ប្រធានាធិបតីថ្មី វ័យក្មេងរបស់បារាំង ប្រលូកក្នុងនយោបាយអន្តរជាតិ ដោយគ្មានការឆ្គាំឆ្គង
ចុះផ្សាយនៅថ្ងៃ៖
ស្តាប់ - ០៧:០៦
ចាប់តាំងពីថ្ងៃព្រហស្បតិ៍កន្លងមកនេះ ប្រធានាធិបតីថ្មី វ័យក្មេងរបស់បារាំង គឺលោកអាម៉ានុយអែល ម៉ាក្រុង បានចាប់ផ្តើម ប្រឡូកចូលក្នុងសៃវៀន នៃនយោបាយកិច្ចការអន្តរជាតិ តាមរយៈជំនួបកំពូលធំៗពីរ គឺកិច្ចប្រជុំអង្គការអូតង់ និងជំនួបកំពូលប្រទេសសេដ្ឋកិច្ចនាំមុខទាំង៧។ ក្នុងរយៈពេល៤ថ្ងៃនេះ លោកម៉ាក្រុង បានជួបជាមួយមេដឹកនាំធំៗ មិនតិចជាង១០រូបទេ ដោយក្នុងនោះមានជាអាទិ៍លោក ដូណាល់ ត្រាំ។ គ្រប់បណ្តាញព័ត៌មាន និងអ្នកនយោបាយ មិនថាក្នុងរឺក្រៅស្រុកបារាំង បានតាមដានឃ្លាំមើល អំពីដំណើរចាប់ផ្តើមរបស់លោក ម៉ាក្រុង លើឆាកអន្តរជាតិនេះ ដោយសារតែ លោកជាប្រធានាធិបតីវ័យក្មេងបំផុត ហើយជាងនេះទៅទៀត លោកម៉ាក្រុង ពុំមានបទពិសោធន៍ ក្នុងកិច្ចការនយោបាយការបរទេសឡើយ។
ក្មេងអាយុ ខ្ចីបទពិសោធន៍
ជំហានដំបូង លើឆាកអន្តរជាតិ របស់លោកប្រធានាធិបតី ម៉ាក្រុង ត្រូវបានគេតាមដានខ្លាំងណាស់។ ដោយសារតែទីមួយ លោក ម៉ាក្រុង ជាប្រធានាធិបតីវ័យក្មេងបំផុតរបស់បារាំង ហើយជាមួយនឹងប្រមុខដឹកនាំប្រទេសមហាអំណាចផ្សេងទៀត ក៏លោកម៉ាក្រុងក្មេងជាងគេដែរ។ អាយុ ៣៩ឆ្នាំ អ្នកខ្លះបានទាំងនិយាយសើចចំអកថា គាត់ប្រៀបបានដូចជាកូនក្មេង បើប្រៀបធៀបទៅអាយុមេដឹកនាំផ្សេងទៀត។
ចំណុចទីពីរនោះ គឺលោកម៉ាក្រុង មិនមានបទពិសោធន៍អ្វីទេ ក្នុងកិច្ចការនយោបាយអន្តរជាតិ។ អ្នកនយោបាយ និងបណ្តាញសារព័ត៌មានបារាំង បានចាប់អារម្មណ៍ខ្លាំង លើចំណុចនេះ ព្រោះគេបារម្ភថា លោកម៉ាក្រុង មិនមានទស្សនវិស័យរួម និងវែងឆ្ងាយ ក្នុងកិច្ចការអន្តរជាតិ ពេលទៅជួបនិយាយជាមួយមេដឹកនាំធំៗ ចាស់ខែ ចាស់ឆ្នាំ ផ្សេងទៀត ដែលគេស្គាល់សំណុំរឿងទាំងអស់យ៉ាងច្បាស់។ ជាងនេះទៅទៀត សំណុំរឿងកិច្ចការអន្តរជាតិ ដែលត្រូវបានយកមកដាក់លើតុ ជជែកគ្នា កាលពីចុងសប្តាហ៍នេះ គឺសុទ្ធតែជារឿងធំៗ ហើយស្មុគស្មាញបំផុត។
តែភាពស្វាហាប់រហ័សរហួន ធ្វើឲ្យគេឯងមានសុទិដ្ឋិនិយម
តែជារួម អ្វីដែលគេសង្កេតឃើញ គឺគេឃើញថា លោកម៉ាក្រុង បានធ្វើប្រកបដោយជោគជ័យ គ្មានការឆ្គាំឆ្គង។ មិនត្រឹមតែមិនបានធ្វើអ្វី ឲ្យរអាក់រអួលទេ តែវត្តមានរបស់ប្រធានាធិបតីវ័យក្មេងបារាំង បានជំរុញឲ្យកិច្ចប្រជុំធំៗទាំងពីរ កាលពីចុងសប្តាហ៍នេះ មានភាពរហ័សរហួន។ នេះគឺដោយសារតែលោកម៉ាក្រុង ជាមនុស្សវ័យក្មេង មានភាពស្វាហាប់។
រវាងកិច្ចប្រជុំអង្គការអូតង់ នៅក្រុងព្រុយសែល កាលពីថ្ងៃព្រហស្បតិ៍ បន្ទាប់មកជំនួបកំពូល ប្រទេសអ្នកមានទាំង៧ G7 នៅក្រុង តាអរមីណា ខាងត្បូងអ៊ីតាលី នៅថ្ងៃសុក្រ និងថ្ងៃសៅរ៍ លោកម៉ាក្រុង បានជួបមួយទល់នឹងមួយ ជាមួយមេដឹកនាំធំៗ មិនតិចជាង១០នាក់ទេ ក្នុងនោះមានដូចជាលោកប្រធានាធិបតីអាមេរិក លោកនាយករដ្ឋមន្ត្រីជប៉ុន លោកនាយករដ្ឋមន្ត្រីកាណាដា ជាដើម។ ក្រៅពីនេះ នៅមានកិច្ចប្រជុំជាក្រុមការងារ ការប្រជុំតុមូល ជាមួយមេដឹកនាំទាំងអស់គ្នា។
រាល់លើក គេសង្កេតឃើញថា លោកម៉ាក្រុង ត្រូវបានមេដឹកនាំប្រទេសផ្សេងទៀត ទទួលរាក់ទាក់ និយាយឆ្លើយឆ្លង ប្រកបដោយការស្មើភាពគ្នា មិនមានអ្នកណា ចាត់ទុកលោក ជាកូនក្មេងឡើយ។ អ្វីដែលពិសេសមួយទៀតនោះ លោកប្រធានាធិបតី ម៉ាក្រុង និងលោកនាយករដ្ឋមន្ត្រីកាណាដា យុស្តាំង ទ្រុយដូ បានបង្ហាញពីភាពល្អូកល្អឺននឹងគ្នា ប្រៀបបាននឹងមិត្តស្និទស្នាល រាប់ឆ្នាំមកហើយ។
វត្តមានរបស់លោកត្រាំ រឹតតែធ្វើឲ្យគេងាកមកសរសើលោកម៉ាក្រុង
លោក ម៉ាក្រុង បានបោះជំហានដោយជោគជ័យ ព្រោះដោយគេសង្កេតឃើញពីភាពស្វាហាប់ ចង់ជជែកចង់ដោះស្រាយបញ្ហា របស់លោកម៉ាក្រុង។ ភាពរហ័សរហួន ស្រស់ស្រាយរាក់ទាក់ របស់លោកម៉ាក្រុង បានធ្វើឲ្យមានបរិយាកាសសុទិដ្ឋិនិយមច្រើន នៅក្នុងកិច្ចប្រជុំ។ តែចំណែក លោកដូណាល់ ត្រាំ បានជោគជ័យមួយបែបផ្សេង គឺបានធ្វើឲ្យថ្នាក់ដឹកនាំប្រទេសដ៏ទៃ ឈឺក្បាល និងកើតការហ្មងសៅ បានជោគជ័យមែន។
ក្នុងរយៈពេល ៤ថ្ងៃកន្លងមកនេះ លោកដូណាល់ ត្រាំ បានបន្ថែមបញ្ហាជាបន្តបន្ទាប់។ ជាក់ស្តែង នៅក្នុងពេលប្រជុំអង្គការអូតង់ នៅក្រុងព្រុយសែល លោកត្រាំ បានធ្វើសន្ទរកថា ដែលមានខ្លឹមសារធ្ងន់ធ្ងរ ស្តីបន្ទោស និងគំរាម ដល់ប្រទេសសមាជិកអូតង់ រឿងប្រាក់វិភាគទាន។ ចំណែកក្នុងការប្រជុំប្រទេសG7 វិញ លោកត្រាំ បានយកជើងរាទឹក ដោយរារាំង មិនឲ្យមានសេចក្តីថ្លែងការរួម ដែលមានខ្លឹមសារទូលំទូលាយ ទាក់ទងនឹងបញ្ហាអាកាសធាតុ។ លោកត្រាំ បានបង្ករបញ្ហា ដោយបានគំរាមដកខ្លួនចេញពីកិច្ចព្រមព្រៀងក្រុងប៉ារីស ស្តីពីអាកាសធាតុ ទៀតផង។
លោកម៉ាក្រុង បានចេញមុខ ចរចាមួយទល់មួយ ជាមួយលោកត្រាំ ដើម្បីនិយាយបញ្ចុះបញ្ចូល ឲ្យអាមេរិក ព្រមបន្តការប្តេជ្ញាប្រយុទ្ធនឹងបម្រែបម្រួលអាកាសធាតុ។ ត្រង់ចំណុចនេះយើងឃើញនឹងភ្នែក ថា លោក ម៉ាក្រុង បានដើរតួចិត្តល្អ ចេញមុខការពារភពផែនដី ទល់នឹងតួចិត្តជាមារជ្រែក គឺលោក ដូណាល់ ត្រាំ។ មុនបិទការប្រជុំ លោកដូណាល់ ត្រាំ បាននិយាយថា លោកនឹងសម្រេចក្នុងរយៈពេល១សប្តាហ៍ទៀត ថាសហរដ្ឋអាមេរិក ត្រូវចេញ រឺមិនចេញពីកិច្ចព្រមព្រៀងក្រុងប៉ារីស។
គេមិនទុកចិត្ត ពីសមត្ថភាពធ្វើការ របស់រដ្ឋាភិបាលលោកដូណាល់ ត្រាំ
សកម្មភាព បន្ថែមការលំបាករបស់លោកត្រាំ នេះ គឺវាបូកផ្សំជាមួយនឹង រឿងរ៉ាវខាងក្រៅផ្សេងទៀត បង្ករឡើងដោយក្រុមការងារ និងលោកដូណាល់ ត្រាំដោយផ្ទាល់។ តួយ៉ាង លោកត្រាំ បាននិយាយទម្លាយកិច្ចការសម្ងាត់ របស់ចារកិច្ចអ៊ីស្រាអែល ប្រាប់ទៅអគ្គរដ្ឋទូតរុស្ស៊ី។ ហើយក្រោយមកទៀត រដ្ឋាភិបាលរបស់លោកត្រាំ បានទម្លាយព័ត៌មាននៃការស៊ើបអង្កេត ស្តីពីភេរវកម្មនៅទីក្រុងម៉ាន់ឆេស្ទឺ ប្រាប់ទៅបណ្តាញព័ត៌មានអាមេរិកទៀត។ ការនេះ បានបង្ករឲ្យរដ្ឋាភិបាល អង់គ្លេសខឹងជាខ្លាំង។
បញ្ហាទាំងអស់នេះ បានចូលរួម ធ្វើឲ្យគ្រប់ថ្នាក់ដឹកនាំបណ្តាប្រទេសធំៗ មានការមិនទុកចិត្ត ទៅលើសមត្ថភាពធ្វើការ របស់រដ្ឋាភិបាលលោកដូណាល់ ត្រាំ។ គេមិនទុកចិត្តរឿងធ្វើការប្រហែស ម្តងជាពីរដង ហើយថែមទាំងគេមិនទុកចិត្ត រឿងលោកត្រាំ ប្តូរចិត្តចុះឡើង និយាយមិនដឹងដើម មិនដឹងចុង ទៀតផង។
កន្លែងនេះហើយ ដែលធ្វើឲ្យគ្រប់គ្នា ងាកមកសរសើរ និងពេញចិត្ត ចំពោះលោកម៉ាក្រុង ដោយសារគេឃើញប្រធានាធិបតីវ័យក្មេងរបស់បារាំង រូបនេះបានធ្វើល្អជាង ក្មេងតែអាយុ តែគេមានភាពចាស់ទុំក្នុងស្មារតី និងបុគ្គលិកលក្ខណៈ មិនដូចលោកត្រាំ ដែលចាស់តែអាយុ តែមានចរិកក្រអឺតក្រទម ក្អេងក្អាង មិនចុះសម្រុងនឹងគេឯង។
ត្រៀមខ្លួន ជួប ប្រធានាធិបតីពូទីន នៅប៉ារីស
ថ្ងៃចន្ទ ស្អែកនេះ ជំនួបដ៏សំខាន់មួយទៀត កំពុងរងចាំលោកប្រធានាធិបតីបារាំង គឺលោកម៉ាក្រុង និងទទួលស្វាគមន៍លោក ប្រធានាធិបតីពូទីន នៅទីក្រុងប៉ារីស។ ជំនួបនេះ ពិតជាសំខាន់ណាស់ សម្រាប់នយោបាយការបរទេសបារាំង និងពិភពលោក។ លោកម៉ាក្រុង បានមកកាន់តំណែងជាប្រធានាធិបតីបារាំង ដោយបាននាំមកនូវចរន្តគំនិតថ្មី ដែលគេចង់ឃើញបារាំង ដើរតួសំខាន់ ក្នុងកិច្ចការដឹកនាំសហភាពអឺរ៉ុប រួមទាំងចូលរួមដោះស្រាយកិច្ចការអន្តរជាតិ មិនមែនទុកសៃវៀន ឲ្យរុស្ស៊ីអាន់ជ្រីតែម្នាក់ឯង។
រវាងរុស្ស៊ី និងសហភាពអឺរ៉ុប គឺយើងមិនបាច់និយាយក៏ដឹងថា វាមានបញ្ហាកំរិតណាដែរ។ លោកពូទីន ធ្លាប់ទាំងបានគាំទ្រ បេក្ខភាពលោកស្រី ម៉ារីន ឡឺប៉ែន ក្នុងពេលបោះឆ្នោតប្រធានាធិបតីបារាំងទៀតផង ព្រោះលោកស្រីនេះ មានចេតនាចង់បំបែករំលាយសហភាពអឺរ៉ុប។ បើសហភាពអឺរ៉ុបធ្លាក់ទន់ខ្សោយ គឺមានន័យថា រុស្ស៊ីនឹងរឹតតែខ្លាំង។ ចំណែកលោក ម៉ាក្រុងវិញ គាត់ធ្លាប់បាននិយាយថា លោកមិនទៅស្ញប់ស្ញែង លើកពូទីនទូលលើក្បាល ដូចមនុស្សមួយចំនួនធ្វើទេ។ លោកថា លោកធ្វើទៅមិនរួច ដោយលោកពូទីន និងលោក មានស្មារតី និងទស្សនវិស័យ ខុសគ្នាឆ្ងាយពេក។ ក្នុងជំនួប នៅថ្ងៃចន្ទ ទី២៩ ឧសភានេះ លោកម៉ាក្រុង ចង់បង្ហាញគោលជំហររឹងប៉ឹងជាមួយរុស្ស៊ី និយាយគ្នាត្រង់ទៅត្រង់មកជាមួយប្រធានាធិបតីពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ