ជំនួបលើកទី២រវាងលោកពូទីន និងលោកអាសាដដែលឥតមានប្រកាសជាមុន
លោក វ៉្លាឌីមៀរ ពូទីន បានទទួលជួប ល្ងាចថ្ងៃចន្ទម្សិលមិញ ជាមួយលោកប្រធានាធិបតីស៊ីរី បាស្ហារ អាល-អាសាដ នៅបុរី Sotchi ប៉ែកនិរតីប្រទេសរុស្ស៊ី កាលដែលនៅសល់ពីរថ្ងៃទៀតត្រូវប្រព្រឹត្តទៅ កិច្ចប្រជុំកំពូលត្រីភាគី រុស្ស៊ី-អ៊ីរ៉ង់-តួកគី ដើម្បីរកដំណោះស្រាយនយោបាយឲ្យ វិបត្តិនៅស៊ីរី។
ចុះផ្សាយនៅថ្ងៃ៖
ស្តាប់ - ០២:០៩
វិមានក្រេមឡាំង ព្រឹកថ្ងៃអង្គារនេះប្រកាសថា លោក វ៉្លាឌីមៀរ ពូទីន បានធ្វើកិច្ចចរចា ជាមួយ លោកប្រធានាធិបតីស៊ីរី បាស្ហារ អាល-អាសាដ ដែលបានអញ្ជើញមកដល់ប្រទេសរុស្ស៊ី ក្នុងក្របខ័ណ្ឌ ទស្សនកិច្ចការងារ។ ក្នុងជំនួបនេះ ដែលបានប្រព្រឹត្តទៅ នៅឯនិវេសនដ្ឋានប្រធានាធិបតីរុស្ស៊ី ជាយក្រុងរមណីយដ្ឋាន Sotchi មាត់សមុទ្រខ្មៅ ចៅហ្វាយក្រេមឡាំង បាន”អបអរសរសើរ” លោកប្រធានាធិបតីស៊ីរី ចំពោះលទ្ធផល របស់ គាត់ ក្នុងការប្រយុទ្ធទល់នឹង ពួកភេរវជន ដែលជិតៗធ្លាក់ក្នុងបរាជ័យ” ចៀសមិនផុត និង ជាស្ថាពរ “ ហើយ តាមយោបល់លោកពូទីន គឺត្រូវតែ ”ឆ្លងទៅកាន់អភិក្រមនយោបាយ”។
ថ្ងៃពុធស្អែក ក្នុងក្រុង Sotchi នេះ ប្រធានាធិបតីរុស្ស៊ី តួកគី និង អ៊ីរ៉ង់ នឹងបើកកិច្ចប្រជុំអន្តរជាតិ ឆ្ពោះទៅ ស្តារឡើងវិញ អភិក្រមរៀបរយសន្តិភាពក្នុងប្រទេសស៊ីរី នៅគ្រាបច្ចុប្បន្ន កាលដែលកងទ័ពលោក បាស្ហារ អាល-អាសាដ មានប្រៀបជាង ពួកឧទ្ទាមនិងក្រុមភេរវជននៃអង្គការ”រដ្ឋអ៊ីស្លាម”។
តាមលោកពូទីន ជំនួបជាមួយលោកប្រធានាធិបតីស៊ីរី តាំងគោលដៅពិភាក្សាជាបឋម អំពី” ដំណោះស្រាយ នយោបាយដោយសន្តិវិធីសម្រាប់អំឡុងពេលវែងឆ្ងាយ” ក្នុងប្រទេសស៊ីរី ជាទី ដែលតាមតួលេខអ.ស.ប. ក្នុង សង្គ្រាម ៦ ឆ្នាំ កន្លងទៅ មានអ្នកស្រុកធ្លាក់ខ្លួនស្លាប់អស់ជាង ៣សែន៣ម៉ឺននាក់ ហើយ រាប់លាននាក់ ក្លាយ ទៅជាជនភៀសខ្លួន។
លោកប្រមុខរដ្ឋរុស្ស៊ី ក៏បានជម្រាប សមភាគីស៊ីរី ថា ក្នុងថ្ងៃអង្គារនេះ គាត់នឹងសន្ទនាតាមទូរសព្ទ ជាមួយ លោក ប្រធានាធិបតីអាមេរិកាំង ដូណាល់ ត្រាំ ដើម្បី” ពិគ្រោះគ្នា “ អំពីស្ថានការណ៍នៅស៊ីរី គ្រាន់នឹងច្រាន អភិក្រមនយោបាយ ឲ្យបានទៅមុខ។ លោក បាស្ហារ អាល-អាសាដ ពីចំណែកគាត់ គាត់គូសបញ្ជាក់ថា យើងគ្មានចេតនា មើលទៅក្រោយ ឡើយ ហើយយើងត្រៀមសន្ទនា ជាមួយរាល់នរណា ដែលប្រាថ្នា ធ្វើ ដំណោះស្រាយនយោបាយមែនពិត។
គាត់បានសំដែងទៅកាន់លោកពូទីន នូវ “អំណរគុណពីសំណាក់ប្រជាជនស៊ីរី” ចំពោះជំនួយរបស់រដ្ឋរុស្ស៊ីក្នុង បុព្វហេតុការពារ” បូរណភាពដែនដី និង ឯករាជ្យ “ ប្រទេសស៊ីរី។ ជាការកត់សម្គាល់ លើកមុន លោកប្រធានាធិបតី បាស្ហារ អាល-អាសាដ បានធ្វើទស្សនកិច្ចការងារ នៅ មូស្គូ គឺ ថ្ងៃ ២០តុលាឆ្នាំ ២០១៥ ឬ៣ សប្តាហ៍ក្រោយពី រុស្ស៊ី បានចាប់ផ្តើម អន្តរាគមន៍យោធា នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ