អាល្លឺមង់ចង់បញ្ឈប់ការចរចាសុំចូលសហភាពអឺរ៉ុបរបស់តួកគី
នៅក្នុងការតស៊ូមតិជាមួយគូប្រជែង ក្នុងក្របខ័ណ្ឌនៃការត្រៀមបោះឆ្នោតសភាអាល្លឺម៉ង់នៅចុងខែ លោកស្រីប្រមុខរដ្ឋាភិបាល អង់ហ្គឺឡា មែរកិល Angela Merkel ដែលបានវោហានិងមានប្រៀបខ្លាំង បានប្រកាសយ៉ាងក្តែងៗ និងច្បាស់ៗ ថាអាល្លឺម៉ង់ចង់បិទបញ្ចប់ការចរចាជាមួយតួកគីរឿងសុំចូលជាសមាជិកសភាពអឺរ៉ុប ព្រោះលោកស្រីគ្មានជំនឿសោះថា តួកគីអាចចូលក្នុងក្រុមអឺរ៉ុបបាន។
ចុះផ្សាយនៅថ្ងៃ៖ កែប្រែថ្ងៃទី៖
“ច្បាស់ណាស់ដែលថា តួកគីមិនត្រូវកា្លយជាសមាជិកសហភាពអឺរ៉ុបទេ" ! នេះជាប្រសាសន៍របស់លោកស្រីដែលនឹងអាចក្លាយជាប្រមុខរដ្ឋាភិបាលជាលើកទីបួន នៅថ្ងៃទី ២៤កញ្ញា ខាងមុខ។ មិនតែប៉ុណ្ណោះលោកស្រី មែរកិល បានសន្យាថានឹងទៅជជែកពិភាក្សាជាមួយសមាជិកសហភាពអឺរ៉ុបផ្សេងទៀត ដើម្បីស្វែងរកការព្រមព្រៀងរួមគ្នា ក្នុងការបិទបញ្ចប់កិច្ចចរចាសុំចូលជាសមាជិកអឺរ៉ុបជាមួយតួកគីតែម្តង។
សម្រាប់លោកស្រីដែលមិនជឿ និងមិនធ្លាប់មានជំនឿសោះ ថាតួកគីអាចក្លាយជាអឺរ៉ុបនឹងគេនោះ បញ្ហាចោទពេលនេះគឺស្ថិតនៅត្រង់ថាតើនរណានឹងប្រកាសដកខ្លួនចេញមុន តួកគីខ្លួនឯង ឬអឺរ៉ុប ?!
សូមបញ្ជាក់ថា ការចរចាសុំចូលជាសមាជិកសហភាពអឺរ៉ុបរបស់តួកគីបានចាប់ផ្តើមតាំងពីឆ្នាំ២០០៥មក ប៉ុន្តែវាត្រូវជាប់គាំងស្តូក តាំងពីស្ថានភាពនយោបាយតួកគីបានប្តូរផ្លាស់ ប្រធានាធិបតីអ៊ែរដូហ្កានជាប់ចោទដឹកនាំប្រទេសតាមបែបផ្តាច់ការ។ ហើយការបញ្ឈប់កិច្ចចរចាទាំងស្រុងអាចធ្វើទៅបានដរាបណាបានទទួលការយល់ព្រមជាឯកច្ឆ័ន្ទពីសមាជិកសហភាពទាំងអស់សិន។
អាល្លឺម៉ង់របស់លោកស្រីមែរកិល មានជំហរតឹងរឹងខ្លាំងណាស់ដាក់តួកគី ! រដ្ឋាភិបាលនេះហាក់គ្មានចេតនាបន្ធូរបន្ថយទេ។ តាំងជាច្រើនខែចុងក្រោយនេះ អង់ការ៉ា និងប៊ែរឡាំង ដំឡើងសំឡេងដាក់គ្នាយ៉ាងខ្លាំង ក្នុងសំណុំរឿងជាច្រើន។
អាល្លឺម៉ង់បានចោទរដ្ឋាភិបាលតួកគីថាបានចាប់ខ្លួនពលរដ្ឋអាល្លឺម៉ង់ ដែលខ្លះមានកាន់សញ្ជាតិតួកគីមួយទៀត ក្រោមលេសនយោបាយ រហូតមានការដាក់ទណ្ឌកម្មសេដ្ឋកិច្ចតួកគីជាច្រើនផង ប៉ុន្តែពុំធ្លាប់ប៉ះពាល់ដល់រឿងចរចាជាមួយអឺរ៉ុបទេ។ ដូច្នេះប្រសិនបើលោកស្រីមែលកិលសម្រេចស្នើសុំសហភាពអឺរ៉ុបឈប់ចរចាមែន នោះមានន័យថាគ្មានថ្ងៃបកក្រោយបានវិញឡើយ ក្នុងទំនាក់ទំនងជាមួយតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ