ប្រធានាធិបតីបារាំងបង្ហាញផែនការកសាងអឺរ៉ុបអោយរឹងមាំឡើងវិញ
ថ្ងៃអង្គារនេះ ប្រធានាធិបតីបារាំង លោកអេម៉ានុយអែល ម៉ាក្រុង បានបង្ហាញផែនការមួយចំនួនក្នុងទិសដៅកសាងអឺរ៉ុបឡើងវិញ។ បារាំងខំបង្ហាញផែនការកសាងអឺរ៉ុបយ៉ាងផុសផុល ក្នុងបរិបទដែលប្រមុខដឺកនាំអាល្លឺម៉ង់មែរគែល ដែលជាអ្នកការពារអឺរ៉ុបពេញទីដែរនោះ បានជាប់ឆ្នោតអាណត្តិទី៤ ប៉ុន្តែ បក្សលោកស្រីទទួលបានសម្លេងទាបក្នុងសភា។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងផែនការកសាងអឺរ៉ុបអោយរឺងមាំឡើងវិញ ដែលប្រធានាធិបតីបារាំង ម៉ាក្រុង លើកបង្ហាញនៅថ្ងៃអង្គារនេះ គេឃើញថា បារាំងផ្តោតទិសដៅចំបងលើវិស័យការពារជាតិ ការពារបូរណភាពអឺរ៉ុប។ លោកអេម៉ានុយអែល ម៉ាក្រុង ចង់អោយអឺរ៉ុបមានសមត្ថភាពធ្វើសកម្មភាពរួមគ្នាការពារខ្លួន បំពេញគ្នាជាមួយកងកម្លាំងអង្គការអូតង់។ លោកម៉ាក្រុងគាំទ្រអោយមានប៉ូលិសការពារព្រំដែនអឺរ៉ុបផងដែរ។ បារាំងយល់ថា ចំណុចខ្សោយរបស់អឺរ៉ុបគឺនៅត្រង់ផ្នែកការពារនេះឯង។
ទន្ទឺមនេះដែរ លោកម៉ាក្រុងក៏ចង់អោយកងទ័ពការពារជាតិសហភាពអឺរ៉ុប អាចទទួលយកកងទ័ពមកពីប្រទេសផ្សេងទៀត នៅទ្វីបអឺរ៉ុបដែរ ក្នុងពេលអនាគត។ ប្រធានាធិបតីបារាំងចង់អោយមូលនិធិការពារជាតិអឺរ៉ុបដែលអនុម័តកាលពីខែមិថុនា អាចលេចរូបរាងដំណើរការបានឆាប់ៗ។ លោកម៉ាក្រុងគាំទ្រអោយប្រទេសអឺរ៉ុបពង្រឹងទំនាក់ទំនងគ្នា តាមរយៈការបណ្តុះបណ្តាលផ្សេងៗ ដើម្បីបន្តកំចាត់ភេរវកម្ម។
ទាក់ទងវិបត្តិអន្តោប្រវេសន៍ បញ្ហាជនភៀសខ្លួនមកពីបណ្តាប្រទេសអាហ្វ្រិក ដូចជាលីប៊ីនោះ លោកម៉ាក្រុងចង់អោយអឺរ៉ុបឈប់ចាត់ទុកអាហ្វ្រិកថា ជាការគំរាមកំហែងតទៅទៀត។ អឺរ៉ុបត្រូវសហការជាមួយអាហ្វ្រិក ក្នុងផ្នែកវិនិយោគ សុខភាព រឺក៏អប់រំ ដើម្បីដោះស្រាយបញ្ហា។
សន្ទរកថារបស់លោកម៉ាក្រុងធ្វើឡើង ក្នុងពេលដែលអាល្លឺម៉ង់ទើបនឹងបញ្ចប់ការបោះឆ្នោតសភា ផ្តល់ជោគជ័យអោយលោកស្រីមែរគែល ជាប់ឆ្នោតអាណត្តិទី៤។ លោកស្រីមែរគែល ជាអ្នកការពារអឺរ៉ុបពេញទី គាំទ្រជួយទទួលជនភៀសខ្លួននៅអឺរ៉ុប។ ក្នុងការបោះឆ្នោតសភាអាល្លឺម៉ង់លើកនេះ បក្សលោកស្រីមែរគែលឈ្នះឆ្នោតមែន តែមិនបានទទួលសម្លេងច្រើនទេ គឺត្រូវរកបក្សផ្សេង២ទៀតមករួមបង្កើតរដ្ឋាភិបាលចម្រុះ។ ជាការភ្ញាក់ផ្អើលបក្សស្តាំជ្រុលអាល្លឺម៉ង់ ជាលើកដំបូងបានទទួលកៅអីក្នុងសភានឹងគេដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ