ក្នុងរយៈពេល ៣ថ្ងៃ រដ្ឋមន្រ្តី៤រូបរបស់លោកម៉ាក្រុង លាលែងចេញពីតំណែង
រដ្ឋមន្រ្តីសំខាន់ៗរបស់លោក អេម៉ានុយអែល ម៉ាក្រុង ដូចជា រដ្ឋមន្រ្តីការពារជាតិ រដ្ឋមន្រ្តី យុត្តិធម៌ បានលាលែង ពីតំណែង។ នៅពីថ្ងៃក្រោយរដ្ឋមន្រ្តីក្រសួងដែនដី រីឆាដ ហ្វេរ៉ង់ លាចេញពីតំណែង លោកហ្រ្វង់ស័រ បីរូ រដ្ឋមន្រ្តីក្រសួងយុត្តិធម៌ បានប្រាប់ទីភ្នាក់ងារព័ត៌មានAFPថា លោកបានដើរចេញពីរដ្ឋាភិបាល នៅថ្ងៃពុធទី ២១មិថុនា។ ក្នុងរយៈពេល ៣ថ្ងៃ រដ្ឋមន្រ្តីសំខាន់៤រូបរបស់រដ្ឋាភិបាលលោកម៉ាក្រុង បានសុំលាលែងពីតំណែង។
ចុះផ្សាយនៅថ្ងៃ៖ កែប្រែថ្ងៃទី៖
លោកហ្វ្រង់ស័រ បីរូ ប្រកាសលាចេញពីតំណែងរដ្ឋមន្រ្តីក្រសួងយុត្តិធម៌។ តាមមន្រ្តីបក្សកណ្តាលនិយម Modem លោកស្រី រដ្ឋមន្រ្តីកិច្ចការអឺរ៉ុប មុយរីយែល ដឺ សាកនែស ដែលជាអនុប្រធានបក្សកណ្តាលនិយម បន្ទាប់ពីលោកបីរូ នឹងលាលែងចេញពីតំណែង ដើម្បី ទៅធ្វើជាប្រធានក្រុមបក្សModem នៅសភា។ ការលាលែងចេញពីតំណែងរដ្ឋមន្រ្តី របស់លោកបីរូ និងរបស់លោកស្រី ដឺ សាកនែស ធ្វើឡើង នៅមួយថ្ងៃក្រោយ លោកស្រី ស៊ីល្វី ហ្គូឡារបានសុំលាលែងចេញពីតំណែង រដ្ឋមន្រ្តីការពារជាតិបារាំង។
គិតមកដល់ថ្ងៃពុធនេះ មានរដ្ឋមន្រ្តីបួនរូប របស់លោកម៉ាក្រុងបានចុះចេញពីតំណែង ដែលនៅក្នុងនោះ មានម្នាក់ ជារដ្ឋមន្រ្តី ជំនិតរបស់លោកម៉ាក្រុង គឺលោក រីឆា ហ្វែរ៉ង់ ដែលបានសុំលាលែងផងដែរ ពីតំណែងរដ្ឋមន្ត្រីក្រសួងដែនដីបារាំង។
ការលាលែងចេញពីតំណែងរបស់លោកហ្វ្រង់ស័រ បីរូ ធ្វើឡើងនៅប៉ុន្មានម៉ោងមុន ការរុះរើរដ្ឋាភិបាល របស់លោកEduard Philippe ដែលគេរំពឹងថា ឈ្មោះ សមាជិករដ្ឋាភិបាលថ្មី នឹងត្រូវប្រកាសឲ្យដឹង នៅយប់ថ្ងៃពុធនេះ មុននឹងបញ្ជូនទៅឲ្យសភា បោះឆ្នោតអនុម័តគាំទ្រ។
លាលែងពីតំណែងដោយសារតែសំណាញ់ស៊ើបអង្កេតរបស់តុលាការ
រដ្ឋមន្រ្តីទាំង៤រូប ដែលបានសុំលាលែងចេញពីតំណែង គឺជារដ្ឋមន្រ្តីដែលកំពុងជាប់ពាក់ព័ន្ធនឹងរឿងអាស្រូវពុករលួយ កេងលុយរដ្ឋ។ ឧទាហរណ៍ លោករីឆាដ ហ្វេរ៉ង់ រដ្ឋមន្រ្តីដែនដីដែលស្និទ្ធនឹងលោកប្រធានាធិបតីម៉ាក្រុង កំពុងត្រូវតុលាការស៊ើបអង្កេតថា បានប្រព្រឹត្តអំពើពុករលួយ ក្នុងសំណុំរឿងទិញដូរអចលនទ្រព្យ។ ចំណែក រដ្ឋមន្រ្តីក្រសួងយុត្តិធម៌ ហ្វ្រង់ស័រ បីរូ លោកស្រីរដ្ឋមន្រ្តី ការពារជាតិ ហើយនិងរដ្ឋមន្រ្តីកិច្ចការអឺរ៉ុប ទាំងបីនាក់ ជាថ្នាក់ដឹកនាំរបស់គណបក្សកណ្តាលនិយម Modem ដែលកំពុងជាប់ក្នុងសំណាញ់ ស៊ើបអង្កេតរបស់តុលាការបារាំង។
ត្រូវដឹងថា តាំងពីដើមខែមិថុនា នេះ រដ្ឋអាជ្ញាបារាំងបានបើកការស៊ើបអង្កេតទៅលើគណបក្សកណ្តាលនិយម របស់លោកហ្រ្វង់ស័រ បីរូ ដែលគេសង្ស័យថា បានបន្លំ ចុះឈ្មោះបុគ្គលិកបក្សរបស់ខ្លួន ឲ្យធ្វើជាអ្នកជំនួយការរបស់សមាជិកសភាអឺរ៉ុប ដូចជាលោកស្រីរដ្ឋមន្រ្តីដឺ សាកនេស ជាដើម ដើម្បីអាចទទួលបានប្រាក់ខែពីសភាអឺរ៉ុប ប៉ុន្តែ មិនដែលបានធ្វើការឲ្យសភាអឺរ៉ុបនោះទេ។
លោកម៉ាក្រុងមិនបានដាក់សម្ពាធលើរដ្ឋមន្រ្តីឲ្យលាលែងចេញពីតំណែង
លោករីឆាដ ហ្វេរ៉ង់ ជារដ្ឋមន្រ្តីតែម្នាក់ ដែលលោកម៉ាក្រុង បានទាមទារឲ្យចាកចេញពីតំណែងរដ្ឋមន្រ្តីក្រសួងដែនដី។ លោកហ្វេរ៉ង់ ដែលស្និទ្ធនឹងលោកអេម៉ានុយអែល ម៉ាក្រុង ត្រូវដកចេញពីសមាជិករដ្ឋាភិបាល ប៉ុន្តែ លោកត្រូវលោកម៉ាក្រុងជ្រើសរើសឲ្យធ្វើជាប្រធានបក្សកាន់អំណាច នៅសភា ដែលជាតំណែងសំខាន់មួយដែរ។
ក្នុងករណី របស់រដ្ឋមន្រ្តីបីរូបផ្សេងទៀត អ្នកនាំពាក្យរបស់រដ្ឋាភិបាល Christophe Castanerបាននិយាយថា រដ្ឋមន្រ្តីបានលាលែងចេញពីតំណែងដោយខ្លួនឯង និងដោយសារតែហេតុផលផ្ទាល់ខ្លួន។ ពួកគេចង់មានសេរីភាព ពេញទី ដើម្បីចេញមុខការពារខ្លួន នៅក្នុងករណីប្តឹងផ្តល់របស់តុលាការ ពោលគឺមិនបានស្ថិតនៅក្រោមការដាក់សម្ពាធណាមួយ ពីលោកប្រធានាធិបតីម៉ាក្រុងនោះទេ។ យ៉ាងណាក៏ដោយ អ្នកនាំពាក្យរបស់រដ្ឋាភិបាល ទទួលស្គាល់ថា ការដើរចេញពីរដ្ឋាភិបាល របស់រដ្ឋមន្រ្តីដែលជាប់សង្ស័យ កេងលុយរដ្ឋ អាចជួយសម្រួល បើកផ្លូវឲ្យរដ្ឋាភិបាលរបស់លោកម៉ាក្រុងអាចធ្វើការដោយគ្មានមន្ទិល សៅហ្មង។
លោកស្រី រដ្ឋមន្រ្តីការពារជាតិស៊ីល្វី ហ្គូឡា ដែលមកពីបក្សតែមួយ ជាមួយលោកបីរូ គឺបក្សកណ្តាលនិយម Modem បាននិយាយថា លោកស្រី បានសុំលាលែងចេញពីតំណែង ដោយមកពីលោកស្រីចង់បញ្ជាក់ បង្ហាញពី ភាពបរិសុទ្ធ ស្អាតស្អំរបស់គណបក្ស។ គេវាយតម្លៃថា គឺការលាលែងចេញពីតំណែងរបស់លោកស្រី រដ្ឋមន្រ្តីការពារជាតិ គឺជាសំពាធ ជំរុញឲ្យលោកបីរូ ដែលជាប្រធានបក្សModemចុះចេញពីតំណែងរដ្ឋមន្រ្តីយុត្តិធម៌ដែរ។ គេនិយាយដូច្នេះ ព្រោះថា នៅថ្ងៃចន្ទ លោកនាយករដ្ឋមន្រ្តីបារាំង បានអះអាងថា លោកបីរូនៅចង់បន្តចូលរួមក្នុងរដ្ឋាភិបាលថ្មីបារាំង នៅឡើយ នៅក្រោយការរុះរើនៅថ្ងៃនេះ។ ប៉ុន្តែ នៅព្រឹកថ្ងៃនេះ លោកបីរូ បែរជាបង្កឲ្យមានការភ្ញាក់ផ្អើល ដោយបានប្រាប់ទីភ្នាក់ងារព័ត៌មានបារាំង ថា លោកបានសម្រេចដើរចេញពីរដ្ឋាភិបាលរបស់លោកម៉ាក្រុងទៅវិញ។
ជាមួយនឹងការលាលែងចេញពីតំណែងរបស់រដ្ឋមន្រ្តី លោកប្រធានាធិបតីម៉ាក្រុងចង់បង្ហាញភាពស្អាតស្អំរបស់រដ្ឋាភិបាលក្មេងខ្ចីរបស់លោក
ជាមួយនឹងការដើរចេញរបស់រដ្ឋមន្រ្តីដែលជាប់ពាក់ព័ន្ធនឹងរឿងអាស្រូវ រដ្ឋាភិបាលរបស់លោកម៉ាក្រុងបានជ្រះដាច់ស្រឡះ ពីក្តីសង្ស័យថា រដ្ឋាភិបាលរបស់លោកមានមនុស្សដែលមិនស្អាតស្អំ។ ការសុខចិត្តដើរចេញពីរដ្ឋាភិបាល របស់រដ្ឋមន្រ្តី បារាំងស បញ្ជាក់ឲ្យឃើញថា រដ្ឋាភិបាលថ្មីរបស់បារាំង របស់លោកអេម៉ានុយអែល ម៉ាក្រុង គឺជារដ្ឋាភិបាល ដែលប្រមូលផ្តុំដោយមនុស្សស្មោះត្រង់ ស្អាតស្អំ និងក្លាហាន ហ៊ានដើរចេញពីរដ្ឋាភិបាល ដើម្បីកុំឲ្យរដ្ឋាភិបាល ប្រឡាក់ប្រឡូស ដោយសារតែរឿងអាស្រូវផ្ទាល់ខ្លួន។
នៅក្រោយឈ្នះឆ្នោត ក្លាយជាប្រធានាធិបតីបារាំង លោកអេម៉ានុយអែល ម៉ាក្រុងចង់ធ្វើកំណែទម្រង់ស៊ីជម្រៅ ប្រព័ន្ធធ្វើនយោបាយនៅស្រុកបារាំង។ លោកអេម៉ានុយអែល សម្រិតសម្រាំងខ្លាំងណាស់ នៅក្នុងការជ្រើសរើសមនុស្ស អ្នកនយោបាយ ឲ្យមកធ្វើការនៅក្នុងរដ្ឋាភិបាលរបស់លោក។ មុននឹងប្រកាសសមាជិករដ្ឋាភិបាល លោកម៉ាក្រុងធ្លាប់បានទាមទារឲ្យបេក្ខជនត្រូវតែប្រកាសទ្រព្យសម្បត្តិ និងបង់ពន្ធបង់ជូនរដ្ឋ ដើម្បី កុំឲ្យគេចោទថា មន្រ្តីរបស់លោក តាមពិតគឺពុករលួយ ដូចតែគេឯងនោះ។
មួយវិញទៀត ដើម្បីលាងសម្អាត ដុះខាត់គំនិតអ្នកនយោបាយ លោកម៉ាក្រុងនៅបានឯកភាពជាមួយរដ្ឋមន្រ្តីយុត្តិធម៌ គឺលោកហ្វ្រងស័រ បីរូ ក្នុងការបង្កើតច្បាប់ក្រមសីលធម៌នយោបាយ ដើម្បី គ្រប់គ្រងកុំឲ្យអ្នកនយោបាយ រំលោភអំណាច កេងរលុយរដ្ឋ តទៅទៀត។
ក្នុងករណីរបស់លោកហ្រ្វង់ស័រ បីរូ ផ្ទាល់ លោកមិនបានប្រព្រឹត្តអំពើពុករលួយទេ ប៉ុន្តែ គឺបក្សរបស់លោកដែលត្រូវតុលាការស៊ើបអង្កេត។ ប៉ុន្តែ ដោយសម្រេចចាកចេញពីតំណែង ជាជាងនៅត្រាំត្រែង ក្រាញអំណាច រដ្ឋមន្រ្តីបារាំង ក្នុងនាមជាអ្នកស្នើច្បាប់សីលធម៌អ្នកនយោបាយ ចង់បង្ហាញគំរូដល់អ្នកនយោបាយដទៃទៀត។
អ្វីដែលគួរឲ្យសោកស្តាយសម្រាប់បក្សModem ដែលជាដៃគូរបស់បក្សកាន់អំណាច គឺថា ដោយសារតែរឿងអាស្រូវ មានជាប់ពាក់ព័ន្ធនឹងបក្សទាំងមូល គេវាយតម្លៃថា ប្រហែលជានឹងគ្មានសមាជិកណាម្នាក់របស់បក្សនេះ នឹងត្រូវជ្រើសរើសសម្រាប់តំណែងសមាជិករដ្ឋាភិបាលថ្មីដែលលោកនាយករដ្ឋមន្រ្តី នឹងបង្ហាញឲ្យដឹងនៅយប់ថ្ងៃពុធនេះទេ។
ទោះជាគ្មានសមាជិករបស់បក្សកណ្តាលនិយម លោកម៉ាក្រុង មិនខ្វះមនុស្សមកបំពេញរដ្ឋាភិបាល។ រដ្ឋាភិបាលរបស់លោកម៉ាក្រុងជារដ្ឋាភិបាលបារាំងដំបូងគេ ដែលមានលាយចម្រុះដោយអ្នកនយោបាយ មកពីគ្រប់និន្នាការគណបក្ស គឺគ្មានបក្សឆ្វេង ឬបក្សស្តាំផ្តាច់មុខ ដូចរដ្ឋាភិបាលមុនៗនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ