សហគ្រាសនៅអ៊ុយក្រែននិងរុស្ស៊ីវាយប្រហារយ៉ាងខ្លាំងដោយ Cyberattack
រលក Cyberattack យ៉ាងខ្លាំងក្លាដែលធ្វើឲ្យនឹកឃើញប្រភេទសកម្មភាពនៃមេរោគ WannaCry កាលពីខែឧសភាស្រាប់តែបានវាយប្រហារថ្ងៃអង្គារ២៧មិថុនាក្នុងពេលជាមួយគ្នាទៅលើសហគ្រាសភាគច្រើននៅអ៊ុយក្រែននាំឲ្យច្របូកច្របល់ដល់ការងារធនាគារនិងអាកាសយានដ្ឋានចំណែកនៅរុស្ស៊ីបានធ្លាក់ខ្លួនរងការវាយប្រហារនោះក៏ទាំងក្រុមហ៊ុនប្រេងដ៏ធំសំបើមរបស់រដ្ឋក្រោមឈ្មោះ ថា RosNeft។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
គ្មានចំណងអ្វីណាជាផ្លូវការត្រូវបានកំណត់ឡើយរវាងការវាយប្រហារប្លែកៗនោះដែលតាមអាការៈក្រៅដូចជាក្នុងពេលជាមួយគ្នាប៉ុន្តែព័ត៌មានផ្តល់ដោយសហគ្រាសជាច្រើនសឲ្យឃើញថាជាមេរោគទារប្រាក់លោះទំហំ ៣០០ ដុល្លារលេចចេញមកនៅលើកញ្ចក់កុំព្យូទ័ររបស់គេ។
ដោយមកពីការវាយប្រហារនេះ អ្នកធ្វើដំណើរនៃមេត្រូក្រុងគៀវមិនអាចបង់ថ្លៃធ្វើដំណើរតាមបណ្ណធនាគារផ្ទាំងប័ណ្ណូប្រកាសដំណឹងនៅអាកាសយានដ្ឋានក្រុងគៀវបែរទៅជាលែងដើរ ហើយបណ្តាធនាគារអ៊ុយក្រែនបង្ខំចិត្តផ្អាកសេវាខ្លះសម្រាប់អតិថិជនខ្លួន។
នៅរុស្ស៊ី ក្រុមហ៊ុន RosNeft ជាក្រុមហ៊ុនផលិតប្រេងមួយដ៏ធំបំផុតក្នុងលោក បានត្អូញថាខ្លួនរងគ្រោះនឹង“ ការវាយប្រហារយ៉ាងខ្លាំង “ ប៉ុន្តែបានអះអាងថា ផលិតកម្មប្រេងនៅតែបន្តប្រព្រឹត្តទៅឥតអាក់ខានឡើយដោយសារ Serveur ដែលមានបម្រុងទុក។ រោងចក្រផលិតដែកថែប Evraz ក៏បានរងការវាយប្រហារដែរ- ការនេះ ត្រូវបានថ្លែងដោយអ្នកនាំពាក្យរបស់រោងចក្រទៅទីភ្នាក់ងារព័ត៌មានរុស្ស៊ី RIA Novosti ។
តាមទិន្នន័យរបស់ក្រុមហ៊ុន Group-IB ដែលមានឯកទេសកម្មខាងសុវត្ថិភាពព័ត៌មាន ៖ សរុបទៅនៅរុស្ស៊ និងអ៊ុយក្រែន មានសហគ្រាសប្រមាណ ៨០ បានរងការវាយប្រហារ។ ក្នុងនោះមានក្រុមហ៊ុនរុស្ស៊ីRosNeftនិងធនាគារធំៗនៅអ៊ុយក្រែនព្រមទាំងក្រុមហ៊ុន Mars Nivea Auchan និងបណ្តាស្ថាប័នរបស់រដ្ឋាភិបាលអ៊ុយក្រែន។
តាមប្រភពនោះដដែល ការវាយប្រហារលើកនេះ គឺបណ្តាលមកពី “មេរោគទំនើប” ក្រោមឈ្មោះថា Petya។
តាមសំដី ស្ត្រីអ្នកនាំពាក្យនៃគណៈរដ្ឋមន្ត្រីអ៊ុយក្រែន វ៉េបសៃរដ្ឋាភិបាលនេះ នារសៀលថ្ងៃអង្គារ បានពើបប្រទះនឹងការលំបាកលុះរហូតទាល់តែឈប់ដំណើរការទៅផង។ មូលហេតុវា ស្ថិតនៅក្នុងការសិក្សាដោយពួកអ្នកឯកទេសប៉ុន្តែមិនភ្ជាប់ការលំបាកនេះទៅនឹង Cyberattack ប្រកាសដោយស្ថាប័នសន្តិសុខអ៊ុយក្រន NBU ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ