កាតាឡូញ៉ាព្រមចរចាជាមួយអេស្ប៉ាញ តែក្នុងករណីនិយាយអំពីឯករាជភាពតំបន់
ភាពមិនជាក់លាក់បន្តគ្របបណ្តប់តំបន់កាតាឡូញ៉ា ជាថ្មី ! បន្ទាប់ពីបានទុកពេល បង្ហើបផ្លូវចង់ស្វែងរកដំណោះស្រាយដោយសន្តិវិធី នៅថ្ងៃសៅរ៍នេះ បុរសខ្លាំងទីពីររបស់តំបន់កាតាឡូញ៉ា បានប្រកាសព្រមាន ថា ការចរចាជាមួយរដ្ឋាភិបាលក្រុងម៉ាឌ្រីដ អាចប្រព្រឹត្តទៅបាន ដរាបតែខ្លឹមសារនៃការកិច្ចចរចានោះ ផ្តោតតែលើឯករាជភាពតំបន់តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ប្រមុខដឹកនាំរដ្ឋាភិបាលកាតាឡូញ៉ា ត្រូវបញ្ជាក់ជំហររបស់ខ្លួនជាថ្មីស្តីអំពីឯករាជ្យតំបន់កាតាឡូញ៉ា នៅថ្ងៃចន្ទ វេលាម៉ោង១០ព្រឹកឯណោះទេ ! តែនៅថ្ងៃសៅរ៍នេះ នៅក្នុងសុន្ទរកថារបស់ប្រធានបក្សសាធារណរដ្ឋឆ្វេងនិយម បុរសខ្លាំងទីពីររបស់កាតាឡូញ៉ា លោកOriol Junquerasបានប្រកាសយ៉ាងក្តែងៗថា សំណើសុំចរចារបស់ម៉ាឌ្រីដ និងកាតាឡូញ៉ា ត្រូវផ្តោចលើការស្ថាបនាសាធារណរដ្ឋ និងឯករាជ្យឱ្យតំបន់កាតាឡូញ៉ា !
កាតាឡូញ៉ាឯករាជ្យជាច្រកចេញតែមួយគត់ ! ហើយដើម្បីបានក្លាយជាសាធារណរដ្ឋមួយ និងមានឯករាជ្យបាន កាតាឡូញ៉ា ត្រូវចរចាជាមួយគ្រប់គ្នា ឬយ៉ាងហោចណាស់ជាមួយសហគមន៍អន្តរជាតិដែរ។ ម្យ៉ាងវិញទៀត គេមិនអាចបំពេញសេចក្តីសម្រេចថ្ងៃទី ១តុលាបានឡើយ ! នេះបើតាមសំដីរបស់លោកOriol Junquerasដដែល។
ក្រុមអ្នកផ្តាច់ទឹកដីនិយមកាតាឡូញ៉ា បានយកលទ្ធផលប្រជាមតិខុសច្បាប់ កាលពីថ្ងៃទី១តុលា ដែលមានប្រជាពលរដ្ឋប្រមាណតែ៤៣%បានចូលរួមបោះឆ្នោត និងជាលទ្ធផល ៩០%ព្រមចង់បានឯករាជ្យ មកធ្វើជាបង្អែកសម្រាប់ទាមទារផ្តាច់ខ្លួនពីអេស្ប៉ាញ។
សូមបញ្ជាក់ថា កាលពីថ្ងៃអង្គារ ប្រមុខតំបន់កាតាឡូញ៉ា លោក Puigdemont បានទាមទារសុំមានអន្តរការីអន្តរជាតិ ក្នុងការចរចាជាមួយរដ្ឋាភិបាលអេស្ប៉ាញ ប៉ុន្តែមិនបានបញ្ជាក់អំពី លក្ខខណ្ឌអ្វីទាំងអស់។ ចំណែកខាងម៉ាឌ្រីដ ជំហរនៅនឹងដដែល គឺរដ្ឋាភិបាលរបស់លោកនាយករដ្ឋមន្ត្រី ច្រានចោលទាំងស្រុងសំណើចរចា ដោយអំពាវនាវឱ្យក្រុមអ្នកផ្តាច់ទឹកដីនិយម ត្រលប់ក្រោយវិញ និងធ្វើខ្លួនឱ្យស្របច្បាប់។ រដ្ឋាភិបាលក្រុងម៉ាឌ្រីដ បដិសេធមិនទទួលអន្តរការីអន្តរជាតិ ហើយទុកពេលឱ្យប្រមុខដឹកនាំតំបន់កាតាឡូញ៉ា បញ្ជាក់ជំហរច្បាស់លាស់ជាថ្មី នៅថ្ងៃចន្ទខាងមុខ ហើយប្រសិនមេដឹកនាំកាតាឡូញ៉ា នៅតែចចេសប្រកាសឯករាជ្យជាអនោម័ត រដ្ឋាភិបាលអេស្ប៉ាញទុកពេលឱ្យ ដល់ថ្ងៃព្រហស្បតិ៍ទី ២១តុលា មុនផ្តើមអនុវត្តតាមមាត្រ១៥៥នៃរដ្ឋធម្មនុញ្ញ ពោលគឺដកស្វ័យភាពតំបន់កាតាឡូញ៉ា ទុកភារៈគ្រប់គ្រងតំបន់ទៅឱ្យរដ្ឋាភិបាលវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ