ក្រោមការដឹកនាំរបស់លោកដូណាល់ ត្រាំ អូតង់ពិបាកនឹងការពារខ្លួន ប្រឈមនឹងរុស្ស៊ី
“អាមេរិកាំងដំបូងគេ” នយោបាយរួញខ្លួន របស់លោកប្រធានាធិបតីអាមេរិក ដូណាល់ ត្រាំ មិនត្រឹមតែប៉ះពាល់ដល់ចរន្តសេដ្ឋកិច្ចពិភពលោក តែប៉ុណ្ណោះទេ វាជះផលអាក្រក់ផងដែរដល់ភូមិសាស្រ្តនយោបាយ មិនថា នៅ អាស៊ី ឬនៅអឺរ៉ុប។ នៅអឺរ៉ុប កម្លាំងទ័ពអូតង់មានឧបករណ៍ការពារខ្លួនកាន់តែស្តួចស្តើង ចាប់តាំងពីលោកដូណាល់ ត្រាំ ចូលកាន់តំណែងជាប្រធានាធិបតីអាមេរិក។ នេះបើតាមការវាយតម្លៃរបស់វិទ្យាស្ថានកិច្ចការអន្តរជាតិ ដែលមានទីតាំងក្នុងប្រទេសហូឡង់។
ចុះផ្សាយនៅថ្ងៃ៖ កែប្រែថ្ងៃទី៖
ចាប់តាំងពីលោកដូណាល់ ត្រាំ បានចូលកាន់តំណែងជាប្រធានាធិបតីអាមេរិក សម្ព័ន្ធអាត្លង់ទិក អូតង់ មានបំពាក់ឧបករណ៍កាន់តែតិច គឺមិនអាចគ្រប់គ្រាន់ ដើម្បីការពារ ប្រទេសសមាជិក នៅក្នុងករណីមានការរំលោភបំពានពីខាងក្រៅនោះទេ។ នេះជាការវាយតម្លៃរបស់វិទ្យាស្ថានកិច្ចការអន្តរជាតិ ដែលតែងដើរតួជាទីប្រឹក្សាយោបល់ ដល់រដ្ឋាភិបាលប្រទេសហូឡង់ (សមាជិកមួយរបស់អូតង់)។
នៅក្នុងរបាយការណ៍របស់ខ្លួន ដែលមានឈ្មោះថា អនាគតអូតង់ និងសន្តិសុខនៅអឺរ៉ុប វិទ្យាស្ថាន កិច្ចការអន្តរជាតិ ដែលមានទីតាំងនៅទីក្រុងឡាអេ បានព្រមានថា គោលនយោបាយមិនច្បាស់លាស់ របស់លោកដូណាល់ ត្រាំ កំពុងធ្វើឲ្យគេបារម្ភពីភាពរួបរួមគ្នា ក្នុងចំណោមប្រទេសសមាជិកអូតង់។
បង្កើតឡើងនៅឆ្នាំ ១៩៤៩ នៅក្រោយសង្រ្គាមលោកលើកទី២ អង្គការអូតង់ បានទទួលការគាំទ្រ ទាំងនយោបាយ និងយោធាដ៏សំខាន់ពីសហរដ្ឋអាមេរិក។ ប៉ុន្តែ ចាប់តាំងពី លោកដូណាល់ ត្រាំ ក្លាយជាប្រធានាធិបតីអាមេរិក គេសំគាល់ឃើញមានការខ្វះខាតក្នុងភាពដឹកនាំរបស់អាមេរិក នៅអូតង់។ ការណ៍នេះ នឹងធ្វើឲ្យរុស្ស៊ី កេងយកចំណេញ ជាប្រាកដ។ នៅក្នុងកែវភ្នែករបស់ប្រទេសនៅអឺរ៉ុប រុស្ស៊ី ដែលកាត់យកទឹកដីគ្រីមេ របស់អ៊ុយក្រែន នៅឆ្នាំ ២០១៤ បានធ្វើសកម្មភាពយ៉ាងចេញមុខ ដើម្បីបង្កអស្ថិរភាព។ ក្រៅតែពីរុស្ស៊ី អឺរ៉ុបក៏កំពុងរងការគំរាមកំហែងផងដែរ ដោយសារបញ្ហាអស្ថិរភាព និងអសន្តិសុខនៅតំបន់ដើមបូព៌ា។
នៅក្នុងរបាយការណ៍ របស់ខ្លួន ចេញផ្សាយនៅថ្ងៃសុក្រម្សិលមិញ អ្នកជំនាញហូឡង់បាន អំពាវនាវផងដែរ ឲ្យអូតង់ពង្រាយ ទ័ពចល័ត ឲ្យបានច្រើន នៅក្នុងបណ្តាប្រទេសនៅអឺរ៉ុបខាងកើត ដែលនៅជាប់ព្រំដែនរុស្ស៊ី ដូចជាប៉ូឡូញ និងបណ្តាប្រទេសសមុទ្របាល់ទិក ព្រោះប្រទេសទាំងនោះ នៅមិនទាន់ត្រូវបានការពារម៉ត់ចត់នោះទេ។ រុស្ស៊ី នឹងអាចឆ្លៀតឱកាសនេះ ដើម្បី រំលោភ និងលេបយកទឹកដី ដូចដែលរុស្ស៊ី បានធ្វើទៅលើប្រទេសអ៊ុយក្រែន។
អង្គការអូតង់បានបដិសេធមិនទទួលស្គាល់ការលើកឡើងរបស់វិទ្យាស្ថានទីប្រឹក្សាយោបល់របស់ប្រទេសហូឡង់។ តាមអ្នកនាំពាក្យរបស់អង្គការអូតង់ ដែលបានឆ្លើយទៅនឹងសំណួររបស់អ្នកកាសែត AFP ការចូលរួមរបស់សហរដ្ឋអាមេរិក ក្នុងបេសសកម្មរបស់អូតង់ គឺច្រើនលើសពីការសង្ស័យ។ ម្យ៉ាងទៀត អូតង់ជាសម្ព័ន្ធកងទ័ពដ៏ខ្លាំងជាងគេបំផុត ក្នុងពិភពលោក មានទ័ពប្រុសស្រី ២លាន ៥សែននាក់ ដែល អាចការពារសន្តិសុខ ឲ្យរាល់ប្រទេសសមាជិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ