អង្គការសហប្រជាជាតិ៖ទីផ្សារគ្រឿងញៀនពិភពលោកកំពុងជួប”ភាពរុងរឿង”
ការិយាល័យអង្គការសហប្រជាជាតិប្រឆាំងគ្រឿងញៀននិងឧក្រិដ្ឋកម្ម បានចេញរបាយការណ៍ប្រចាំឆ្នាំ២០១៧ បង្ហាញពីការរីកចំរើននៃទីផ្សារគ្រឿងញៀនក្នុងពិភពលោក ខណៈអ្នកស្លាប់ដោយគ្រឿងញៀនមានការកើនឡើង។ របាយការណ៍នេះឆ្លុះបញ្ចាំងពីការកើនឡើងនៃការផលិតគ្រឿងញៀនកូកាអ៊ីន អាភៀន និងការកើនឡើងនៃប្រភេទថ្នាំញៀនសំយោគ។ អ្នកដែលស្លាប់ដោយសារគ្រឿងញៀននៅសហរដ្ឋអាមេរិក មានតួលេខត្រូវនឹង ១ភាគ៣នៃមនុស្សស្លាប់ដោយគ្រឿងញៀនក្នុងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
“ប្រសិនបើពេលថ្មីៗនេះ គេនាំគ្នាយកចិត្តទុកដាក់ដល់សារធាតុមេតំហ្វេតាមីន គេមិនត្រូវភ្លេចទេថា ការផលិតកូកាអ៊ីន និងសារធាតុអាភៀន ដែលទាក់ទងផ្នែកសរសៃប្រសាទ មានការកើនឡើង” នេះជាប្រសាសន៍របស់លោកយូរី ហ្វេដូតូវ Yuri Fedotov ជាប្រធានការិយាល័យអង្គការសហប្រជាជាតិប្រឆាំងគ្រឿងញៀននិងឧក្រិដ្ឋកម្ម។ ការិយាល័យនេះមានទីតាំងនៅក្រុងវីយែន ប្រទេសអូទ្រីស។
ឆ្នាំ២០១៦ ការបង្កបង្កើនផលនៅអាហ្វហ្កានីស្ថានមានដំណើរការល្អប្រសើរ ធ្វើអោយការផលិតអាភៀនក្នុងពិភពលោក កើនឡើង១ភាគ៣ ប្រៀបនឹងឆ្នាំ២០១៥។ អាភៀនផ្តល់ផលបរិមាណជាង៦៣០០តោន។ តួលេខនេះទាបជាងតួលេខឆ្នាំ២០១៤ ប្រមាណជា២០ភាគរយ។ ឆ្នាំ២០១៤ ជាឆ្នាំដែលភោគផលការផលិតអាភៀន កើនដល់កម្រិតកំពូល។ ចំពោះការដាំដុះដំណាំកូកាដែលប្រើសម្រាប់ផលិតកូកាអ៊ីនវិញ គេឃើញមានការកើនឡើង៣០ភាគរយ ពីឆ្នាំ២០១៣ដល់ឆ្នាំ២០១៥ ពិសេសការដាំដុះនៅកូឡុំប៊ីតែម្តង។
យោងតាមរបាយការណ៍ការិយាល័យអង្គការសហប្រជាជាតិប្រឆាំងគ្រឿងញៀននិងឧក្រិដ្ឋកម្ម គ្រឿងញៀនអេរ៉ូអ៊ីន ដែលអាជ្ញាធរអាមេរិករឹបអូសបានក្នុងស្រុក បានកើនឡើងខ្ពស់ ក្នុងឆ្នាំ២០១៥។ អង្គការសហប្រជាជាតិបានសំដែងការបារម្ភពីបញ្ហានៅអាមេរិក ដោយបានប្រដូចបញ្ហានេះទៅនឹងជំងឺរាតត្បាត។ នៅសហរដ្ឋអាមេរិក ការដែលគេប្រើប្រាស់នូវថ្នាំដែលផលិតដោយអាភៀន ដូចជាថ្នាំបំបាត់ការឈឺចាប់ ហ្វង់តានីល Fentanyl លាយជាមួយសារធាតុអេរ៉ូអ៊ីន ជារឿងគ្រោះថ្នាក់ខ្លាំងណាស់។
ហ្វង់តានីលជាគ្រឿងញៀនមានឥទ្ធិពលខ្លាំងជាងអេរ៉ូអ៊ីនដល់ទៅ៥០ដង ហើយខ្លាំងជាងមរហ្វ៊ីនដល់ទៅ១០០ដង។ អ្នកដែលស្លាប់ដោយសារគ្រឿងញៀននៅសហរដ្ឋអាមេរិក មានតួលេខត្រូវនឹង ១ភាគ៣នៃអ្នកស្លាប់ដោយគ្រឿងញៀនក្នុងពិភពលោក។ ការប្រើគ្រឿងញៀនហួសកម្រិតនៅអាមេរិកបានកើន១ជា៣ ពីឆ្នាំ១៩៩៩ ដល់ឆ្នាំ២០១៥។ ក្រៅពីនៅសហរដ្ឋអាមេរិក អង្គការសហប្រជាជាតិសង្កេតឃើញថា ការប្រើប្រាស់សារធាតុញៀននៅអឺរ៉ុប ហាក់បានកើនឡើងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ