អង្គការសហប្រតិបត្តិការនិងអភិវឌ្ឍន៍សេដ្ឋកិច្ច ព្រមានពីការបែងទីផ្សារការងារ និងគម្លាតសង្គម
នៅថ្ងៃអង្គារនេះ អង្គការសហប្រតិបត្តិការ និងអភិវឌ្ឍន៍សេដ្ឋកិច្ច អូសេដេអឺ បានព្រមានអំពីគ្រោះបែកខ្ញែកទីផ្សារការងារ ដែលជាប្រភពនៃវិសមភាពសង្គម។ ក្នុងខណៈដែលប្រទេសជាសមាជិកកំណើនសេដ្ឋកិច្ចនៅនឹង អង្គការបានជំរុញឱ្យប្រទេសជាសមាជិកអង្គការទាំងអស់បញ្ចេញសកម្មភាពដើម្បីបែងចែកផលបានមកពីកំណើនសេដ្ឋកិច្ច ឱ្យបានប្រសើរឡើង និងដើម្បីទប់ស្កាត់ទិន្នាការប្រជាភិថុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងរបាយការណ៍ផ្សព្វផ្សាយនៅថ្ងៃនេះ នៅក្រុងប៊ែរឡាំងប្រទេសអាល្លឺម៉ង់ អង្គការសហប្រតិបត្តិការនិងអភិវឌ្ឍន៍សេដ្ឋកិច្ច OCDE បានគូសបញ្ជាក់អំពីទិន្នន័យនៃសមមាត្រ ទីផ្សារការងារថា នៅរវាងពីឆ្នាំ១៩៩៥-២០១៥ ការងារល្អមធ្យម បានធ្លាក់ចុះអស់៧,៦ពិន្ទុ នៅក្នុងប្រទេសជាសមាជិករបស់អង្គការ ឯចំណែកការងារដែលមានគុណភាពខ្ពស់ខ្លាំង បានកើនឡើង ៥,៣ពិន្ទុ និងការងារមិនសូវមានតម្លៃសោះវិញ ក៏បានកើនឡើង២,៣ពិន្ទុដែរ។ ចំណែកប្រាក់ខែទាបនិងមធ្យម នៅនឹង ការស្វែងរកការងារគុណភាពកណ្តាលធ្លាក់ចុះ។ មានន័យថា ក្នុងរយៈពេល២០ឆ្នាំនេះ ថ្នាក់កណ្តាលនិងមធ្យមសឹងចេះតែរួញទៅៗ។ នេះបើបានកំណត់សម្គាល់នៃរបាយការណ៍។
តើមកពីមូលហេតុអ្វី ? បើតាមOCDE ដែលមានសមាជិកសុទ្ធតែជាប្រទេសជឿនលឿន គឺដោយសារការលូតលាស់ខ្លាំងនៃបច្ចេកវិទ្យា ដែលជាអ្នកទទួលខុសត្រូវការវិវឌ្ឍន៍នេះ មិនមែនដោយសារវិបត្តិសកលលោកភាវូបនីកម្ម ដែលគ្រប់គ្នាធ្លាប់ចោទដាក់ថាជាដើមហេតុនៃការរើរោងចក្រសហគ្រាសទៅប្រទេសមានតម្លៃពលកម្មថោកទេ។
ការបែងខ្ញែកទីផ្សារការងារនេះ តែងអមជាមួយដោយគម្លាតនៃប្រាក់បៀរវត្សរ៍។ ចំណូលមិនស្មើភាពគ្នា មានគម្លាតខ្លាំងមិនធ្លាប់មាននាពេលនេះអាចជាគ្រោះថ្នាក់ដល់សង្គម។ ចំណូលរបស់ក្រុមអ្នកមានជាងគេ១០% ដំបូង ស្ទុះឡើង លើសចំណូលរបស់អ្នកក្រជាងគេ១០% ដល់ទៅ៩ដង ទល់នឹង៧ដងកាលពី២៥ឆ្នាំមុន។
ទាំងអស់នេះជាកំហុសរបស់ថ្នាក់ដឹកនាំនយោបាយ ដែលគ្មានសមត្ថភាពចែកចាយផលនៃកំណើនសេដ្ឋកិច្ចឱ្យទូលំទូលាយដល់បណ្តាប្រជាជនថ្នាក់ក្រោមនិងមធ្យម។ ទើបចរន្តប្រជាភិថុតបានផុសឡើង និងមិនទទួលដឹងនូវអ្វីដែលហៅថាសកលលោកភាវូបនីយកម្ម។ នយោបាយការងារមិនត្រូវផ្តោតតែលើអត្រាអ្នកអត់ការងារធ្វើ និងការងារទេ តែត្រូវគិតគូរផងដែរ អំពីគុណភាពនៃការងារ (តម្លៃប្រាក់ខែ និងសន្តិសុខ) សមភាពរវាងស្ត្រីនិងបុរស និងភាពធន់នៃការងារក្នុងការបត់បែនប្រឈមនឹងវិបត្តិ ឬសម្របតាមការវិវឌ្ឍន៍នៃបច្ចេកវិទ្យា ! នេះជាការដាស់តឿនរបស់អង្គការOCDE ដោយបញ្ជាក់ទៀតថា នៅក្នុងចំណោមសមាជិកអង្គការ អាល្លឺម៉ង់ជាសិស្សល្អជាងគេ មានអត្រាអត់ការងារធ្វើទាបជាងគេមែន ប៉ុន្តែអាល្លឺម៉ង់ត្រូវប្រឹងខ្លាំងដើម្បីឱ្យមានសមភាពរវាងបុរសនិងស្ត្រីក្នុងទីផ្សារការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ