នៅបារាំង ស្រ្តី២ នាក់បានស្លាប់នៅក្នុងការវាយប្រហារមួយដោយប្រើកំាបិតចាក់សម្លាប់នៅ Marseille
នៅប្រទេសបារាំង ស្ត្រី ២ រូប បានរងគ្រោះដល់បាត់បង់ជីវិតនៅក្នុងការវាយប្រហាររបស់ជនឈ្លានពានម្នាក់ដែលប្រើកាំបិតចាក់សម្លាប់កាលពីថ្ងៃអាទិត្យទី ១ តុលាម្សិលមិញនៅវេលាម៉ោង១៣. ៤៥នាទីម៉ោងនៅប្រទេសបារាំងមុននឹងត្រូវកងយោធារក្សាការពារសន្តិសុខឈ្មោះ “ប្រតិបត្តិការ Sentinelle” បាញ់សម្លាប់។ ហេតុការណ៍នេះ បានកើតឡើងនៅពីមុខទីលានអយស្ម័យាន្ត Saint-Charles នៅ Marseille ដែលស្ថិតនៅប៉ែកអាគ្នេយ៍នៃប្រទេសបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
យោងតាមការថ្លែងរបស់ប្រមុខនគរបាលនៅ Marseille យុវនារីរងគ្រោះទាំងពីររូប ត្រូវស្លាប់ដោយសារការចាក់នឹងកាំបិត។ នារីរងគ្រោះទីមួយ បានស្លាប់ភ្លាមៗនៅលើកន្លែងដោយសារការអារក ចំណែកនារីរងគ្រោះទីពីរ ត្រូវខ្មាំងចាក់ដើមទ្រូងនឹងពោះ ដែលបន្តិចក្រោយមកបានស្លាប់ដោយសារមុខរបួសធ្ងន់ធ្ងរ។ សូមបញ្ជាក់ថា ជនរងគ្រោះទាំងពីររូប មានអាយុជាង២០ឆ្នាំ។
យោងតាមប្រភពជិតដិតមួយនៃការស៊ើបអង្កេត ជនឈ្លានពាន មានអាយុប្រមាណពី២៥ទៅ៣០ ឆ្នាំនិងបានធ្វើសកម្មភាពនេះដោយម្នាក់ឯងគត់ និងបានស្រែកជាពាក្យពេជន៍ថា « Allahou Akbar" មុននឹងត្រូវកងយោធារក្សាសន្តិសុខឈ្មោះប្រតិបត្តិការណ៍ Sentinelle បាញ់សម្លាប់នៅលើកន្លែងម្តុំជុំវិញអយស្ម័យាន្ត។ កាំបិតរបស់ជនឈ្លានពាន ត្រូវបានគេរកឃើញចំនួន ២ កាំបិត មួយរកឃើញនៅលើកន្លែងឃាតកម្មនិងមួយទៀត ទុកចោលនៅឆ្ងាយពីកន្លែងកើតហេតុណ៍។
ភ្លាមៗនោះ ក្រុមអង្គការរដ្ឋអ៊ីស្លាមជីហាត បានប្រកាសភ្លាមៗដែរថា”អំពើឃាតកម្មនៅ Marseille នោះ គឺជាស្នាដៃរបស់ក្រុមខ្លួន។ ដោយសារតែនៅលើខ្លួនជនឈ្លានពានពុំឃើញមានអត្តសញ្ញាប័ណនោះ នគបាលបារាំង បានផ្តិតយកស្នាមម្រាមដៃរបស់ជននេះ ដើម្បីយកទៅប្រៀបធៀបនៅលើឯកសារជាតិទៀត។ ម្យ៉ាងទៀត ឈ្មោះជននេះក៏ពុំមានស្ថិតនៅក្នុងបញ្ជឺនៃក្រសួងប្រយុទ្ធប្រឆាំងនឹងភេរវនិយមឬក៏មួយក៏នៅក្នុងឯកសារនៃក្រសួងស៊ើបការបារាំងដែរ។
ក៏ប៉ុន្តែ ជននេះ ត្រូវបានក្រសួងនគបាល ស្គាល់មុខពីបទប្រព្រឹត្តបទល្មើសតួចតាច។
ម្សិលមិញរដ្ឋមន្ត្រីក្រសួងមហាផ្ទៃបារាំងលោក Gérard Collomb ដែលបានអញ្ជើញទៅដល់កន្លែងកើតហេតុណ៍ក្រោយពីអំពើភេរវកម្មនេះភ្លាម បានថ្លែងនៅពីមុខក្រុមសារព័ត៌មាននៅវេលាម៉ោង ១៩ យប់ ដោយបានសារភាពថា"សកម្មភាពខាងលើនេះ អាច ជាអំពើភេរវនិយម ក៏ប៉ុន្តែនៅខណៈនេះ គេនៅពុំទាន់អាចបញ្ជាក់ថាជាការពិតបាននៅឡើយទេ។
ទន្ទឹមនេះដែរ ការស៊ើបអង្កេតលើអំពើឃាតកម្មនេះ ត្រូវបានប្រគល់អោយដល់រដ្ឋអាជ្ញាទីក្រុងប៉ារីស បន្ថែមពីលើការស៊ើបអង្កេតរបស់រដ្ឋអាជ្ញានៅ Marseille ដើម្បីបើកការអង្កេតស្រាវជ្រាវ រកកាពិតឲ្យបានជាក់ច្បាស់នៅលើអំពើឃាតកម្មនៅ Marseille កាលពីម្សិលមិញនេះ ថាតើវាមានទំនាក់ទំនងជាមួយនឹងបណ្តាញភេរវនិយមដែរឬទេ ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ