អាល្លឺម៉ង់បរិហាររិះគន់តួកគីដែលបានចាប់ជនជាតិអាល្លឺម៉ង់ពីរនាក់បន្ថែមទៀត
ភាពតានតឹងរវាងប៊ែរឡាំង និងអង់ការ៉ា កាន់តែធ្លាក់ធ្ងន់ធ្ងរ។ នៅថ្ងៃសុក្រទី ១កញ្ញា ក្រសួងការបរទេសអាល្លឺម៉ង់បានបរិហាររិះគន់ អាជ្ញាធរតួកគី ថា បានចាប់ជនជាតិអាល្លឺម៉ង់ ក្នុងហេតុផលនយោបាយ។ តាមអ្នកនាំពាក្យរបស់ក្រសួងការបរទេសអាល្លឺម៉ង់ ជនជាតិអាល្លឺម៉ង់ពីររូបត្រូវបានប៉ូលិសតួកគីចាប់ខ្លួន កាលពីថ្ងៃព្រហស្បតិ៍ ទី៣១ សីហា។
ចុះផ្សាយនៅថ្ងៃ៖
រដ្ឋាភិបាលអាល្លឺម៉ង់នៅមិនទាន់បានទទួលដំណឹង ផ្លូវការពីខាងភាគីតួកគី នៅក្នុងរឿងចាប់ខ្លួន ជនជាតិអាល្លឺម៉ង់ ពីរនាក់នៅថ្ងៃព្រហស្បតិ៍នោះទេ។ គឺប្រភពក្រៅរដ្ឋាភិបាលដែលបានជូនដំណឹងនេះ ទៅស្ថានកុងស៊ុលអាល្លឺម៉ង់ ដែលស្ថិតនៅក្រុងកំពង់ផែ Izmirរបស់តួកគី។ តាមទីភ្នាក់ងារព័ត៌មានបារាំង AFP ប៉ូលិសតួកគី នៅព្រលានយន្តហោះ Antalya បានបញ្ជាក់ពីការចាប់ខ្លួនជនជាតិអាល្លឺម៉ង់ទាំងពីររូប។
អ្នកនាំពាក្យរបស់ក្រសួងការបរទេសអាល្លឺម៉ង់បានចាត់ទុកការចាប់ខ្លួនជនជាតិអាល្លឺម៉ង់ ថា ជារឿងនយោបាយ និងបានទាមទារឲ្យរដ្ឋាភិបាលតួកគីដោះលែងជនជាតិអាល្លឺម៉ង់ ដែលតួកគីបានចាប់ខ្លួន ដោយគ្មានហេតុផល។ សរុបមក មានជនជាតិអាល្លឺម៉ង់ ១២រូប ដែលនៅក្នុងនោះ ៤រូបមានសញ្ជាតិពីរ ត្រូវបានអាជ្ញាធរតួកគី ចាប់ឃុំខ្លួន នៅក្នុងពេលពួកគេមានវត្តមានក្នុងទឹកដីតួកគី។
ករណីចាប់ខ្លួនជនជាតិអាល្លឺម៉ង់ ដែលចម្រូងចម្រាសជាងគេ គឺអ្នកឆ្លើយឆ្លងព័ត៌មានជាតិអាល្លឺម៉ង់ ដើមកំណើតតួកគី ម្នាក់ ដែលត្រូវបានប៉ូលិសតួកគីចាប់ឃុំខ្លួន តាំងពីខែ កុម្ភៈ ពីបទឃោសនា ឲ្យក្រុមភេរវនិយម ហើយនិងញុះញង់ឲ្យមានការស្អប់នៅតួកគី។ ប្រធានាធិបតីតួកគី លោករេស៊ីប អែរដូហ្កាន ធ្លាប់បានប្រកាសចាត់ទុកកាសែតអាល្លឺម៉ង់ ថា ជាជនបំបែកខ្លួន គួដ និងជាចារកិច្ច យកការណ៍សម្ងាត់ឲ្យអាល្លឺម៉ង់។
ទំនាក់ទំនងតួកគី និងអាល្លឺម៉ង់បានចុះល្អក់កករ តាំងពីរដ្ឋប្រហារយោធាមិនបានសម្រេចនៅតួកគី នៅពាក់កណ្តាលឆ្នាំ ២០១៦។ ក្រុងអង់ការ៉ាបានចោទប្រកាន់អាល្លឺម៉ង់ ថាបានសណ្តោសប្រណី ដល់ក្រុមភេរវនិយម តាមរយៈការផ្តល់ជំរកដល់ក្រុមទាមទារបំបែកទឹកដី គួដ ហើយនិងជនជាតិតួកគី ដែលបានចូលរួមនៅក្នុងរដ្ឋប្រហារទម្លាក់លោកប្រធានាធិបតីអ៊ែរដូហ្កាន។ អាល្លឺម៉ង់វិញ បានរុញច្រានការចោទប្រកាន់របស់រដ្ឋាភិបាលតួកគី និងបានបរិហារ វិធានការ របស់រដ្ឋាភិបាលតួកគី ដែលបានបោសសម្អាត ចាប់ខ្លួន មនុស្ស ក្នុងទ្រង់ទ្រាយធំ នៅក្រោយរដ្ឋប្រហារមិនបានសម្រេច។
អង់ការ៉ា និងប៊ែរឡាំងមិនខ្វះរឿង ដើម្បីដំឡើងសំឡេងដាក់គ្នា។ ជម្លោះការទូតចុងក្រោយរវាងតួកគី និងអាល្លឺម៉ង់ ទើបតែកើតមាននៅដើមខែសីហានេះ នៅពេលប្រធានាធិបតីតួកគី បានអំពាវនាវដល់ជនជាតិតួកគី រស់នៅអាល្លឺម៉ង់ ធ្វើពហិការ មិនទៅបោះឆ្នោត ឲ្យ គណបក្សរបស់លោកស្រី នាយករដ្ឋមន្រ្តីមែរកិល ដែលលោកចាត់ទុកជាគណបក្សសត្រូវរបស់តួកគី។ នៅថ្ងៃទី២៤ កញ្ញាខាងមុខ អាល្លឺម៉ង់នឹងរៀបចំបោះឆ្នោតសភា សហព័ន្ធ។ អាល្លឺម៉ង់ ដែលមានប្រជាជនតួកគី រស់នៅ ប្រមាណ ៣លាននាក់ និងពាក់កណ្តាលមានសិទ្ធិបោះឆ្នោត ជាតិ បានចោទប្រកាន់ប្រធានាធិបតីតួកគី ថា បានលូកដៃចូលកិច្ចការផ្ទៃក្នុងរបស់អាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ