លោក ម៉ាក្រុង និងលោកស្រី ឡឺប៉ែន មានកម្មវិធីនយោបាយផ្ទុយគ្នាស្រលះ
ដំឡើងចំណាយសាធារណៈ គិតការពារតែប្រយោជន៍ជាតិឯង ដកខ្លួនចេញពីអឺរ៉ុប ឈប់ចាយប្រាក់អឺរូ ... នេះជានយោបាយសេដ្ឋកិច្ចរបស់លោកស្រី ម៉ារីន ឡឺប៉ែន។ តែសម្រាប់លោកម៉ាក្រុងវិញ ប្រយ័ត្នប្រយែងផ្នែកចំណាយថវិកា បើកចំហសេរីនិយម ហើយពង្រឹងអឺរ៉ុប ... ការបោះឆ្នោតប្រធានាធិបតីជុំទីពីរ ឆ្នាំនេះ ប្រៀបដូចជាពុះច្រៀកប្រទេសជាពីរ មានបេក្ខជនពីរ ជាមួយនឹងជំហរទស្សនៈវិស័យនយោបាយសេដ្ឋកិច្ច ផ្ទុយគ្នាដូចមេឃនិងដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
តើបារាំងមានពាណិជ្ជកម្មកំរិតណាសម្រាប់ពិភពលោក ? តើក្រុមហ៊ុនសហគ្រាស និងបុគ្គលិក មានអនាគតយ៉ាងណា ? បើពេលនេះបារាំងកំពុងត្រូវជ្រើសរើសប្រធានាធិបតី ក្នុងចំណោមបេក្ខជនពីររូប ដែលមានទស្សនៈវិស័យសេដ្ឋកិច្ចផ្ទុយគ្នាទាំងស្រុង។
ពិភពលោកភាវូបនីយកម្ម ជាសំណាង! លោក អេម៉ានុយអែល ម៉ាក្រុង មានគម្រោងផ្តល់គ្រប់មធ្យោបាយដើម្បីសម្របខ្លួនទៅតាមពិភពលោកដែលវិវឌ្ឍន៍ តែសម្រាប់លោកស្រីម៉ារីនឡឺប៉ែន បារាំងនឹងត្រូវផ្តាច់ខ្លួនពិភពលោកនោះ ព្រោះពិភពលោកភាវូបនីយកម្មបែបព្រៃ នឹងផ្តល់គ្រោះថ្នាក់ដល់អរិយធម៌ជាតិ។ គ្មានព្រំដែន គ្មានការការពារ ច្បាស់ជារញ៉េរញ៉ៃពេញហើយ ! នេះជាប្រសាសន៍របស់លោកស្រី ម៉ារីន ឡឺប៉ែន ក្រោយចេញលទ្ធផលជុំទីមួយភ្លាម។
លោកស្រី ឡឺប៉ែន បានបង្ហាញឆន្ទៈយ៉ាងច្បាស់លាស់ ចង់ត្រលប់ទៅប្រើលុយចាស់របស់បារាំងវិញ។ ដកខ្លួនឈប់ប្រើលុយអឺរ៉ូ ដែលមានន័យស្មើនឹងចង់ផ្តាច់ខ្លួនចេញពីសហភាពអឺរ៉ុប។ គឺផ្ទុយស្រលះនឹងជំហររបស់លោក អេម៉ានុយអែល ម៉ាក្រុង ដែលការពារយ៉ាងមុតមាំ អឺរ៉ុប ដោយចង់ពង្រឹងការផ្តោះប្តូរសេរី សម្រេចអនុម័តកិច្ចព្រមព្រៀងពាណិជ្ជកម្មអឺរ៉ុបកាណាដា ពង្រឹងពង្រីកស្ថាប័នអឺរ៉ុប តាមរយៈការបង្កើតឱ្យកញ្ចប់ថវិការួមសម្រាប់តំបន់ចាយប្រាក់អឺរ៉ូ។
បេក្ខជនទាំងពីរ ក៏មានទស្សនៈវិស័យខុសគ្នាទទេដែរ ស្តីពីបញ្ហាហិរញ្ញវត្ថុ។ លោកម៉ាក្រុង មានផែនការសន្សំសំចៃ ៦០ពាន់លានអឺរ៉ូ ក្នុងអាណត្តិ៥ឆ្នាំរបស់លោក ដោយលុបប៉ុស្តិ៍រដ្ឋការ១២ម៉ឺនកន្លែង កាន់បន្ថយប្រាក់ឧបត្ថម្ភតាមខេត្ត។ ចំណែកលោកស្រី ឡឺប៉ែន មានគម្រោងជ្រើសរើសមន្ត្រីរដ្ឋការបន្ថែម ដំឡើងកាំប្រាក់ខែ បន្ថែមប្រាក់ខែដល់អ្នកមានចំណូលបៀវត្សរ៍ក្រោម១៥០០អឺរ៉ូក្នុងមួយខែ ជាថ្នូរនឹងការលុបជំនួយឱ្យទៅអ្នកក្រៅមិនមែនបារាំង។
លើផ្នែកសង្គម គូប្រជែងផ្តាច់ព្រ័ត្រទាំងពីរ ក៏គិតខុសគ្នាដែរ លោកម៉ាក្រុងចង់សើរើរបបចូលនិវត្តន៍ របបធានារ៉ាប់រងភាពអត់ការងារធ្វើ គូសវាសទីផ្សារការងារដែលងាយបត់បែនទៅតាមស្ថានការណ៍ ដូចអ្វីក្រុមប្រទេសខាងជើងធ្វើ តែចំពោះលោកស្រី ឡឺប៉ែន បារាំងត្រូវត្រលប់មកប្រកាន់របបចូលនិវត្តន៍អាយុ៦០ឆ្នាំ និងរំលាយច្បាប់ការងារបារាំងដែលធ្វើតាមបញ្ជាអឺរ៉ុប លោកស្រីចង់រក្សាគំរូការងារដូចសម័យឆ្នាំ១៩៦០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ