ខួបគម្រប់៣ឆ្នាំ តាំងពីរុស្ស៊ីដាក់ទណ្ឌកម្មបកទៅ បស្ចិមលោកវិញ
ចុះផ្សាយនៅថ្ងៃ៖
បីឆ្នាំមុនថ្ងៃ៦សីហាឆ្នាំ២០១៤ លោកប្រធានាធិបតី វ៉្វាឌីមៀរ ពូទីន បានចេញក្រិត្យលាន់រន្ទឺដែលហាមមិនឲ្យនាំគ្រឿងបរិភោគលោកខាងលិចចូលប្រទេសរុស្ស៊ីក្នុងឋានៈជាចម្លើយតបនឹងទណ្ឌកម្មដែលបស្ចិមលោកពួតដៃគ្នាដាក់ទល់នឹងម៉ូស្គូក្រោមលេសថា ម៉ូស្គូរំលោភលើច្បាប់អន្តរជាតិ ដោយបានភ្ជាប់យកទឹកដីគ្រីមេទាំងផ្តាច់វាចេញពីរដ្ឋអ៊ុយក្រែន។ យោងទៅលើតួលេខអង្គការសហប្រជាជាតិ ប្រមុខរដ្ឋរុស្ស៊ី ថ្លែងថាដោយមកពីទណ្ឌកម្មទៅវិញទៅមកក្នុងរយៈពេលនេះ រុស្ស៊ីខាតបង់អស់ប្រមាណ ៥២.០០០ លានដុល្លារចំណែកលោកខាងលិចខាតបង់អស់ដល់ទៅ ១០០.០០០ លានដុល្លារ។
លើកចុងក្រោយគឺថ្ងៃ៣០មិថុនាកន្លងទៅដែលតាមសំណើលោកនាយករដ្ឋមន្ត្រី ឌ្មីទ្រី មេដវេដេវ លោកប្រធានាធិបតីពូទីន បានចុះហត្ថលេខាលើក្រិត្យពន្យារទណ្ឌកម្មបកវិញពីខាងរុស្ស៊ីនោះ មួយឆ្នាំកន្លះទៅមុខទៀតរហូតដល់ថ្ងៃ៣១ធ្នូឆ្នាំ២០១៨។ ពន្យារនេះ គឺក្រោយពីសហភាពអឺរ៉ុប បានពន្យាសុពលភាព ទណ្ឌកម្មប្រឆាំងរុស្ស៊ីដល់ថ្ងៃ ៣១មករាឆ្នាំក្រោយនោះ។
ក្នុងរយៈពេល៣ឆ្នាំកន្លងទៅស្របនឹងការណែនាំរបស់រដ្ឋាភិបាល ក្នុងប្រទេសរុស្ស៊ីគេសង្វាតផ្តល់ផលិតផលជាតិជាជំនួសការនាំចូលគ្រឿងបរិភោគពីបណ្តាប្រទេសខាងលិច។ ឥឡូវស្ថានការណ៍វិវឌ្ឈន៍ដល់ដំណាក់កាលដែលពួកម្ចាស់កសិដ្ឋានក្នុងប្រទេសដែលពីមួយឆ្នាំទៅមួយឆ្នាំ ចេះផ្តល់កសិផលបានកាន់តែក្រាស់ក្រែលហើយទទួលចំណូលកាន់តែច្រើនទៅដែរដោយមានការគាំទ្រពីខាងពួកមន្ត្រីរដ្ឋការនាំគ្នាទទូចថ្នាក់ដឹកនាំឲ្យពន្យាបម្រាមហាមការនាំចូលគ្រឿងបរិភោគពីបស្ចិមលោករាប់ឆ្នាំទៀត។ កាលពីដើមកក្កដា លោករដ្ឋមន្ត្រីកសិកម្ម Alexandre Tkatchev បានសំដែងសេចក្តីសង្ឃឹមថាបម្រាមរុស្ស៊ីនោះនឹងពន្យាទៅយ៉ាងហោចណាស់ ១០ឆ្នាំទៅមុខទៀត។
ប្រទេសដែលជាប់ក្នុងបម្រាមហាមមិនឲ្យនាំគ្រឿងបរិភោគចូលរុស្ស៊ី គឺ២៨ប្រទេសសហភាពអឺរ៉ុប សហរដ្ឋអាមេរិក , កាណាដា , អូស្ត្រាលី ,ន័រវ៉ែស ព្រមទាំងប្រទេសដែលសាមគ្គីជាមួយបស្ចិមលោកក្នុងការដាក់ទណ្ឌកម្មរុស្ស៊ីពោលគឺអាល់បានី, ម៉ុងតេណេគ្រោ , អ៊ីស្លង់ , លីចតេនស្តេននិងអ៊ុយក្រែន។
ចំណែកគ្រឿងបរិភោគដែលហាមមិនឲ្យនាំចូលរុស្ស៊ីពីប្រទេសទាំងនោះ គឺ ៖ សាច់គោ សាច់ជ្រូក សាច់មាន់ សាច់ទា សាច់ក្ងាននិងសាច់បសុបក្សីផ្សេងទៀតត្រី បន្លែ ផ្លែឈើ ទឹកដោះគោ ផលិតផលធ្វើពីទឹកដោះគោបែបយ៉ាងហ្វ្រូម៉ាស។ល។ តាមតួលេខ លើកយកមកបង្ហាញដោយប្រព័ន្ធផ្សព្វផ្សាយរុស្ស៊ីក្នុង ៣ឆ្នាំកន្លងទៅ អាជ្ញាធររុស្ស៊ីចេះទប់ស្កាត់មិនឲ្យនាំចូលមករុស្ស៊ីគឺគ្រឿងបរិភោគពីបស្ចិមលោកដែលប្តូរស្លាកម៉ាកក្លែងជាផលិតផលរបស់ប្រទេសជិតខាងនិងរុស្ស៊ីក្នុងលំហអតីតសហភាសូវៀត សរុបទៅ ១៨.០០០ តោនហើយត្រូវបានដុតកំទេចចោលក្រោមស្នូរសោកស្តាយថា បើយកវាទៅចែកឲ្យអ្នកស្រុកក្រីក្រ គឺប្រសើរជាង។
ចំហៀងអវិជ្ជមាន ដែលមិនអាចមើលរំលងបាន គឺថា ដោយមកពីទណ្ឌកម្មបកវិញពីខាងរុស្ស៊ី តាមស្ថិតិរដ្ឋ គិតពីខែសីហាឆ្នាំ២០១៤ ដល់ខែកក្កដាឆ្នាំ២០១៧ គ្រឿងបរិភោគនៅរុស្ស៊ីលើកលែងតែ សុរា បាឡើងថ្លៃដល់ទៅ ៤៥%។ បើនិយាយលំអិត គឺថាសាច់គ្រប់ប្រភេទបានឡើងថ្លៃ ២៦% ,ត្រីនិងគ្រឿងសមុទ្របានឡើងថ្លៃ ៦៦% , ទឹកដោះគោនិងផលិតផលធ្វើពីទឹកដោះគោ បានឡើងថ្លៃ ៥៧%, បន្លែនិងផ្លែឈើ បានឡើងថ្លៃ ៤៤%។
ប្រាកដណាស់ ដើម្បីបំពេញដល់តម្រូវការខ្លួន ជាជំនួសការនាំចូលពីប្រទេសខាងលិចនិងសម្ព័ន្ធមិត្តគេ រុស្ស៊ី បានរកឃើញទីផ្សារផ្សេងសម្រាប់នាំចូលនូវគ្រឿងបរិភោគ បែបយ៉ាងពីបណ្តាប្រទេសមជ្ឈឹមបូព៌ា មានតួកគី អេហ្ស៊ីប អ៊ីស្រាអែល ជាដើមនិងបណ្តាប្រទេសអាមេរិកឡាទីន។ រួចដោយហេតុថា រុស្ស៊ីខ្លួនឯងក៏បង្កើនការផលិតគ្រឿងបរិភោគផ្ទាល់ខ្លួនដែរ បានជាក្រសួងកសិកម្មដោយបូកសរុបតុល្យាការ ៣ឆ្នាំកន្លងទៅធ្វើការប្រៀបធៀបថា ៖ បើក្នុងឆ្នាំ ២០១៣គឺសម័យមុនទណ្ឌកម្មទៅវិញទៅមកខាងសាច់ជ្រូក រុស្ស៊ីបាននាំចូលដល់ទៅ ២៦% នោះក្នុងឆ្នាំ២០១៦ វាធ្លាក់មកនៅត្រឹម ៨%, ខាងសាច់បសុបក្សីគឺធ្លាក់ចុះ អស់ ២ដងកន្លះមកនៅត្រឹម ៥%ប៉ុណ្ណោះ ខាងបន្លែនិងផ្លែឈើគឺធ្លាក់ចុះដល់ទៅ ៣ដង។ គិតជាទឹកប្រាក់បើក្នុងឆ្នាំ ២០១៣ រុស្ស៊ីបានចំណាយដល់ទៅ ៤៣.០០០ លានដុល្លារសម្រាប់នាំចូលគ្រឿងបរិភោគនោះក្នុងឆ្នាំ២០១៦ទំហំនាំចូលនេះស្រុតចុះដល់ទឹកប្រាក់ត ២៥.០០០ លានដុល្លារ។
គួរនិយាយថា រុស្ស៊ីស្ថិតក្នុងចំណោមប្រទេសនាំមុខគេ ខាងនាំចេញនូវស្រូវសាលីសម្រាប់ធ្វើនំប៉័ងដោយក្នុង១ឆ្នាំៗនាំវាចេញក្នុងបរិមាណពី ២៥ ទៅ ៣០ លានតោនទៅកាន់ប្រទេសចំនួនសឹង ១០០ ឯណោះ ដែលពីក្នុងនោះទិញច្រើនជាងគេគឺអេហ្ស៊ីប តួកគី ចិន វៀតណាម។
ជាការរំលឹក ៖ ទណ្ឌកម្មរុស្ស៊ីក្នុងទម្រង់ជាបម្រាមហាមមិនឲ្យនាំគ្រឿងបរិភោគពីបស្ចិមលោកចូលរុស្ស៊ីជាចម្លើយតបនឹងទណ្ឌកម្មដែលមុនដំបូងសហភាពអឺរ៉ុបរួចបន្ទាប់មកសហរដ្ឋអាមេរិក និងកាណាដានាំគ្នាប្រកាសដាក់ជាបន្តបន្ទាប់ទល់នឹងរូបវន្តបុគ្គលរុស្ស៊ីមកទល់ឥឡូវឡើងដល់ ៣៨៨នាក់និងនីតិបុគ្គលរុស្ស៊ីមកទល់ឥឡូវឡើងដល់ចំនួន ១០៥ ទៅហើយដែលថាពាក់ព័ន្ធនឹងការផ្តាច់ទឹកដីគ្រីមេចេញពីអ៊ុយក្រែនហើយភ្ជាប់វាមកនឹងរុស្ស៊ី។ ក្នុងចំណោម រូបវន្តបុគ្គលនោះដែលបើគេមានលុយក្នុងធនាគារប្រទេសខាងលិច គឺត្រូវបង្កកទុកហើយមិនអាចទទួលទិដ្ឋាការដើម្បីធ្វើដំណើរចូលប្រទេសខាងលិចឡើយ គឺមាន ៖ ប្រធាននៃសភាទាំងពីរថ្នាក់ដែលបានអនុម័តវិសោធនកម្មកែប្រែរដ្ឋធម្មនុញ្ញរុស្ស៊ី អនុញ្ញាតឲ្យខេត្តចំណុះសហព័ន្ធរុស្ស៊ីឡើងពីចំនួន ៨៣ ដល់ ៨៥ តាមរយៈការរទទួលសាធារណរដ្ឋគ្រីមេនិងក្រុងផែ សេបាស្តូប៉ុល ជាមូលដ្ឋានកងនាវារុស្ស៊ីប្រចាំនៅសមុទ្រខ្មៅទៅជាខេត្តចំណុះថ្មី , រដ្ឋមន្ត្រីក្រសួងកម្លាំងនានាបូកទាំងនាយអគ្គសេនាធិការដ្ឋានកងទ័ពរុស្ស៊ីដែលថាបានប្រើកម្លាំងយោធាក្នុងព្រឹត្តិការណ៍នោះ។ ហើយក្នុងចំណោមនីតិបុគ្គលជាប់ក្នុងទណ្ឌកម្មបស្ចិមលោក មានជាអាទិ៍ គឺក្រុមហ៊ុនរុស្ស៊ីណាដែលមាននិស្ស័យជាប់ទៅនឹងការសាងសង់ហេដ្ឋារចនាសម្ព័ន្ធនៅគ្រីមេ។
លោកប្រធានាធិបតីពូទីន រមែងថ្លែងថា ៖ បើបស្ចិមលោកលុបទៅវិញទណ្ឌកម្មប្រឆាំងរុស្ស៊ី នោះម៉ូស្គូក៏លុបទៅវិញដែរបម្រាមហាមមិនឲ្យនាំគ្រឿងបរិភោគពីបណ្តាប្រទេសខាងលិចចូលរុស្ស៊ី។ ម៉ូស្គូ មិនយល់ព្រមពិភាក្សាបញ្ហាទណ្ឌកម្មឡើយដ្បិតមិនមែនរុស្ស៊ីទេដែលបានបង្ករឿងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ