨០ មក ពួកអ្នកមានជាងគេក្នុងលោកតែ ១% ទទួលបានចំណែកផលសេដ្ឋកិច្ចពិភពលោកដល់ទៅ ២៧% ពោលច្រើនជាងពួកអ្នកក្រជាងគេចំនួន ៥០% ដែលទទួលបានតែ ១២% ប៉ុណ្ណោះ។ ចំណែកពួកអ្នកកណ្តាល ពោលក្រុមអ្នកស្ថិតនៅចម្លោះរវាងពួកអ្នកមានខ្លាំង និងអ្នកក្រខ្លាំងបានស្គាល់ប្រាក់ចំណូលរបស់ខ្លួនឡើងតិចតួចក្នុងចន្លោះឆ្នាំ ១៩៨០ និង ២០១៦។
ក្រៅពីវិសមភាពក្នុងរឿងប្រាក់ចំណូលរបស់មនុស្សម្នាក់ៗ របាយការណ៍ក៏បានលើកឡើងពីវិសមភាពក្នុងរឿងទ្រព្យសម្បតិ ពិសេសអចលនទ្រព្យដែលមនុស្សម្នាក់ៗកំពុងមានក្នុងដៃ។ តាមរបាយការណ៍ គម្លាតក្នុងរឿងទ្រព្យសម្បត្តិនៅទូទាំងពិភពលោកចន្លោះឆ្នាំ ១៩៨០ និង ២០១៦ មានពី ២០ ទៅ ៣០%។
កំណើនវិសមភាពមានតិច ឬច្រើនពីប្រទេសមួយទៅប្រទេសមួយ
របាយការណ៍បានបញ្ជាក់ថា ពីប្រទេសមួយទៅប្រទេស និងពីទ្វីបមួយទៅទ្វីបមួយ កំណើនវិសមភាពក្នុងរឿងប្រាក់ចំណូលក្តី ឬរឿងទ្រព្យសម្បត្តិក្តី គឺមិនដូចគ្នាទេ។ ជាក់ស្តែងក្នុងឆ្នាំ ២០១៦នៅអឺរ៉ុប ពួកអ្នកមានជាងគេចំនួន ១០% ទទួលបានចំណែកផលសេដ្ឋកិច្ចរបស់អឺរ៉ុបដល់ទៅ ៣៧% ទល់នឹងនៅចិនចំនួន ៤១% នៅអាមេរិកខាងជើងចំនួន ៤៧% និង ៥៥% នៅក្នុងប្រទេសឥណ្ឌា និងប្រេស៊ីល។ ម្យ៉ាងទៀត វិសមភាពនៃប្រាក់ចំណូលក៏កើតមាននៅក្នុងក្រុមប្រទេសអភិវឌ្ឍន៍ ឬក្រុមប្រទេសកំពុងអភិវឌ្ឍន៍ដូចគ្នា។
ឧទាហរណ៍រវាងអាមេរិក និងអឺរ៉ុប អត្រានៃវិសមភាពមានកម្រិតប្រហាក់ប្រហែលគ្នាក្នុងទសវត្សរ៍ឆ្នាំ ៨០ តែសព្វថ្ងៃនេះ គម្លាតមានកាន់តែខ្លាំងដែលធ្ងន់ធ្ងរជាងគេនៅអាមេរិក។ ចំណែករវាងក្រុមប្រទេសដែលកំពុងមានសេដ្ឋកិច្ចរីកលូតលាស់ខ្លាំងវិញ ពិសេសរវាងចិន និងឥណ្ឌា កំណើនវិសមភាពនៅចិនបានឡើងលឿនជាងនៅឥណ្ឌាតាំងពីឆ្នាំ ១៩៨០។ យ៉ាងណាក៏ដោយ មជ្ឈិមបូព៌ាជាតំបន់ដែលវិសមភាពមានកម្រិតខ្ពស់ជាងគេ ព្រោះថា ពួកអ្នកមានជាងគេចំនួន ១០% នៅក្នុងតំបន់បានស្រូបយកផលសេដ្ឋកិច្ចតំបន់ដល់ទៅជាង ៦០%។
ដើមចមដែលជំរុញឲ្យមានកំណើនវិសមភាព
ការអនុវត្តន៍នយោបាយសេដ្ឋកិច្ចសេរីបើកចំហដោយផ្ទេរពីការគ្រប់គ្រងរបស់រដ្ឋទៅឲ្យវិស័យឯកជនកាន់កាប់ត្រូវបានក្រុមសេដ្ឋវិទូចាត់ទុកជាកត្តាតែមួយគត់ដែលបានជំរុញឲ្យមានកំណើនវិសមភាពក្នុងរឿងប្រាក់ចំណូល និងក្នុងរឿងទ្រព្យសម្បត្តិនៅទូទាំងពិភពលោកក្នុងរយៈពេលជិត ៤០ឆ្នាំកន្លងទៅនេះ។ តាំងពីឆ្នាំ ១៩៨០ មក នយោបាយរបៀបនេះបានធ្វើឲ្យពួកអ្នកមាន និងពួកឈ្មួញគ្រាក់ៗកាន់តែមានទៅៗ ចំណែករដ្ឋាភិបាលកាន់តែក្រទៅៗ។ នៅក្នុងប្រទេសរុស្ស៊ី និងចិនដែលបានប្តូរពីសេដ្ឋកិច្ចសង្គមទៅសេដ្ឋកិច្ចមូលធននិយម, កំណើនទ្រព្យសម្បត្តិឯកជនបានកើនទ្វេ ឬ៣ដង ហើយដែលយន្តការណ៍មួយបានបង្កឲ្យមានកំណើនវិសមភាពខ្ពស់ស្តីពីប្រាក់ចំណូល និងទ្រព្យសម្បត្តិ។
របាយការណ៍បានមើលឃើញថា កំណើនវិសមភាពក្នុងរឿងប្រាក់ចំណូល និងរឿងទ្រព្យសម្បត្តិនៅទូទាំងពិភពលោកកំពុងស្ថិតលើខ្សែបន្ទាត់បាញ់ឡើងលើ និងបានអំពាវនាវដល់រដ្ឋាភិបាលគ្រប់ប្រទេសឲ្យចូលរួមចាត់វិធានការទប់ស្កាត់ជាបន្ទាន់។ តាមការគន់គូរ និងបើគ្មានវិធានការទប់ស្កាត់អ្វីទេ កំណើនវិសមភាពក្នុងសង្គមនឹងរឹតតែដុនដាបជាងនេះនៅក្នុងរង្វង់ឆ្នាំ ២០៥០។ របាយការណ៍បានព្រមានទុកជាមុនថា កំណើនវិសមភាពក្នុងសង្គមខ្លាំងអាចបង្កឲ្យមានអស្ថិរភាពនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ