អង់គ្លេសចាប់បានជនសង្ស័យម្នាក់ តែនៅរក្សាកំរិតអាសន្នភេរវកម្មកំពូលដដែល
ប៉ូលិសអង់គ្លេសបានប្រកាសនៅព្រឹកថ្ងៃសៅរ៍ថាចាប់ខ្លួនជនសង្ស័យសំខាន់ម្នាក់ ដែលមានពាក់ព័ន្ធនឹងភេរវកម្មបំផ្ទុះគ្រាប់បែកនៅក្នុងរថភ្លើងក្រោមដី កាលពីព្រឹកថ្ងៃសុក្រម្សិលមិញ។ ក្រោយភេរវកម្មដែលជាស្នាដៃរបស់ពួកអង្គការរដ្ឋអ៊ីស្លាមភ្លាម លោកស្រីនាយករដ្ឋមន្ត្រីអង់គ្លេសបានប្រកាសដំឡើងកំរិតអាសន្នដល់ខ្ពស់បំផុត និងបានសម្រេចដាក់ពង្រាយកម្លាំងយោធារក្សាសន្តិសុខនៅតាមទីតាំងសំខាន់របស់ប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
បើតាមសេចក្តីថ្លែងការណ៍របស់ប៉ូលិស ការងារអង្កេតបានជឿនលឿនទៅមុខខ្លាំង ! ជនសង្ស័យម្នាក់ទើបចាប់ខ្លួនបាន នៅព្រឹកថ្ងៃសៅរ៍នេះ នៅតំបន់កំពង់ផែ ជាយុវជនអាយុ១៨ឆ្នាំ ! ប៉ូលិសកំពុងតែនាំទៅសួរចម្លើយ និងកំពុងបន្តការអង្កេតរបស់ខ្លួនទៀត។ ថ្វីបើនេះជាការចាប់ខ្លួនដ៏សំខាន់មែន ប៉ុន្តែអង់គ្លេសត្រូវបន្តស្ថិតនៅក្រោមការត្រៀមអាសន្នភេរវកម្មខ្ពស់បំផុតដដែល។
កំរិតអាសន្នខ្ពស់បំផុត មានន័យថាអាចមានភេរវកម្មផ្ទុះឡើងឆាប់ៗ ! ការគំរាមកំហែងកំរិតធ្ងន់ធ្ងរបំផុតនេះ បានជំរុញឱ្យរដ្ឋាភិបាលអង់គ្លេសធ្វើសេចក្តីសម្រេចដ៏កម្រមួយ គឺ បញ្ចេញកម្លាំងយោធាមកជាជំនួយការពារសន្តិសុខ នៅតាមទីតាំងសំខាន់ៗ ដូចយ៉ាងរាជវាំង ដែលធម្មតាត្រូវបានការពារដោយកងកម្លាំងប៉ូលិស។ ការប្រកាសនេះត្រូវបានធ្វើឡើងដោយលោកស្រីនាយករដ្ឋមន្ត្រីផ្ទាល់តែម្តង។ ការទាញសញ្ញាអាសន្នភេរវកម្មកំរិតខ្ពស់បំផុតធ្លាប់បានធ្វើប្រកាសឡើងកាលពីឆ្នាំ២០០៥ ក្រោយភេរវកម្មអត្តឃាតក្នុងទូររថភ្លើងក្រោមដីដែរ ដែលកាលណោះបានសម្លាប់ជីវិតមនុស្សអស់៥២នាក់។
ពលរដ្ឋអង់គ្លេស ត្រូវប្រឈមនឹងទម្លាប់ថ្មី ឃើញប៉ូលិសទាហានប្រដាប់អាវុធ នៅតាមទីសាធារណៈ ក្នុងបណ្តាញមធ្យោបាយធ្វើដំណើរ នៅតាមផ្លូវ ... នេះជាវិធានការដ៏សមហេតុផល ដែលអាចធានារ៉ាប់រងនិងការពារសន្តិសុខជូនប្រជាពលរដ្ឋ ក្នុងពេលក្រុមអ្នកអង្កេតកំពុងធ្វើការ។ នេះបើតាមការបញ្ជាក់បន្ថែមរបស់លោកស្រីនាយករដ្ឋមន្ត្រី។
សូមបញ្ជាក់នេះ ជាភេរវកម្មលើកទី៥ ក្នុងរយៈពេលតែ៦ខែឆ្នាំ២០១៧ ដែលអង់គ្លេសបានរងគ្រោះ។ ភេរវកម្មនេះត្រូវបានប្រកាសទទួលស្គាល់ទង្វើដោយក្រុមអង្គការរដ្ឋអ៊ីស្លាម ក្នុងសំដីព្រមានបង្អើលថាមានគ្រាប់បែកជាច្រើនទៀតត្រូវបានបង្កប់ ដោយកូនទាហានរបស់គេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ