លោកពូទីន ប្រកាសបណ្តេញចេញពីរុស្ស៊ី អ្នកការទូតអាមេរិកាំង ៧៥៥នាក់
បុគ្គលិកការទូតសរអា ដែលប្រចាំនៅរុស្ស៊ី ត្រូវតែកាត់បន្ថយឲ្យអស់ ៧៥៥ នាក់ -សេចក្តីនេះ ប្រកាសដោយលោកប្រធានាធិបតីរុស្ស៊ី វ៉្លាឌីមៀរ ពូទីន យប់មិញ តាមកាណាល់ទូរទស្សន៍រដ្ឋ គឺ ក្រោយពីក្នុងសប្តាហ៍មុន ក្រុងវ៉ាស៊ីនតោន បានអនុម័ត ទណ្ឌកម្មថ្មីៗប្រឆាំងម៉ូស្គូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ខណៈដែលទំនាក់ទំនងរវាងមហាអំណាចទាំងពីរ ធ្លាក់ដល់កម្រិតទាបបំផុត បើគិតតាំងពីសង្គ្រាម ត្រជាក់បានចប់ទៅ ជាពិសេស មកពីជម្លោះនៅអ៊ុយក្រែន និង មកពី វិបត្តិនៅស៊ីរី ចៅហ្វាយវិមានក្រេមឡាំង សំដែងឲ្យគេឃើញថា គាត់ទុទិដ្ឋិនិយម ជាង សុទិដ្ឋិនិយម។
ក្នុងបទសម្ភាសន៍តាមកាណាល់ទូរទស្សន៍រដ្ឋ Rossia-24 ដែលផ្សាយយប់ថ្ងៃ៣០កក្កដា លោកពូទីន បង្ហើប ឲ្យដឹងថា ៖ មានអ្នកការទូត និង បុគ្គលិកបច្ចេកទេស ដល់ទៅជាង មួយពាន់នាក់ នៅបន្តធ្វើការនៅឡើយ ក្នុងស្ថានទូត និង បណ្តាស្ថានកុងស៊ុលអាមេរិកាំង លើដែនដីរុស្ស៊ី។
ម៉្លោះហើយបានជាគាត់លំអិតថា ដើម្បីថ្លឹងឲ្យបានស្មើនឹងចំនួនអ្នកការទូត និង បុគ្គលិកបច្ចេកទេសរុស្ស៊ី សរុបទៅតែចំនួន ៤៥៥នាក់ ដែលបច្ចុប្បន្ន ធ្វើការនៅទូទាំង សរអា សម្រាប់ក្រុងវ៉ាស៊ីនតោន គឺត្រូវដក ចេញពីរុស្ស៊ីទៅ អ្នកការទូតនិងបុគ្គលិកបច្ចេកទេសអាមេរិកាំង ចំនូន ៧៥៥ នាក់។ មិនតែប៉ុណ្ណោះ ចាប់ពីថ្ងៃស្អែកទី១ សីហាទៅ ស្ថានទូតអាមេរិក លែងមានសិទ្ធិប្រើប្រាស់និវេសនដ្ឋាននៅជាយក្រុងម៉ូស្គូ និង ឃ្លាំងស្តុកទំនិញនានា របស់ខ្លួន ស្ថិតក្នុងរដ្ឋធានីរុស្ស៊ីផ្ទាល់។
ក្រសួងការបរទេសរអា ក្នុងសេចក្តីថ្លែងការណ៍ចេញផ្សាយថ្ងៃអាទិត្យម្សិលមិញ បានស៊កសៀតសំដីជំទាស់ ថា “ការសម្រចចិត្តនេះ របស់រុស្ស៊ី គឺជា ទង្វើគួរឲ្យសោកស្តាយ និង អយុត្តិធម៌”។ ភាគីអាមេរិក នឹងសន្និដ្ឋានអំពី ព្រនង់ទូងនេះពីខាងរុស្ស៊ី ហើយនឹងឆ្លើយបកវិញ”។
សេចក្តីថ្លែងការណ៍អាមេរិកាំងនេះ បន្លឺឡើងក្រោយពី ការទូតរុស្ស៊ី នាថ្ងៃសុក្រកន្លងទៅ បានតម្រូវឲ្យ សរអា កាត់បន្ថយទៅទល់ថ្ងៃទី១ កញ្ញាខាងមុខ គឺចំនួនអ្នកការទូតខ្លួនទាំងអម្បាលម៉ាននៅលើដីរុស្ស៊ី ឲ្យចុះមកនៅ ត្រឹម ៤៥៥នាក់ ក្រោយពីរដ្ឋសភាអាមេរិក បានអនុម័ត ទណ្ឌកម្មបន្ថែមទៀតប្រឆាំងរុស្ស៊ី ក្រោមលេសថា ម៉ូស្គូ បានលូកដៃចូលក្នុងការបោះឆ្នោតប្រធានាធិបតីនៅ សរអា។
ក្នុងបទសម្ភាសន៍នោះ លោកប្រមុខរដ្ឋរុស្ស៊ី ក៏ព្រមានថា បើភាគីអាមេរិក ស្រាប់តែបង្កើនគំនាបថែមទៀត នាំឲ្យខូចដល់ផលប្រយោជន៍រុស្ស៊ី នោះម៉ូស្គូរក្សាសិទ្ធិឆ្លើយបកវិញ ប៉ុន្តែក្នុងដំណាក់ឥឡូវ គាត់ជំទាស់នឹងវិធានការបកវិញបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ