ម៉ូស្គូ ប្រាថ្នាមានទំនាក់ទំនងល្អជាមួយក្រុងវ៉ាស៊ីនតោន
កម្រិតបច្ចុប្បន្ននៃទំនាក់ទំនងរវាងសហព័ន្ធរុស្ស៊ីនិងសហរដ្ឋអាមេរិក“ មិនអាចនាំឲ្យយើងសោមនស្សឡើយ”-សេចក្តីនេះថ្លែងថ្ងៃអង្គាទី៣តុលា ដោយលោកប្រធានាធិបតីរុស្ស៊ី វ៉្លាឌីមៀរ ពូទីនក្នុងពិធីទទួលសារតាំងពីឯកអគ្គរដ្ឋទូតអាមេរិកាំងថ្មីលោក Jon Huntsman ដោយអំពាវនាវឲ្យប្រទេសទាំងពីរសហការគ្នា “ កុំលូកដៃជ្រៀតជ្រែកចូលកិច្ចការផ្ទៃក្នុងរបស់ម្ខាងៗ”។
ចុះផ្សាយនៅថ្ងៃ៖
ស្តាប់ - ០២:៣២
លោកប្រធានាធិបតីរុស្ស៊ី វ៉្លាឌីមៀរ ពូទីន ថ្ងៃទី៣តុលា បានទទួលនៅវិមានក្រេមឡាំង សារតាំងពីឯកអគ្គរដ្ឋទូតថ្មីនៃ២០ប្រទេស ក្នុងនោះមានទាំងឯកអគ្គរដ្ឋទូតថ្មីសរអា។ ក្នុងវគ្គនៃសុន្ទរកថាគាត់ដែលប៉ះលើ សរអា ប្រមុខរដ្ឋរុស្ស៊ី លើកឡើងដូចតទៅ ៖ បើនិយាយអំពីទំនាក់ទំនងទ្វេភាគីរុស្ស៊ី-អាមេរិក នោះបច្ចុប្បន្ន គឺវាស្ថិតក្នុងកម្រិតដែលមិនអាចនាំឲ្យយើងសោមនស្សឡើយ។ តាមជំនឿជឿជាក់របស់ខ្ញុំ សហប្រតិបត្តិការ រវាងក្រុងម៉ូស្គូនិងវ៉ាស៊ីនតោន “ ត្រូវតែស្ថាបនា ដោយឈរលើគោលការណ៍ ស្មើភាព គោរពគ្នាទៅវិញទៅមក ដើម្បីផលប្រយោជន៍ជាតិរៀងៗខ្លួននិងដោយគ្មានការជ្រៀតជ្រែកចូលកិច្ចការផ្ទៃក្នុងម្ខាងៗ។
ជាការកត់សម្គាល់ ទំនាក់ទំនងរវាងសរអានិងរុស្ស៊ី បន្តស្ថិតនៅក្នុងកម្រិតទាបបំផុត តាំងពីលោក ដូណាល់ ត្រាំ បានជាប់ឆ្នោតជាប្រធានាធិបតីសរអា ក្នុងផ្ទៃនៃវិបត្តិនៅអ៊ុយក្រែន នៃសង្គ្រាមនៅស៊ីរី នៃការចោទរុស្ស៊ី ថា បានលូកដៃចូលក្នុងការបោះឆ្នោតប្រធានាធិបតីអាមេរិកាំង។
ក្នុងឋានៈជាអ្នកជំនួញនិងអ្នកការទូតមានពិសោធន៍ លោក Huntsman អាយុ ៥៧ឆ្នាំ ធ្លាប់បានធ្វើជា ឯកអគ្គរដ្ឋទូតអាមេរិកាំងនៅប្រទេសចិន សម័យលោក បារ៉ាក់ អូបាម៉ា ខាងបក្សប្រជាធិបតេយ្យ ធ្វើជាប្រធានាធិបតីសរអា។
មុនពិធីទទួលសារតាំងនោះ អ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ បានសំដែងក្តីប្រាថ្នារបស់រុស្ស៊ី មានទំនាក់ទំនងល្អប្រសើរជាមួយក្រុងវ៉ាស៊ីនតោន ទាំងលំអិតថា “ បំណងបែបនេះ មិនអាចសម្រេចឡើយ បើគ្មានដៃគូ” ដែលប្រាថ្នាយ៉ាងនេះដែរ។ តាមសំដីលោក ពេស្កវ ៖ ម៉ូស្គូសង្ឃឹមថា ការអញ្ជើញមកដល់នៃ ឯកអគ្គរដ្ឋទូតថ្មីអាមេរិកាំង មុខជានឹងរួមវិភាគទានទៅក្នុងការស្តារឡើងវិញទំនាក់ទំនងទ្វេភាគី។
ប៉ុន្មានខែចុងក្រោយ រុស្ស៊ីនិងអាមេរិក បានធ្លាក់ខ្លួនក្នុងវិវាទការទូតគឺ៖ក្រោយពីវ៉ាស៊ីនតោន បានរឹបអូសយកអគារទូតនានារបស់រុស្ស៊ី ម៉ូស្គូ បានឆ្លើយទៅវិញ ដោយតម្រូវឲ្យសរអាកាត់បន្ថយយ៉ាងច្រើនតែម្តងចំនួនអ្នកការទូតនិងបុគ្គលិកបច្ចេកទេសអាមេរិកាំងរួចមក សរអាបានបិទស្ថានអគ្គកុងស៊ុលរុស្ស៊ីនៅក្រុង San Francisco ទាំងប្រព្រឹត្តទង្វើស្រេចតែក្បាលចិត្តក្នុងអគារទូតនោះរបស់រុស្ស៊ី។ ម៉្លោះហើយបានជាថ្ងៃចន្ទកន្លងទៅក្រសួងការបរទេសរុស្ស៊ី បានចោទពួកមន្ត្រីអាមេរិកាំងថាចេះតែលុកចូលទាំងខុសច្បាប់ទៅក្នុងដែនដីនៃស្ថានកុងស៊ុលនោះ បន្ទាប់ពីក្នុងខែមុនបុគ្គលិកការទូតរុស្ស៊ីបានបង្ខំចិត្តចាកចេញទៅតាមបទបញ្ជាពីក្រុងវ៉ាស៊ីនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ