អង់គ្លេសតបទៅនាយករដ្ឋមន្ត្រីអាល្លឺម៉ង់ថា"ប្រទេសខ្លួននឹងក្លាយជាដៃគូដ៏រ៉ឹងមាំមួយរបស់អឺរ៉ុប"
“រាជាណាចក្រអង់គ្លេស បានអះអាងថា”អង់គ្លេសនឹងក្លាយជាដៃគូដ៏រ៉ឹងមាំមួយរបស់អឺរ៉ុប”-នេះជាការឆ្លើយតបទៅនឹងលោកស្រី Merkel ដែលកាលពីថ្ងៃអាទិត្យមុនបានថ្លែងថា" អឺរ៉ុបពីអំណេះទៅត្រូវតែពឹងពាក់លើខ្លួនឯងនិងលែងអាចពឹងផ្អែកទៅលើសម្ព័ន្ធមិត្តនៅទីក្រុង Londres ឬក៏នៅ Washington ទៀតឡើយ"។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
“យើងចង់ធានាប្រាប់ប្រទេសអាល្លឺម៉ង់និងបណ្តាប្រទេសធំៗរបស់អឺរ៉ុបផ្សេងៗទៀតថា អង់គ្លេសនឹងក្លាយជាដៃគូដ៏រឹងមាំមួយរបស់សហភាពអឺរ៉ុបនៅលើវិស័យការពារជាតិនិងសន្តិសុខ ហើយយើងក៏រំពឹងទុកដែរនៅលើវិស័យពាណិជ្ជកម្ម” -នេះជាការថ្លែងបញ្ជាក់របស់រដ្ឋមន្ត្រីក្រសួងមហាផ្ទៃអង់គ្លេសនៅលើវិទ្យុ BBC នាខណៈពេលដែលអង់គ្លេសនឹងត្រូវចូលរួមការចរចានៅខែមិថុនាស្តីពីអង់គ្លេសដកខ្លួនចេញពីសហភាពអឺរ៉ុប ។
ការគូសបញ្ជាក់មួយដើម្បីឆ្លើយតបទៅនឹងនាយករដ្ឋមន្ត្រីអាល្លឺម៉ង់ ដែលកាលពីថ្ងៃអាទិត្យមុន បានថ្លែងថា”ចាប់ពីអំណេះតទៅ អឺរ៉ុប ត្រូវតែពឹងពាក់លើខ្លួនឯង ពីព្រោះជំនាន់ដែលអឺរ៉ុបអាចពឹងផ្អែកលើគ្នាបានទៅវិញទៅមកនោះ ស្ទើរតែរលត់បាត់បង់ទៅហើយជាពិសេសអំពីចំណងមិត្ដភាពជាមួយអង់គ្លេស។
រដ្ឋមន្ត្រីមហាផ្ទៃអង់គ្លេសលោកស្រី Amber Rudd បានថ្លែងធានាចំពោះលោកស្រី Merkel ថា អង់គ្លេស ចង់បាននូវភាពជាដៃគូដ៏រឹងមាំនិងជាក់លាក់មួយដើម្បីរក្សាការពារសន្តិសុខនៅក្នុងអឺរ៉ុបទាំងមូល ដើម្បីការពារជនជាតិយើងពីក្រុមភេរវករនៅបរទេសក៏ព្រមទាំងបណ្តាអ្នកដែលពេញចិត្តនឹងប្រទេសយើងដែរ”។
ដោយសារតែប្រទេសអង់គ្លេស ទើបត្រូវទទួលរងដោយការវាយប្រហារភេរវកម្មដ៏កាចសាហាវកាលពី៧ថ្ងៃមុន បញ្ហាការពារសន្តិសុខជាតិនិងការប្រយុទ្ធប្រឆាំងទល់នឹងអំពើភេរវនិយម បានវិលត្រឡប់មកជាបច្ចុប្បន្នភាពឡើងវិញនៅក្នុងប្រទេសអង់គ្លេស។
គួររំលឹកថា នាយករដ្ឋមន្ត្រីអង់គ្លេស Theresa Mayដែលជាអតីតរដ្ឋមន្ត្រីក្រសួងមហាផ្ទៃអង់គ្លេសពីឆ្នាំ២០១០ ដល់ឆ្នាំ២០១៦ ធ្លាប់ទទូលរងនូវការទិតៀនយ៉ាងធ្ងន់ធ្ងរពីមតិសាធារណៈ ដោយសារតែវិធានការរបស់គាត់ក្នុងការកាត់បន្ថយចំនួនមន្ត្រីប៉ូលីស។ ហើយបញ្ហាទាំងនេះ ក៏ប្រហែលជានឹងត្រូវលើកមកពិភាក្សាគ្នាដែរនៅឱកាសយុទ្ធនាការឃោសនាបោះឆ្នោតសភាអង់គ្លេសនាថ្ងៃទី៨មិថុនាខាងមុខ។
ម្យ៉ាងទៀតនៅខណៈពេលកិច្ចចរចាដ៏ស្មុកស្មាញស្តីពីការដកប្រទេសអង់គ្លេសចេញពីអឺរ៉ុប
ដែលនឹងត្រូវចាប់ផ្តើមនៅអំឡុងខែមិថុនា ក្រុមអ្នកជំនាញជាច្រើន មានការមន្ទិលសង្ស័យរូចទៅហើយ ថាអង់គ្លេស អាចជួបនឹងបញ្ហាទន់ខ្សោយនៅលើវិស័យការពារសន្តិសុខជាតិនៅពេលដែលអង់គ្លេសដកខ្លួនចេញពីស្ថាប័ណអឺរ៉ុបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ