អង់គ្លេស៖ភេរវកម្មអត្តឃាតបានសម្លាប់មនុស្សយ៉ាងតិច ២២នាក់ និងរបួសប្រមាណ ៦០នាក់នៅ Manchester
ចុះផ្សាយនៅថ្ងៃ៖
ស្តាប់ - ០៦:២៣
នៅក្នុងប្រទេសអង់គ្លេស មានមនុស្សស្លាប់យ៉ាងតិច ២២នាក់ និងរបួសប្រមាណជា ៦០នាក់នៅ Mancheter Arena កាលពីយប់ថ្ងៃចន្ទ ទី២២ ឧសភា។ គិតតាំងពី ១២ឆ្នាំកន្លងទៅ នេះជាភេរវកម្មដែលបានសម្លាប់មនុស្សច្រើនជាងគេនៅក្នុងប្រទេសអង់គ្លេស។ ខណៈនេះ នៅមិនមានជន ឬចលនាណាមួយចេញមុខប្រកាសជាស្នាដៃរបស់ខ្លួននៅឡើយទេ។ លោកស្រីនាយករដ្ឋមន្រ្តីអង់គ្លេស Theresa May បានបញ្ចេញប្រតិកម្មបរិហារភេរវកម្មដ៏តក់ស្លុត និងគួរឲ្យភ័យខ្លាច។ ចំណែកប្រតិកម្មអន្តរជាតិថ្កោលទោស និងសារចូលរួមរំលែកទុក្ខជាមួយក្រុមគ្រួសារជនរងគ្រោះបានធ្លាក់មកជាបន្តបន្ទាប់។
គឺនៅក្នុងរង្គសាលមួយឈ្មោះ Mancheter Arena នៅក្រុង Manchester ដែលមានផ្ទុះអំពើភេរវកម្មអត្តឃាតកាលពីយប់ថ្ងៃចន្ទ ទី២២ ឧសភាវេលាម៉ោង ១០ និង៣០នាទីយប់ ម៉ោងក្នុងប្រទេសអង់គ្លេស ត្រូវជាម៉ោង ៤ និង៣០នាទីទើបភ្លឺ ម៉ោងក្នុងប្រទេសកម្ពុជានាថ្ងៃអង្គារ ទី២៣ ឧសភា។ រង្គសាល Mancheter Arena ដែលអាចដាក់មនុស្សបានដល់ទៅ ២០ ០០០នាក់មានការរៀបចំប្រគំតន្រ្តីច្រៀងដោយកញ្ញាតារាចម្រៀងអាមេរិកាំងវ័យក្មេងម្នាក់ឈ្មោះ Ariana Grandé។ ក៏ប៉ុន្តែ ភេរវកម្មអត្តឃាតនោះបានកើតមានឡើង បន្ទាប់ពីការប្រគំតន្រ្តីទើបបញ្ចប់ និងក្នុងពេលដែលក្រុមទស្សនជនផ្តើមនាំគ្នាចេញពីរង្គសាលត្រឡប់ទៅផ្ទះវិញ។
តាមសាក្សីខ្លះឲ្យដឹងថា ភេរវជនបានទាញបំផ្ទុះគ្រាប់បែកជាប់នឹងខ្លួនគេនៅក្នុងរង្គសាល តែខ្លះទៀតថា ភេរវជនបានទាញបំផ្ទុះគ្រាប់បែកនៅផ្នែកខាងក្រៅ ពោលនៅកន្លែងទទួលភ្លៀវរបស់រង្គសាលក្បែរទ្វារដែលទស្សនជនកំពុងប្រជ្រៀតគ្នាចេញ។ ចំណែកនាយករង្គសាល Mancheter Arena បានបញ្ជាក់ជាផ្លូវការថា គ្រាប់បែកពិតជាបានផ្ទុះនៅផ្នែកខាងក្រៅរបស់រង្គសាល ពោលមិនមែននៅកន្លែងមនុស្សអង្គុយទស្សនាការប្រគំតន្រ្តីទេ។ យ៉ាងណាក៏ដោយ រូបភាពវីដេអូបានបង្ហាញឲ្យឃើញនូវហ្វូងមនុស្សភ័យស្លន់ស្លោ រត់ប្រសេកប្រសាចនៅក្នុងរង្គសាលក៏ដូចជានៅខាងក្រៅអាគាររង្គសាល។
តុល្យការបណ្តោះអាសន្នចុងក្រោយឲ្យដឹងថា មានមនុស្សស្លាប់យ៉ាងតិច ២២នាក់ និងរបួសធ្ងន់ ស្រាលប្រមាណជា ៦០នាក់ដែលភាគច្រើនជាក្រុមយុវវ័យដែលស្រឡាញ់ ចូលចិត្ត និងគាំទ្រតារាចម្រៀងអាមរិកាំងកញ្ញា Ariana Grandé។ គួរបញ្ជាក់ថា អ្នករងរបួសក៏មានឱពុក ម្តាយ ឬបងប្អូនដែលបានទៅចាំទទួលកូនៗ ឬសាច់ញាតិចេញពីមើល Concert របស់កញ្ញាAriana ដែរ។ ចំណែករូបកញ្ញា Ariana បានរួចខ្លួនទាំងមូលពីការវាយប្រហារនោះ។
មានភេរវជនអត្តឃាតតែម្នាក់គត់ តែនៅមិនទាន់ស្គាល់អត្តសញ្ញាណ
មេប៉ូលិសក្នុងក្រុង Manchester លោក Ian Hopkins បានបញ្ជាក់នៅព្រឹកថ្ងៃអង្គារ ទី២៣ ឧសភានេះថា ភេរវកម្មអត្តឃាតបានធ្វើឡើងដោយបុរសតែម្នាក់គត់ដែលបានទាញបំផ្ទុះគ្រាប់បែកដែលពាក់ជាប់នឹងខ្លួនគេ និងថា រូបភេរវជននោះក៏បានស្លាប់ភា្លមៗនៅនឹងកន្លែងជាមួយនឹងគ្រាប់បែករបស់គេ។ តាមរូបមេប៉ូលិសក្នុងក្រុង Manchester ដដែល ក្រុមអ្នកស៊ើបអង្កេតបានផ្តើមធ្វើការងារជាមួយក្រុមប៉ូលិសផ្នែកប្រឆាំងភេរវកម្ម និងក្រុមប៉ូលិសផ្នែកស៊ើបការណ៍សម្ងាត់ដើម្បីចង់ដឹងថា តើសេណារីយ៉ូភេរវកម្មអត្តឃាតនោះបានរៀបចំយ៉ាងម៉េច និងមានមនុស្សប៉ុន្មាននាក់ចូលរួម។ អង្គការរដ្ឋអ៊ីស្លាមទើបបានចេញមុខប្រកាសជាស្នាដៃរបស់ខ្លួន។
ភេរវកម្មអត្តឃាតនៅរង្គសាល Mancheter Arena ពេលនេះបានកើតមានឡើង ២ខែក្រោយពីភេរវកម្មនៅក្នុងទីក្រុងឡុងដ៏ដែលបានផ្តាច់ជីវិតមនុស្សចំនួន ៥នាក់។ កាលណោះ បុរសម្នាក់បានបររថយន្តសំដៅលើហ្វូងមនុស្ស និងចាក់សម្លាប់ប៉ូលិសម្នាក់ មុននឹងត្រូវប៉ូលិសបាញ់សម្លាប់វិញ។ បើគិតតាំងពី ១២ឆ្នាំកន្លងទៅ ភេរវកម្មអត្តឃាតនៅ Manchester បានសម្លាប់មនុស្សច្រើនជាងគេ បន្ទាប់ពីភេរវកម្មអត្តឃាតក្នុងទីក្រុងឡុងដ៏កាលពីខែកក្កដា ឆ្នាំ ២០១៥ ដែលបានសម្លាប់មនុស្ស ៥៦នាក់ និងរបួស ៧០០នាក់។
ពិភពលោកចូលរួមសាមគ្គីជាមួយអង់គ្លេស និងផ្ញើសាររំលែកទុក្ខជាមួយជនរងគ្រោះ
ប្រតិកម្មអន្តរជាតិរួមសាមគ្គីជាមួយប្រជារាស្រ្តអង់គ្លេស និងសារចូលរួមរំលែកជាមួយក្រុមគ្រួសារជនរងគ្រោះបានធ្លាក់មកជាបន្តបន្ទាប់។ ចំណែកលោកស្រីនាយករដ្ឋមន្រ្តីអង់គ្លេស Theresa May បានថ្លែងទៅកាន់ប្រជាជាតិ បន្ទាប់ពីលោកស្រីបានកោះប្រជុំក្រុមប្រឹក្សាសន្តិសុខជាបន្ទាន់មួយនៅព្រឹកថ្ងៃអង្គារ ទី២៣ ឧសភា។ លោកស្រីបានថ្លែងបញ្ជាក់ពីចំនួនមនុស្សស្លាប់ និងចំនួនមនុស្សរងរបួសដែលភាគច្រើនជាក្រុមយុវវ័យ និងដែលខ្លះកំពុងស្ថិតក្នុងស្ថានភាពស្ទើរស្លាប់ ស្ទើររស់ដោយសាររបួសរបស់ខ្លួន។ ក្រៅពីបានបរិហារភេរវកម្មអត្តឃាតថាជាទង្វើដ៏កំសាក និងឆ្កួតលីលា លោកស្រីក៏បានគូសបញ្ជាក់ថា អង់គ្លេសកំពុងប្រឈមនឹងការវាយប្រហារភេរវកម្មដោយគ្មានត្រាប្រណី គ្មានការអាសូរ្យពីក្រុមជ្រុលនិយម។
ទន្ទឹមគ្នានោះ លោកស្រី Theresa May ក៏បានបង្ហើបឲ្យដឹងថា ប៉ូលិសប្រហែលជាបានរកឃើញហើយនូវអត្តសញ្ញាណរបស់ជនដៃដល់ តែនៅមិនទាន់បានប្រាប់ឈ្មោះនៅឡើយទេ។ ទន្ទឹមគ្នានេះ ប៉ូលិសបានបញ្ជាក់ពីការឃាត់ខ្លួនបុរសម្នាក់មានអាយុ ២៣ឆ្នាំដែលជាប់ពាក់ព័ន្ធនឹងការវាយប្រហារលើរង្គសាល Mancheter Arena។ សូមជម្រាបជូនថា ការវាយប្រហារនៅ Manchester ពេលនេះបានកើតមានឡើង ចំពេលដែលគណបក្សនយោបាយកំពុងធ្វើយុទ្ធនាការឃោសនាបោះឆ្នោតដើម្បីចូលរួមការបោះឆ្នោតសភាមុនអាណត្តិនាថ្ងៃទី៨ មិថុនាខាងមុខ។ តែពេលនេះ គ្រប់គណបក្សនយោបាយបានសម្រេចផ្អាកយុទ្ធនាការឃោសនាដើម្បីចូលរួមគោរពវិញ្ញាណក្ខន្ធដល់ជនរងគ្រោះ។
ចំណែកប្រតិកម្មអន្តរជាតិកំពុងបន្តធ្លាក់មកជាបន្តបន្ទាប់ពីបារាំង អាល្លឺម៉ង់ រុស្ស៊ី ឬអាមេរិកជាមួយនឹងសារបរិហារលើការវាយប្រហារ សាររួមសាមគ្គីជាមួយប្រជារាស្រ្តអង់គ្លេស និងសារចូលរួមរំលែកទុក្ខជាមួយក្រុមគ្រួសារជនរងគ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ