អាល្លឺម៉ង់ព្រមានបង្អត់ជំនួយ ដល់ប្រទេសសមាជិកអឺរ៉ុប ដែលមិនចង់ទទួលជនអន្តោប្រវេសន៍
ប្រទេសដែលមិនព្រមគោរព ទទួលយកកូតាជនអន្តោប្រវេសន៍ ទៅតាមការបែងចែក នៅក្នុងចំណោមប្រទេសសមាជិកអឺរ៉ុប នឹងអាចប្រឈម មិនទទួលបានជំនួយពីសហភាពអឺរ៉ុប។ នេះបើតាមការប្រកាសរបស់លោកស្រី នាយករដ្ឋមន្រ្តីអាល្លឺម៉ង់ អង់ហ្គេឡា ម៉ែរកិល នៅថ្ងៃអាទិត្យនេះ។ នៅក្នុងពេលដែលអឺរ៉ុបកំពុងប្រឈមនឹងវិបត្តិជនអន្តោប្រវេសន៍ ដ៏ធ្ងន់ធ្ងរ មិនធ្លាប់មាន អាល្លឺម៉ង់ ជាប្រទេសអឺរ៉ុបនាំមុខគេ ដែលបានទទួលយកជនភៀសខ្លួន ក្នុងចំនួនដ៏ច្រើន ដែលនៅក្នុងនោះ ភាគច្រើនជាជនភៀសខ្លួនស៊ីរី។
ចុះផ្សាយនៅថ្ងៃ៖
សម្រាប់នាយករដ្ឋមន្រ្តីអាល្លឺម៉ង់ លោកស្រី អង់ហ្គេឡា ម៉ែរកិល បើគ្មានសាមគ្គីរវាងប្រទេសសមាជិកអឺរ៉ុប នៅក្នុងរឿងទទួលជនអន្តោប្រវេសន៍ នោះក៏គ្មានដែរ សាមគ្គីភាពនៅក្នុងផ្នែកផ្សេងទៀត។ លោកស្រីម៉ែរកិលចង់និយាយទៅដល់ជំនួយហិរញ្ញវត្ថុរាប់លានអឺរ៉ូ ដែលប្រទេសមួយចំនួន នៅអឺរ៉ុប បានទទួលយក ក្នុងនាមជាប្រទេសសមាជិក។
ពាក្យព្រមានរបស់ប្រមុខរដ្ឋាភិបាលអាល្លឺម៉ង់ ធ្វើឡើងនៅ៣ថ្ងៃក្រោយ រដ្ឋាភិបាលហុងគ្រី បានចេញមុខ បរិហារយន្តការអឺរ៉ុប ក្នុងការបែងចែកកូតាទទួលជនភៀសខ្លួន និងរិះគន់ ការដាក់សម្ពាធទៅលើប្រទេសសមាជិក ដូចជាហុងគ្រីជាដើម។ នៅថ្ងៃពុធកន្លងទៅ ហុងគ្រី និងប្រទេសស្លូវ៉ាគី បានចាញ់ក្តី នៅក្នុងបណ្តឹងតវ៉ា ទៅតុលាការយុត្តិធម៌អឺរ៉ុប ដែលនៅក្នុងនោះ ហុងគ្រី និងស្លូវ៉ាគី ទាមទារឲ្យគេទាត់ចោល យន្តការកូតា បែងចែកជនភៀសខ្លួន ក្នុងចំណោមប្រទេសអឺរ៉ុប។
ទៅតាមយន្តការបែងចែកកូតាជនភៀសខ្លួន របស់សហភាពអឺរ៉ុប ប្រទេសសមាជិកអឺរ៉ុបត្រូវជួយសម្រាលបន្ទុករបស់អ៊ីតាលី និងក្រិក ដោយត្រូវយល់ព្រម ទទួលជនភៀសខ្លួន ទៅតាមកូតា ដែលកំណត់ដោយសហភាពអឺរ៉ុប។ ជារួម ប្រទេសសមាជិកទាំង២៨របស់អឺរ៉ុបត្រូវបែងចែកទទួលយកជនភៀសខ្លួន សរុប ១សែន ៦ម៉ឺននាក់ នៅក្នុងរយៈពេល២ឆ្នាំ។ ប៉ុន្តែ ក្នុង២ឆ្នាំចុងក្រោយនេះ មានតែជនភៀសខ្លួន ២៤ ០០០នាក់ប៉ុណ្ណោះ ដែលបានទទួលសិទ្ធិជ្រកកោននៅអឺរ៉ុប។
រហូតមក អាល្លឺម៉ង់ ក្នុងនាមជាប្រទេសដែលផ្តល់វិភាគទានច្រើនជាងគេនៅក្នុងកេសថវិកាអឺរ៉ុប បានទទួលលំហូរជនភៀសខ្លួន ដល់ទៅជាង ១លាននាក់។ ចំណែកប្រទេសនៅអឺរ៉ុបខាងកើត ដែលជាអតីតប្រទេសសង្គមនិយម ដូចជាហុងគ្រី ស្លូវ៉ាគីជាដើម បានបដិសេធ មិនទទួលយកគោលនយោបាយបែងចែករបស់អឺរ៉ុប មិនចង់ទទួលជនភៀសខ្លួន ដែលកាន់សាសនាអ៊ីស្លាម ដូចជាជនជាតិស៊ីរីជាដើម។ រដ្ឋាភិបាលរបស់ប្រទេសអឺរ៉ុបខាងកើតបានលើកហេតុផលថា ពួកគេមិនត្រឹមតែគ្មានហេដ្ឋារចនាសម្ព័ន្ធ គ្រប់គ្រាន់ដើម្បីទទួលជនភៀសខ្លួន ពួកគេគ្មានផងដែរ គោលនយោបាយដើម្បីធ្វើសមាហរណម្ម អ្នកកាន់សាសនាអ៊ីស្លាមទៅក្នុងប្រទេសដែលសំបូរដោយប្រជាជនកាន់គ្រិស្តសាសនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ