តើលោកដូណាល់ ត្រាំ ជាប្រធានាធិបតីដែលស្អប់ខ្លាំង អ្នកកាន់សាសនាអ៊ីស្លាម?
ប្រធានាធិបតី អាមេរិក លោកដូណាល់ ត្រាំ នៅថ្ងៃពុធទី២៩វិច្ឆិកា បានបង្កឲ្យមានរលករិះគន់ ទាំងនៅអង់គ្លេស និងអាមេរិក បន្ទាប់ពី លោកបានបង្ហោះផ្សាយ តាមTwitter វីដេអូចំនួន ៣ ដែលមានលក្ខណៈប្រកាន់រើសអើង សាសនាអ៊ីស្លាម។ សម្រាប់រដ្ឋាភិបាលអង់គ្លេស លោកដូណាល់ ត្រាំ គិតខុស ដែលបានជំរុញ ផ្សព្វផ្សាយ សារស្អប់ខ្ពើមរបស់ក្រុមស្តាំនិយមជ្រុល អង់គ្លេស។
ចុះផ្សាយនៅថ្ងៃ៖
លោកដូណាល់ ត្រាំ បង្កសង្រ្គាមពាក្យសំដី ដោយមិនរើសមុខ មិនថា ជាមួយ មេដឹកនាំកូរ៉េខាងជើង ឬថ្នាក់ដឹកនាំរបស់ប្រទេសសម្ព័ន្ធមិត្តអាមេរិក។ នៅថ្ងៃពុធម្សិលមិញ នៅក្នុងបណ្តាញTwitter លោកបានសរសេរសារ ចំអក ឲ្យលោកស្រីនាយករដ្ឋមន្រ្តីអង់គ្លេស តេរ៉ាសា មេ ដែលបានរិះគន់លោក នៅក្នុងរឿងបង្ហោះផ្សាយ រូបវីដេអូ ទាក់ទងនឹងការរើសអើងអ្នកកាន់សាសនាអ៊ីស្លាម។
តាមរយៈអ្នកនាំពាក្យ លោកស្រីនាយករដ្ឋមន្រ្តីអង់គ្លេស បាននិយាយថា លោកដូណាល់ ត្រាំ ធ្វើខុស ដែលជំរុញលើកទឹកចិត្តគំនិតស្អប់រើងអើង របស់ក្រុមស្តាំនិយមជ្រុលអង់គ្លេស។ លោកដូណាល់ ត្រាំ ដែលជំនាញខាងបង្ហោះសារ Twitter បានសរសេរបកវិញថា ឲ្យលោកស្រីតេរ៉េសា មេ កុំគិតតែផ្តោតចាប់អារម្មណ៍លើលោក ប៉ុន្តែ គួរតែផ្តោតទៅលើការបំផ្លាញ ក្រុមភេរវនិយមអ៊ីស្លាមកំពុងកើតមាននៅក្នុងទឹកដីអង់គ្លេស។
នៅថ្ងៃពុធលោកដូណាល់ ត្រាំ បានបង្ហោះផ្សាយបន្ត រូបភាពវីដេអូចំនួន៣ ដែលមេដឹកនាំក្រុមស្តាំនិយមជ្រុលអង់គ្លេស Britain First បានបង្ហោះផ្សាយ នៅលើបណ្តាញសង្គម។ តាមក្រុមស្តាំនិយមជ្រុលអង់គ្លេស គេចង់បង្ហាញរូបវីដេអូ ដែលបង្ហាញ ពីក្រុមអ៊ីស្លាមវាយសម្លាប់យុវជនម្នាក់នៅអង់គ្លេស ដុតបំផ្លាញរូបសំណាកគ្រឹះស្តសាសនាជាដើម។ នៅខែវិច្ឆិកានេះ តុលាការអង់គ្លេសទើបតែបានថ្កោលទោស ពិន័យជាប្រាក់ មេដឹកនាំរបស់ក្រុមស្តាំនិយមជ្រុលអង់គ្លេស ក្នុងបទជេរប្រមាថធ្ងន់ធ្ងរ ស្រ្តីអ៊ីស្លាមម្នាក់ នៅប្រទេសអង់គ្លេស។ នៅថ្ងៃពុធ ថ្នាក់ដឹកនាំរបស់ក្រុមស្តាំនិយមជ្រុលអង់គ្លេសបានអបអរសារTwitter គាំទ្រ របស់ប្រធានាធិបតី អាមេរិក ដែលមានអ្នកតាមដាន ដល់ទៅ ៤៤លាននាក់ នៅក្នុងពិភពលោក។ នៅថ្ងៃពុធ ដោយបដិសេធមិននិយាយដល់ខ្លឹមសាររបស់វីដេអូ អ្នកនាំពាក្យរបស់សេតវិមានបានចេញមុខការពារជំហររបស់លោកដូណាល់ ត្រាំ ដោយថា វាគ្មានរឿងអ្វីដែលខុសទេ ដែល ប្រធានាធិបតីអាមេរិកបាននិយាយពីការគំរាមកំហែងដែលមានពិតៗនិង ពីសារៈសំខាន់នៃសន្តិសុខជាតិនោះ។
នៅពេលចូលកាន់តំណែងជាប្រធានាធិបតីភ្លាម លោកដូណាល់ ត្រាំ បានចេញក្រឹត្យ ហាមឃាត់មិនឲ្យប្រជាជនមកពីប្រទេសអ៊ីស្លាម ចំនួន៩ អាចចូលទឹកដី អាមេរិក។ ប្រជាជនអ៊ីស្លាមជាច្រើននាក់មិនអាចធ្វើដំណើរទៅទឹកដីអាមេរិក នោះបើទោះបីជាតុលាការអាមេរិកមួយចំនួននៅប្រឹងជំនះ មិនអនុវត្តតាមក្រឹត្យបញ្ជារបស់ប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ