អេស្ប៉ាញកាន់ទុក្ខ ៣ថ្ងៃ ក្រោយទទួលរងភេរវកម្មពីរផ្ទួនគ្នាសម្លាប់មនុស្សយ៉ាងតិច ១៤នាក់ និងរបួសជាង ១០០នាក់
ចុះផ្សាយនៅថ្ងៃ៖
នៅក្នុងប្រទេសអេស្ប៉ាញ រដ្ឋាភិបាលបានប្រកាសនាថ្ងៃសុក្រ ទី១៨សីហាពីការកាន់ទុក្ខជាតិរយៈពេល ៣ថ្ងៃដើម្បីគោរពវិញ្ញាណក្ខន្ធចំពោះជនរងគ្រោះនៅក្នុងអំពើភេរវកម្មពីរផ្ទួនគ្នា។ គឺជាអំពើភេរវកម្មដែលភេរវជនបានបររថយន្តសំដៅលើហ្វូងមនុស្សនៅក្នុងក្រុងទេសចរណ៍បាសឺឡូនណា (Barcelone) និងស្រុកឆ្នេរសមុទ្រកំប្រីល (Cambrils)។ តុល្យការបណ្តោះអាសន្នចុងក្រោយឲ្យដឹងថា មានមនុស្សស្លាប់យ៉ាងតិច ១៤នាក់ និងរបួសជាង ១០០នាក់ដែលភាគច្រើនជាអ្នកទេសចរណ៍បរទេស។ អង្គការរដ្ឋអ៊ីស្លាមបានចេញមុខប្រកាសនៅក្រោយហេតុការណ៍ថា ជាស្នាដៃរបស់ខ្លួន។ ប្រតិកម្មថ្កោលទោសពីបរទេស មានអាមេរិក និងបារាំងបានធ្លាក់មកជាបន្តបន្ទាប់។
ភេរវកម្មទាំងពីរត្រូវបានភេរវជនប្រើវិធីសាស្រ្តតែមួយ គឺប្រើរថយន្តបរសំដៅលើហ្វូងមនុស្សក្នុងចេតនាសម្លាប់ ឬធ្វើឲ្យរបួស។ ភេរវកម្មទាំងពីរបានកើតមានឡើងនៅក្នុងតំបន់តែមួយ គឺកាតាឡូញញ៉ា (Catalognia) តែនៅកន្លែងពីរខុសគ្នា ទី១ នៅបាសឺឡូនណា (Barcelona) ដែលជាទីក្រុងរបស់កាតាឡូញញ៉ា និងទី២ នៅស្រុកឆ្នេរសមុទ្រកំប្រីល (Cambrils) ដែលមានចម្ងាយប្រមាណជា ១២០គីឡូម៉ែត្រពីទីក្រុងបាសឺឡូនណា។ គួរបញ្ជាក់ថា កាតាឡូញញ៉ា (Catalognia) ជាតំបន់ស្វយ័តរបស់អេស្ប៉ាញ។ ភេរវកម្មនៅក្រុងបាសឺឡូនណាដែលជាតំបន់ទេសចរណ៍បានកើតឡើងនៅវេលាម៉ោង ៥ល្ងាច ម៉ោងក្នុងប្រទេសអេស្ប៉ាញក្នុងថ្ងៃព្រហស្បតិ៍ ទី១៧ សីហាដោយភេរវជនបានបើកឡានសំដៅលើហ្វូងមនុស្សដែលកំពុងដើរលេងកំសាន្ត។
ភេរវកម្មនៅក្រុងបាសឺឡូនណាបានបណ្តាលឲ្យមានមនុស្សស្លាប់ ១៤នាក់ របួសប្រមាណជា ១០០នាក់ ហើយជនដៃដល់ក៏បានចុះពីឡានរត់គេចខ្លួនបាត់។ ៧ម៉ោងក្រោយមក ពោលនៅវេលារំលងអធ្រាត្រយប់ថ្ងៃព្រហស្បតិ៍ឆ្លងចូលថ្ងៃសុក្រ ទី១៨ សីហា ក៏មានរថយន្តមួយគ្រឿងទៀតជិះគ្នា ៥នាក់បានបើកសំដៅលើហ្វូងមនុស្សដែលកំពុងដើរឆ្លងផ្លូវក្នុងស្រុកឆ្នេរសមុទ្រកំប្រីល (Cambrils)។ ហេតុការណ៍នៅស្រុកកំប្រីល (Cambrils)មិនបណ្តាលឲ្យមានមនុស្សស្លាប់ទេ តែរបួស ៧នាក់ ក្នុងនោះមានប៉ូលិសម្នាក់។ ចំណែកភេរវជនទាំង ៥នាក់ត្រូវបានកម្លាំងប៉ូលិសសំលេសចោលទាំងអស់។
ព័ត៌មានឲ្យដឹងថា ក្នុងចំណោមភេរវជនស្លាប់ទាំង ៥នាក់នោះ មានខ្លះដាក់ជាតិផ្ទុះជាប់នឹងខ្លួនទៀតផង។ សរុបមក អំពើភេរវកម្មទាំងពីរបានបណ្តាលឲ្យមានមនុស្សស្លាប់ ១៤នាក់ និងរបួសជាង ១០០នាក់។ នេះគ្រាន់ជាតួលេខបណ្តោះអាសន្នប៉ុណ្ណោះ ព្រោះមានរបួសធ្ងន់ស្ទើរស្លាប់ ស្ទើររស់ជាច្រើននាក់កំពុងទទួលការព្យាបាលបន្ទាន់។ ក្នុងចំណោមអ្នកស្លាប់ និងរបួសមានជនជាតិអាល្លឺម៉ង់ អេស្ប៉ាញ អាហ្សង់ទីន ហូឡង់ វ៉េណេស៊ុយអេឡា បែលហ្សិក អូស្រា្តលី ហុងគ្រី ប៉េរូ អៀឡង់ ក្រិក គុយបា ម៉ាសេដ្វាន ចិន អ៊ីតាលី រូម៉ានី និងបារាំងដែលមានរបួស ២៦នាក់ ក្នុងនោះរបួសធ្ងន់ ១១នាក់។
អង្គការរដ្ឋអ៊ីស្លាមចេញមុខសារភាពជាស្នាដៃខ្លួន
ភេរវកម្មនៅក្រុងបាសឺឡូនណា និងនៅស្រុកកំប្រីលត្រូវបានប៉ូលិសអេស្ប៉ាញសន្និដ្នានភ្លាមៗថា មានចំណងទាក់ទងគ្នា។ ខណៈនេះ កម្លាំងប៉ូលិសអេស្ប៉ាញកំពុងចេញប្រតិបត្តិការយ៉ាងសកម្មតាមរកចាប់ខ្លួនជនដៃដល់ដែលបានបរឡានសំដៅលើហ្វូងមនុស្សក្នុងក្រុងបាសាឡូនណា។ ម្យ៉ាងទៀត គេនៅមិនទាន់ដឹងច្បាស់ថា តើមានជនប៉ុន្មាននាក់ដែលជិះក្នុងឡាននោះ ហើយថា តើមានមនុស្សប៉ុន្មាននាក់ដែលបានរៀបចំសេណារីយ៉ូនោះ។ យ៉ាងណាក៏ដោយពេលនេះ មានជនសង្ស័យចំនួនពីរនាក់ត្រូវបានប៉ូលិសក្រុងកាតាឡូនណាចាប់ខ្លួន ម្នាក់ជាជនជាតិម៉ារ៉ុក និងម្នាក់ទៀតមានដើមកំណើតពីក្នុងស្រុកម៉ែលីឡាដែលជាស្រុកស្វយ័តមួយទៀតរបស់អេស្ប៉ាញ។ តែអ្នកឃាត់ខ្លួនទាំងពីរនាក់មិនមែនជាអ្នកបើករថយន្តនោះទេ។
ងាកទៅស្រុកកំប្រីល ប៉ូលិសបាញ់សម្លាប់ភេរវជនទាំង ៥នាក់ដែលជិះនៅក្នុងរថយន្ត។ មានការលើកឡើងថា ការដែលភេរវជនទាំង ៥នាក់បើកបុកមនុស្សដែលកំពុងឆ្លងផ្លូវធ្វើឲ្យរបួសជារឿងចៃដន្យ ព្រោះតាមពិត គម្រោងការរបស់ពួកគេ គឺធ្វើដំណើរទៅបំផ្ទុះជាតិផ្ទុះជាប់ខ្លួនគេនៅកន្លែងទីប្រជុំជនផ្សេង។ យ៉ាងណាក៏ដោយ អង្គការរដ្ឋអ៊ីស្លាមបានប្រកាសសារភាពថា ភេរវកម្មទាំងពីរជាស្នាដៃរបស់ខ្លួន។
អេស្ប៉ាញជាជង្រុករបស់ពួកអ៊ីស្លាមនិយមជ្រុល?
បើធៀបនឹងប្រទេសអឺរ៉ុបផ្សេង ដូចយ៉ាងបារាំង បែលហ្សិក អង់គ្លេស ឬអាល្លឺម៉ង អេស្ប៉ាញជាប្រទេសអឺរ៉ុបមួយដែលរួចផុតពីការវាយប្រហាររបស់ពួកជីហាតអង្គការរដ្ឋអ៊ីស្លាម។ តែនេះមិនមែនមានន័យថា អេស្ប៉ាញមិនធ្លាប់រងការវាយប្រហារពីពួកអ៊ីស្លាមនិយមជ្រុលនោះទេ។ ជាក់ស្តែងកាលពីជាង ១០ឆ្នាំមុន ពោលក្នុងឆ្នាំ ២០០៤ អំពើភេរវកម្មបំផ្ទុះគ្រាប់បែកជាង ១០គ្រាប់ក្នុងរថភ្លើងដែលកំពុងធ្វើដំណើរពីខេត្តទៅកាន់ទីក្រុងម៉ាឌ្រីដបានបណ្តាលឲ្យមានមនុស្សស្លាប់ ១៩១នាក់ និងរបួសប្រមាណជា ២ ០០០នាក់ផ្សេងទៀត។ អំពើភេរវកម្មកាលណោះជាស្នាដៃរបស់ពួកអ៊ីស្លាមនិយមជ្រុលអាល់កៃដា។ ម្យ៉ាងទៀត អេស្ប៉ាញខ្លួនឯងក៏ធ្លាប់បានទទួលរងភេរវកម្មពីពួកអ្នកទាមទារផ្តាច់ទឹកដីនិយម ETA ដែរ។
ពិតណាស់ថារហូតមកទល់ពេលនេះ អេស្ប៉ាញរួចផុតពីការវាយប្រហាររបស់ពួកជីហាតអង្គការរដ្ឋអ៊ីស្លាម តែចូរកុំភ្លេចថា អេស្ប៉ាញជាកន្លែងជ្រកកោណមួយដ៏សំខាន់របស់ពួកជីហាត។ របាយការណ៍មួយចេញផ្សាយដោយវិទ្យាស្ថានមួយក្នុងឆ្នាំ ២០១៦ ឲ្យដឹងថា ក្នុងចំណោមមនុស្សដែលប៉ូលិសអេស្ប៉ាញឃាត់ខ្លួនពីបទមានចំណងទាក់ទងជាមួយអង្គការរដ្ឋអ៊ីស្លាម មាន ៤៥% ជាជនជាតិអេស្ប៉ាញ និង ៤១% ជាជនជាតិម៉ារ៉ុក។ តាមរបាយការណ៍ដដែល ក្រុងបាសឺឡូនណាជាជង្រុកពួកជីហាតដ៏សំខាន់នៅក្នុងទឹកដីអេស្ប៉ាញ នោះបើអេស្ប៉ាញមិនសូវមានជនជាតិខ្លួនចេញទៅចូលរួមជាមួយយុទ្ធជនអង្គការរដ្ឋអ៊ីស្លាមនៅអ៊ីរ៉ាក់ ឬស៊ីរីក៏ដោយ។
មួយវិញទៀត អេស្ប៉ាញមិនបានបញ្ជូនកម្លាំងទ័ពទៅចូលរួមជាមួយកម្លាំងសម្ព័ន្ធមិត្តវ៉ៃប្រហារពួកជីហាតអង្គការរដ្ឋអ៊ីស្លាមនៅស៊ីរី និងអ៊ីរ៉ាក់ដែរ។ តែបានបញ្ជូនទាហានជាច្រើននាក់ទៅជួយហ្វឹកហ្វឺនកម្លាំងទាហ៊ានអ៊ីរ៉ាក់។ គឺទង្វើនេះហើយដែលបានធ្វើឲ្យអេស្ប៉ាញរងការវាយប្រហារនៅពេលនេះ ដូចដែលអង្គការរដ្ឋអ៊ីស្លាមបានបញ្ជាក់នៅក្នុងសេចក្តីជូនដំណឹងរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ