អាល្លឺម៉ង់កំរិតការទទួលជនភៀសខ្លួន តែអឺរ៉ុបនៅតែយល់ថាល្អ
អាល្លឺម៉ង់នឹងទទួលយកជនភៀសខ្លួនឱ្យជ្រកកោនក្នុងទឹកដីខ្លួន ចំនួន ២០ម៉ឺននាក់ ក្នុងមួយឆ្នាំ។ គណៈកម្មការអឺរ៉ុបបានសម្តែងការអបអរ ចាត់ទុកសេចក្តីសម្រេចរបស់អាល្លឺម៉ង់ថា ជាទស្សនៈវិស័យវិជ្ជមាន ប៉ុន្តែអឺរ៉ុបមិនធ្វើអត្ថាធិប្បាយអ្វីទាំងអស់ថាតើកំណត់តួលេខទទួលជនភៀសខ្លួន ដើម្បីដំណោះស្រាយនយោបាយផ្ទៃក្នុងប្រទេស ជាទង្វើសមស្របឬយ៉ាងណានោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ការកំណត់ចំនួនទទួលជនភៀសខ្លួន ត្រឹម២០ម៉ឺននាក់ក្នុងមួយឆ្នាំ គឺជាលទ្ធផលនៃកិច្ចព្រមព្រៀងរវាងគណបក្សអភិរក្សនិយមរបស់លោកស្រី អង់ហ្គឺឡា មែរកិល និងសម្ព័ន្ធមិត្ត អ្នកបរិស្ថាន និងសេរីនិយម ដែលត្រូវមកចាប់ដៃបង្កើតរដ្ឋាភិបាលចម្រុះរួមគ្នា។
ក៏ប៉ុន្តែនេះជាទស្សនៈវិស័យដ៏ល្អ ! សម្រាប់គណៈកម្មការអឺរ៉ុប អាល្លឺម៉ង់បានផ្តល់សញ្ញាដ៏វិជ្ជមានបំផុត ព្រោះប្រទេសនេះបានទទួលជនភៀសខ្លួនជាងមួយ១លាននាក់ស្រាប់ទៅហើយ ហើយបានបង្ហាញជំហរបន្តទទួលជនភៀសខ្លួន ២០ម៉ឺននាក់បន្ថែមទៀត ជារៀងរាល់ឆ្នាំ។ តើមិនឱ្យសរសើរម្តេចបាន ?! នេះជាចម្លើយរបស់អ្នកនាំពាក្យសហភាពអឺរ៉ុប ដែលបដិសេធ មិនធ្វើអត្ថាធិប្បាយទេ ជុំវិញ ភាពស្របច្បាប់នៃការកំណត់បរិមាណទទួលជនភៀសខ្លួនរបស់អាល្លឺម៉ង់នេះ។
សម្រាប់គណៈកម្មការអឺរ៉ុប តួលេខនេះ មិនមែនទាន់ជាសេចក្តីសម្រេចរបស់រដ្ឋាភិបាលទេ ! វាគ្រាន់តែជាកិច្ចព្រមព្រៀងនយោបាយ ឆ្ពោះទៅរកការបង្កើតរដ្ឋាភិបាលប៉ុណ្ណោះ។ ដូច្នេះគេមិនអាចបរិយាយអ្វីឱ្យបានច្រើនជាងនេះឡើយ។ តាំងពីដើមមកអាល្លឺម៉ង់តែងតែដើរតួនាទីជួរមុខក្នុងចំណាត់ការលើវិបត្តិជនភៀសខ្លួន និងក្នុងការស្វែងរកដំណោះស្រាយអឺរ៉ុបរួមស្តីពីបញ្ហាជនអន្តោប្រវេសន៍។
សូមបញ្ជាក់ថា ពីរសប្តាហ៍ក្រោយជោគជ័យដ៏ប្រផុតប្រផើយ របស់បក្សគ្រិស្តសាសនាប្រជាធិបតេយ្យ លោកស្រីមែរកិល អាចបន្តតំណែងជាប្រមុខរដ្ឋាភិបាលគម្រប់អាណត្តិទីបួន ប៉ុន្តែត្រូវការចរចាជាមួយបក្សពីរផ្សេងទៀត ដើម្បីបង្កើតរដ្ឋាភិបាលចម្រុះ។ បក្សសេរីនិយម និងអ្នកបរិស្ថានតែងតែបរិហារតាំងពីជាងពីរឆ្នាំមកហើយនយោបាយទទួលជនភៀសខ្លួន និងបានយកបញ្ហានេះមកធ្វើជាលក្ខខណ្ឌស្នូលនៃការចរចាបង្កើតរដ្ឋាភិបាលថ្មី។
ថ្វីបើលោកស្រី មែរកិលសុខចិត្តកំណត់បរិមាណទទួលជនភៀសខ្លួនមែន តែជំហរដាច់ខាតការពារជនភៀសខ្លួននៅតែត្រូវបានរក្សា ដោយសភាអាចប្តូរផ្លាស់បានទៅតាមសភាពការណ៍ជាក់ស្តែង និងគ្មានទេការបញ្ជូនទៅព្រំដែន។ គ្រប់ជនភៀសខ្លួនសុទ្ធតែមានលទ្ធភាពសុំសិទ្ធិជ្រកកោន ហើយជាសិទ្ធិដែលកំណត់ដោយរដ្ឋធម្មនុញ្ញ និងគ្មានកំណត់ចំនួនទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ