ក្រុមប្រឹក្សាសិទ្ធិមនុស្សអន្តរជាតិបរិហារ ២៩ប្រទេសពីបទធ្វើទុក្ខបុកម្នេញលើសកម្មជនសិទ្ធិមនុស្ស
នៅថ្ងៃពុធ ទី២០ កញ្ញា ក្រុមប្រឹក្សាសិទ្ធិមនុស្សរបស់អង្គការសហប្រជាជាតិដែលមានទីស្នាក់ការក្នុងទីក្រុងហ្សឺណែវ ប្រទេសស្វ៊ីសបានចេញផ្សាយរបាយការណ៍មួយដោយធ្វើការរិះគន់ បរិហារលើ២៩ ប្រទេសពីបទបានធ្វើទុក្ខបុកម្នេញលើសកម្មជនសិទ្ធិមនុស្ស។ នៅក្នុងរបាយការណ៍ដដែល ស្ថានប័នសិទ្ធិមនុស្សរបស់អង្គការសហប្រជាជាតិបានសម្គាល់ឃើញពីការកើនឡើងជាលំដាប់នៃចំនួនប្រទេសដែលវាយធ្វើបាបលើសកម្មជនសិទ្ធិមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
២៩ប្រទេសដែលស្ថិតក្នុងរបាយការណ៍របស់ក្រុមប្រឹក្សាសិទ្ធិមនុស្សអង្គការសហប្រជាជាតិមាន ប៊ូរុនឌី អេហ្ស៊ីប រវ៉ាន់ដា គុយបា វ៉េណេស៊ុយអេឡា អារ៉ាប៊ីសាអូឌីត អេមីរ៉ាតអារ៉ាប់រួម អាល់ហ្សេរី បារ៉ែន អេរីត្រេ ហុងឌូរ៉ាស អ៊ីរ៉ង់ អ៊ីស្រាអែល ម៉ូរីតានី ម៉ិចស៊ិក ម៉ារ៉ុក អូម៉ង់ ស៊ូដង់ខាងត្បូង ស៊ូដង់ តួកគី ប៉ាគីស្ថាន តាហ្ស៊ីគីស្ថាន តួកម៉េនីស្ថាន អ៊ូសបេគីស្ថាន ចិន ឥណ្ឌា ស្រីលង្កា ភូមា និងប្រទេសថៃ។ លោក Andrew Gilmour អគ្គនាយករងក្រុមប្រឹក្សាសិទ្ធិមនុស្សអង្គការសហប្រជាជាតិបានបញ្ជាក់ថា ការធ្វើទុក្ខបុកម្នេញលើសកម្មជនសិទ្ធិមនុស្សតាមគ្រប់រូបភាពដោយសារតែពួកគេបានរួមសហការណ៍ជាមួយជាមួយក្រុមប្រឹក្សា ជាទង្វើផ្ទុយនឹងស្មារតី និងធម្មនុញ្ញរបស់អង្គការសហប្រជាជាតិ។
តាមរបាយការណ៍ដដែល ចំនួនប្រទេសជាប់ចោទក្នុងបទធ្វើបាបលើសកម្មជនសិទ្ធិមនុស្សលើកនេះមានការកើនឡើង បើធៀបនឹងរបាយការណ៍លើកមុនដែលគិតជាមធ្យមមានចំនួន ១៥ប្រទេស ពោលមិនដែលលើសពី ២០ប្រទេសទេ។ ទន្ទឹមគ្នានេះ របាយការណ៍បានទទួលស្គាល់ថា តួលេខជាក់ស្តែងអាចនឹងមានច្រើនជាងនេះ ព្រោះមានករណីខ្លះមិនត្រូវបានគេបង្ហាញទេដើម្បីការពារអត្តសញ្ញាណរបស់ជនរងគ្រោះ។ របាយការណ៍បានលើកឡើងពីស្រ្តីសកម្មជនសិទ្ធិមនុស្សជនជាតិបារ៉ែនម្នាក់ដែលត្រូវបានរដ្ឋអំណាចបារ៉ែនចាប់ខ្លួន រំលោភ និងសម្លាប់ចោល បន្ទាប់ពីស្រ្តីរូបនោះបាននិយាយនៅចំពោះមុខក្រុមប្រឹក្សាសិទ្ធិមនុស្សពីស្ថានការណ៍រំលោភសិទ្ធិមនុស្សនៅបារ៉ែន។
ក្រៅពីប្រើវិធានការសម្លាប់ចោល មានសកម្មជនសិទ្ធិមនុស្សខ្លះទៀតបានរងការវាយធ្វើបាប បញ្ឈប់ពីការងារ ឬមួយក៏រឹបអូសទ្រព្យសម្បត្តិជាដើម។ ក្រុមប្រឹក្សាសិទ្ធិមនុស្សបានកត់សម្គាល់ឃើញថា មានប្រទេសខ្លះបែរជាលើកយកហេតុផលទៅពន្យល់ថា មនុស្សដែលស្ថិតក្នុងផ្ទាំងស៊ីបរបស់ខ្លួនសុទ្ធសឹងជាភេរវជន ឬមួយជាក្រុមមនុស្សដែលបានលួចសហការណ៍ជាមួយបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ