រដ្ឋាភិបាលលោកម៉ាក្រុង ប្រើសិល្ប៍វិធីចរចាដើម្បីធ្វើកំណែទម្រង់ច្បាប់ការងារ
ចុះផ្សាយនៅថ្ងៃ៖
ស្តាប់ - ០៤:២៧
ដូចបានសន្យាក្នុងពេលឃោសនាបោះឆ្នោត រដ្ឋាភិបាលបារាំងរបស់លោក អេម៉ាណុយអែល ម៉ាក្រុង នឹងធ្វើកំណែទម្រង់ច្បាប់ការងារ។ កំណែទម្រង់នេះនឹងត្រូវអនុម័តដោយក្រិត្យប្រធានាធិបតី ដើម្បីអាចដាក់ឱ្យប្រើប្រាស់បានឆាប់ និងមានប្រសិទ្ធិភាពខ្លាំង។ នៅថ្ងៃអង្គារទី ៦មិថុនា លោកនាយករដ្ឋមន្ត្រី និងលោកស្រីរដ្ឋមន្ត្រីក្រសួងការងារ បានបង្ហើបបង្ហាញគម្រោងកំណែទម្រង់ច្បាប់ការងារ និងកាលវិភាគដែលត្រូវជជែកចរចាជាមួយដៃគូ។ តើរដ្ឋាភិបាលបារាំងថ្មីចង់ធ្វើកំណែទម្រង់ច្បាប់ការងារនេះយ៉ាងដូចម្តេចខ្លះ ? តើមានសង្ឃឹមចេញរួចប៉ុណ្ណា ?
នាយករដ្ឋមន្ត្រីបារាំង លោក អេដ័រ ហ្វីលីព និងលោកស្រីរដ្ឋមន្ត្រីក្រសួងការងារ Muriel Pinicaud បានបង្ហាញផែនទីចង្អុលផ្លូវស្តីពីការធ្វើកំណែទម្រង់ច្បាប់ការងារ សម្រាប់រយៈពេល ១៨ខែខាងមុខ។ បើតាមលោកប្រមុខរដ្ឋាភិបាល ការទំនើបកម្មគំរូសង្គមបារាំង គឺជាការចាំបាច់ និងបន្ទាន់បំផុត បើយោលទៅលើបរិបទសង្គមនិងសេដ្ឋកិច្ចនាសម័យបច្ចុប្បន្ន។ កំណែទម្រង់ដំបូងគេ គឺច្បាប់ការងារ បន្ទាប់មកច្បាប់ធានារ៉ាប់រងសុខភាពនិងភាពអត់ការងារធ្វើ ការសិក្សា និងការចូលនិវត្តន៍។
ទាក់ទងនឹងខ្លឹមសារ កំណែទម្រង់ច្បាប់ការងារផ្តោតលើប្រធានបទបីសំខាន់ ៖ ការបន្ស៊ីកិច្ចព្រមព្រៀងរវាងក្រុមហ៊ុននិងសាខា ដោយមិនផ្តល់អាទិភាពទៅលើតែកិច្ចព្រមព្រៀងរបស់ក្រុមហ៊ុន- សម្រួលនិងពង្រឹងការចរចាសេដ្ឋកិច្ចនិងសង្គម - លែងឱ្យមានកំរិតពិដានប្រាក់សំណងនៅពេលមានជម្លោះបញ្ឈប់ការងារបុគ្គលិក តែត្រូវជំនួសវិញដោយតារាងសំណងនិងផលប្រយោជន៍។
ប្រមុខរដ្ឋាភិបាលបារាំងបានបង្ហាញជំហរដាច់ខាតណាស់ក្នុងការធ្វើកំណែទម្រង់ច្បាប់ការងារ ស្របតាមការចង់បានរបស់លោកប្រធានាធិបតី តែមិនមើលរំលងដៃគូសង្គម ដែលជាក្រុមសហជីពកម្មករនិងថៅកែទេ។ បើតាមផែនទីចង្អុលផ្លូវ និងកាលវិភាគរបស់រដ្ឋាភិបាល ពេញមួយខែមិថុនា និងកក្កដានេះ រដ្ឋាភិបាលនិងដៃគូសង្គមត្រូវជជែកពិភាក្សាគ្នា មិនតិចជាង៤៨លើកទេ។ បន្ទាប់មកនឹងមានការពិគ្រោះយោបល់គ្នាមួយខ្សែទៀត នៅខែសីហានិងកញ្ញា មុននឹងអនុម័តឱ្យប្រើប្រាស់បាន។ រដ្ឋាភិបាលលោកម៉ាក្រុង ចង់ឃើញកំណែទម្រង់ច្បាប់ការងាររបស់ខ្លួន ជាកំណែទទម្រង់ដែលប្រសូតចេញពីព្រមព្រៀងគ្នាដោយពិតៗ។
កំណែទម្រង់ច្បាប់ការងារនេះ មិនត្រូវឆ្លងកាត់ចុះឡើងការតស៊ូមតិនៅសភា និងព្រឹទ្ធសភា ដូចទម្លាប់ទេ។ ដើម្បីបានលឿន និងដូចបានប្រកាសសន្យាក្នុងពេលឃោសនាបោះឆ្នោត កំណែទម្រង់ច្បាប់ការងារនេះ នឹងត្រូវអនុម័ត តាមរយៈការចេញក្រិត្យច្បាប់ ឬក្រិត្យប្រធានាធិបតី។ នៅថ្ងៃទី ២៨មិថុនាខាងមុខនេះ គម្រោងច្បាប់របស់រដ្ឋាភិបាលសុំធ្វើកំណែទម្រង់ដោយចេញក្រិត្យច្បាប់ នឹងត្រូវពិនិត្យនៅក្រុមប្រឹក្សារដ្ឋមន្ត្រី។ ប្រសិនបើមានការព្រមព្រៀង ប្រធានាធិបតីចង់ចេញក្រិត្យច្បាប់នេះឱ្យបានមុខថ្ងៃទី ២១កញ្ញា។
រដ្ឋាភិបាលចង់បានកំណែទម្រង់លឿន និងផ្តល់អាទិភាពខ្លាំងដល់ការពិគ្រោះជាមួយសង្គមស៊ីវិល ក៏ព្រោះរដ្ឋាភិបាលក្មេងខ្ចីនេះយល់យ៉ាងច្បាស់ ថាកំណែទម្រង់ច្បាប់ការងារ ដែលប្រជាពលរដ្ឋបារាំងជំពាក់ចិត្តយ៉ាងខ្លាំង ជាប្រភពនៃភាពតានតឹងនយោបាយនិងសង្គមខ្លាំងណាស់ ទើបផ្តល់ពេលវេលាច្រើនដល់ការចរចាពិភាក្សាជាមួយក្រុមសហជីពនិងក្រុមហ៊ុនច្រើន។
រដ្ឋាភិបាលមុនៗ បានសាកល្បងធ្វើកំណែទម្រង់ច្បាប់នេះដែរ ទោះមានលក្ខណៈសើរៗ មិនស៊ីជម្រៅខ្លាំងក៏ដោយ ក៏តែងបំផុសបំផុលឱ្យចលនាបាតុកម្មជាតិ រុញច្រានប្រទេសឱ្យជាប់គាំងយ៉ាងខ្លាំង។ ជាឧទាហរណ៍នៅឆ្នាំ២០០៦ រដ្ឋាភិបាលចង់ធ្វើកំណែទម្រង់ច្បាប់ការងារដោយបង្កើតកិច្ចសន្យាការងារដំបូងសម្រាប់យុវជនក្រោមអាយុ២៦ឆ្នាំ ប៉ុន្តែចលនាប្រឆាំងនិស្សិតចុះថ្នល់បានធំធេងខ្លាំងបានរុញនាយករដ្ឋមន្ត្រីឱ្យធ្លាក់ពីតំណែង ច្បាប់នោះក៏ត្រូវដកវិញ។ រដ្ឋាភិបាលលោកហូឡង់ ក៏បានធ្វើកំណែទម្រង់ច្បាប់ការងារដែរ តែបានរងការប្រឆាំងដូចគ្នា បាតុកម្មបានរាលដាលបង្កជាអំពើហិង្សាពេញប្រទេស នៅពេលរដ្ឋាភិបាលបានប្រើមាត្រា ៤៩កថាខណ្ឌ៣ នៃរដ្ឋធម្មនុញ្ញ ផ្តល់អំណាចពិសេសឱ្យនាយករដ្ឋមន្ត្រី ក្នុងការសម្រេចឬអនុម័តច្បាប់។ នាយករដ្ឋមន្ត្រីលោក ម៉ានុយអែល វ៉ាល បានរងការរិះគន់ និងអប្រជាប្រិយភាពយ៉ាងខ្លាំង រហូតចាញ់ឆ្នោតមិនទាំងបានក្លាយជាបេក្ខជនប្រធានាធិបតីផង។
សម្រាប់ពេលនេះ គេពុំទាន់ឃើញមានប្រតិកម្មអ្វីចេញមកខាងក្រុមសហជីពកម្មករទេ។ អាចជាពេលវេលារង់ចាំក៏ថាបាន។ ប៉ុន្តែដោយការបោះឆ្នោតសភានឹងខិតមកដល់នៅបីថ្ងៃទៀត ក្រុមអ្នកឆ្វេងនិយម បានផ្តើមបរិហារគម្រោងកំណែទម្រង់នេះហើយ។ គណបក្ស France Insoumise របស់ហ្សង់លុច មេឡង់ស្ហុង បានតាំងខ្លួនជាបក្សប្រឆាំងធំរបស់រដ្ឋាភិបាល។ លោកប្រឆាំងទាំងទម្រង់ (ការប្រើក្រិត្យដើម្បីអនុម័តច្បាប់) ទាំងខ្លឹមសារ (ផ្តល់លទ្ធភាពឱ្យក្រុមហ៊ុនច្រើនពេកក្នុងពេលចរចា)។ អ្នកកុម្មុយនិស្តឆ្វេងនិយម ដែលជាប់លំដាប់លេខបួនក្នុងសម័យបោះឆ្នោតប្រធានាធិបតីជុំទីមួយរូបនេះ បានចាត់ទុកកំណែទម្រង់ច្បាប់ការងារនេះជារដ្ឋប្រហារសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ