សន្និសីទអន្តរជាតិស្តីពីជំងឺអេដស៍ឆ្នាំ២០១៧ បានលទ្ធផលយ៉ាងណា ?
សន្និសីទអន្តរជាតិស្តីអំពីការប្រយុទ្ធប្រឆាំងនឹងជំងឺអេដស៍ បានបិទបញ្ចប់នៅថ្ងៃពុធទី ២៦កក្កដា ២០១៧ ល្ងាចមិញ។ អ្នកស្រាវជ្រាវជាង៦០០០នាក់ មកពីគ្រប់ជ្រុងនៃពិភពលោក បានជួបប្រជុំគ្នារយៈពេលបួនថ្ងៃនៅទីក្រុងប៉ារីស ដើម្បីបង្ហាញអំពីលទ្ធផលការងាររបស់គេផង និងដើម្បីបូកសរុបលទ្ធផលនៃកិច្ចខិតខំប្រឹងប្រែងប្រយុទ្ធប្រឆាំងនឹងរោគរាតត្បាតមួយនេះផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
សន្និសីទអន្តរជាតិស្តីពីជំងឺអេដស៍ឆ្នាំនេះ បានបើកទ្វារជាមួយនឹងដំណឹងល្អ ៖ ការរាតត្បាតនៃវីរ៉ុសហ៊ីវ បានបន្ថយល្បឿន នៅទូទាំងពិភពលោក និងជាមួយការខ្វល់ខ្វាយខ្លាំងរឿងថវិកា ព្រោះសហរដ្ឋអាមេរិកបានប្រកាសអំពីគម្រោងចង់កាត់បន្ថយវិភាគទានឱ្យមូលនិធិពិភពលោកប្រឆាំងនឹងជំងឺស៊ីដាចំនួនប្រមាណ១ពាន់លានដុល្លារ។
ប៉ុន្តែសន្និសីទអន្តរជាតិនេះជាជំនួបវិទ្យាសាស្ត្រច្រើនជាង ! សន្និសីទឆ្នាំ២០១៧ ផ្តោតជាសំខាន់ទៅលើការចាប់ផ្តើមអំពាវនាវឱ្យមាន “ការព្យាបាលរយៈពេលវែង”។ ការសិក្សាដំបូងជាច្រើនបានបង្ហាញអំពីប្រសិទ្ធិភាព និងភាពងាយនៃវិធីព្យាបាលនេះ ៖ ប្តូរពីការលេបថ្នាំគ្រាប់ជារៀងរាល់ថ្ងៃ អស់មួយជីវិត មកជាការប្រើថ្នាំចាក់ ជារៀងរាល់៨អាទិត្យម្តងវិញ។ វិធីសាស្ត្រនេះ ក៏នឹងអាចយកទៅប្រើប្រាស់ក្នុងនាមជាវិធានការការពារ ជាពិសេសសម្រាប់ក្រុមជនអ្នកប្រឈម។
ក្តីសង្ឃឹមធំមួយទៀត ផុសចេញសន្និសីទឆ្នាំនេះ គឺបទបង្ហាញនៃការសិក្សានៅអាហ្វ្រិកខាងត្បូង ដែលបង្ហាញជីវិតកុមារអាហ្វ្រិកខាងត្បូងម្នាក់កើតមកមានផ្ទុកមេរោគអេដស៍ ហើយបានទទួលថ្នាំព្យាបាល តាំងពីដំបូងភ្លាមរយៈពេល៤០សប្តាហ៍គត់ រួចក៏ឈប់។ ៩ឆ្នាំក្រោយ វីរ៉ុសបន្តវត្តមានក្នុងខ្លួនកុមារមែន ប៉ុន្តែកុមារនោះអាចត្រួតត្រាវីរ៉ុសបាន។ ករណីបែបនេះមានតែបីប៉ុណ្ណោះនៅលើលោក និងបានផ្តល់តម្រ៉ុយដ៏សំខាន់បំផុតសម្រាប់ការស្រាវជ្រាវ។
ទាក់ទងនឹងការប្រយុទ្ធប្រឆាំងនឹងជំងឺឱកាសនិយមដែលកើតឡើងអ្នកមានផ្ទុកវីរ៉ុសហ៊ីវ ក៏មានការវិវឌ្ឍន៍គួរឱ្យកត់សម្គាល់ដែរ។ ការព្យាបាលជំងឺឱកាសនិយមខ្លះមានលក្ខណៈធ្ងន់ធ្ងរណាស់ ប៉ុន្តែការសិក្សាថ្មីៗបានបង្ហាញថាអាចមានវិធីសាស្ត្រព្យាបាលងាយជាង គ្រាន់តែត្រូវការពេលបន្តិចទៀតសិនមុនអាចដាក់ឱ្យប្រើប្រាស់បាន។
ប៉ុន្តែពិភពលោកមិនទាន់យកឈ្នះជំងឺអេដស៍បាននៅឡើយទេ ! អ្នកស្លាប់ព្រោះវីរ៉ុសហ៊ីវបន្តមានជារៀងរាល់ថ្ងៃ ដោយកង្វះសម្ភារៈ។ នេះបើតាមអង្គការគ្រូពេទ្យគ្មានព្រំដែន ដែលបានទាញសញ្ញាអាសន្នថា ថ្វីបើអ្នកជំងឺភាគច្រើនបានទទួលការព្យាបាលមែន ប៉ុន្តែការតាមដានមិនត្រឹមត្រូវ ដោយខ្វះមធ្យោបាយ។ ករណីនេះជាដើមហេតុចំបងមួយដែលនាំមានភាពស៊ាំ ហើយថ្នាំលែងមានប្រសិទ្ធិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ