ម៉ូស្គូតម្រូវឲ្យវ៉ាស៊ីនតោនប្រគល់មកវិញ កម្មសិទ្ធិពីររបស់ស្ថានទូតរុស្ស៊ី ដែលត្រូវបានរឹបអូស
វ៉ាស៊ីនតោនត្រូវតែប្រគល់មកម៉ូស្គូវិញ “ដោយគ្មានល័ក្ខខ័ណ្ឌអ្វីណាទេ” គឺអគារពីរ ជា កម្មសិទ្ធិស្ថានទូតរុស្ស៊ី នៅលើដែនដីសរអា ដែលត្រូវបានអាជ្ជាធរអាមេរិករឹបអូស កាលពីខែធ្នូឆ្នាំទៅមិញ ក្រោមរលកចោទប្រកាន់ថា រុស្ស៊ីលូកដៃចូលក្នុងការបោះឆ្នោត ប្រធានាធិបតីអាមេរិកាំង “ការទាមទារនេះប្រកាសដោយវិមានក្រេមឡាំង ថ្ងៃចន្ទ ១៧ កក្កដា។
ចុះផ្សាយនៅថ្ងៃ៖
“យើង”មិនអាចទទួលយកបានឡើយ” ការចងជាល័ក្ខខ័ណ្ឌអ្វីណា សម្រាប់បង្វែរមកយើងវិញ នូវនិវេសនដ្ឋានស្ថានទូតយើង។ តាមយោបល់យើង កម្មសិទ្ធិទូតរបស់រុស្ស៊ីនេះ ត្រូវតែប្រគល់មកយើងវិញ ដោយគ្មានល័ក្ខខ័ណ្ឌ និងគ្មានការពិភាក្សា “សេចក្តីនេះ ថ្លែងទៅពួកអ្នកកាសែត ដោយអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ។
គឺកាលពីចុងខែធ្នូឆ្នាំ២០១៦ ដែលរដ្ឋបាលប្រធានាធិបតី អូបាម៉ា បានបណ្តេញអ្នកការទូតរុស្ស៊ី ៣៥នាក់ និងគ្រួសារគេ ចេញពីសរអា មកពី ជាប់ចោទថាបានជ្រៀតជ្រែកចូលក្នុងការបោះឆ្នោតប្រធានាធិបតីអាមេរិក ព្រមទាំងបានបញ្ជា ឲ្យបិទហើយខ្ទប់ទុកអគារពីររបស់ស្ថានទូតរុស្ស៊ី ៖មួយនៅក្រុង New York មួយទៀត ក្នុងរដ្ឋ Maryland ដែលសុទ្ធតែត្រូវវ៉ាស៊ីនតោនបកស្រាយថា វារមែងប្រើដោយពួកចារបុរស រុស្ស៊ី នៅលើដីអាមេរិកតែម្តង។
សេចក្តីថ្លែងការណ៍របស់លោក ពេស្កូវ បន្លឺឡើងនៅចំថ្ងៃដែល មន្ត្រីលំដាប់ទី៣ នៃក្រសួងការបរទេសសរអា លោក Thomas Shannon ត្រូវទទួលជួបនៅក្រុងវ៉ាស៊ីនតោន លោកអនុរដ្ឋមន្ត្រីការបរទេសរុស្ស៊ី Serguei Riabkov។ តាមពិត ជំនួបនេះ ត្រូវបានគ្រោងធ្វើនៅក្រុងរុស្ស៊ី Saint-Petersbourg តាំងពីខែមិថុនាម៉្លេះ ប៉ុន្តែ ត្រូវម៉ូស្គូលុបទៅវិញ ក្រោយពីអាមេរិកបានដាក់ទណ្ឌកម្មថ្មី ប្រឆាំងរុស្ស៊ី មកពីជម្លោះចេះតែបន្តទៅ នៅ អ៊ុយក្រែន។
ស្របនឹងប្រភពការទូត ពិតជាក្នុងជំនួបលើកនេះ ដែលតំណាងការបរទេសរុស្ស៊ីនិងអាមេរិក ត្រូវពិភាក្សា អំពីបញ្ហាកម្មសិទ្ធិទូតរបស់រុស្ស៊ី។ តាមដែលលោកពេស្កូវលំអិតឲ្យដឹង ៖ ប្រធានបទនេះ ក៏ត្រូវបានលើកយកទៅនិយាយ “ក្នុងន័យជាក់លាក់” ដោយលោកប្រធានាធិបតីរុស្ស៊ី វ៉្លាឌីមៀរ ពូទីន និងសមភាគីអាមេរិកាំង លោក ដូណាល់ ត្រាំ ក្នុងបរិវេណនៃកិច្ចច្រជុំកំពូល ហ្ស៊េ-២០ នៅក្រុងអាល្លឺម៉ង់ ហំបួក កាលពីថ្ងៃ ៧ កក្កដា។ គាត់បន្ថែមថា ម៉ូស្គូ នៅតែសង្ឃឹមថា អាមេរិកមុខជានឹងបង្ហាញឲ្យឃើញ នូវគតិបណ្ឌិតនិងឆន្ទៈនយោបាយរបស់ខ្លួនពុំខាន។
ក្នុងសប្តាហ៏មុន ម៉ូស្គូបានប្រកាសថា នឹងជញ្ជឹងគិត អំពី”ចម្លើយបកវិញយ៉ាងច្បាស់លាស់” ទល់នឹងការបណ្តេញអ្នកការទូតរុស្ស៊ី ៣៥នាក់ និងគ្រួសារគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ