នរណាជាអនាគតប្រធានាធិបតីបារាំង លោក ម៉ាក្រុង ឬ លោកស្រី ឡឺប៉ែន ?
ចុះផ្សាយនៅថ្ងៃ៖
តើនរណាជាប្រធានាធិបតីបារាំងថ្មីបន្តពីលោក ហ្វ្រង់ស័រ ហូឡង់ ? ជាប្រធានាធិបតីជាភេទស្រ្តីជាលើកដំបូង ឬ ជាប្រធានាធិបតីដែលមានវ័យក្មេងជាងគេបំផុត ? លោក អេម៉ានុយអែល ម៉ាក្រុង នៃចលនា En Marche ! ដែលបានទទួលសំឡេងគាំទ្រនាំមុខគេ ២៣,៨៦% និងលោកស្រី ម៉ារីន ឡឺប៉ែន នៃបក្សរណសិរ្សជាតិ ក្នុងសំឡេង ២១,៤៣% ជាបេក្ខជនអ្នកឈ្នះ បានឡើងទៅប្រកួតនៅជុំទីពីរ នៅថ្ងៃទី ៧ឧសភា ២០១៧។ ឯចំណែកបេក្ខជនមកពីបក្សធំៗ ត្រូវខ្ទាតចេញពីសង្វៀនអស់តាំងពីជុំទីមួយតែម្តង។ នេះជាលទ្ធផលឆ្នោត ដែលពុំធ្លាប់មានសោះក្នុងប្រវត្តិសាស្ត្រសាធារណរដ្ឋបារាំង នារយៈពេលកន្លះសតវត្សរ៍ចុងក្រោយនេះ ប៉ុន្តែវាក៏មិនមែនជាការភ្ញាក់ផ្អើលខ្លាំងទាំងស្រុងឡើយ។
មានវ័យក្មេងអាយុទើបតែ៣៩ឆ្នាំ ! គ្មាននរណាស្គាល់សោះក្នុងពិភពនយោបាយបារាំង មុនឆ្នាំ២០១៣ លោក អេម៉ានុយអែល ម៉ាក្រុង មិនដែលឈរឈ្មោះឱ្យគេបោះឆ្នោត មិនដែលធ្លាប់ជាប់ជាតំណាងរាស្ត្រអ្វីទាំងអស់។ មានភរិយាជាគ្រូអក្សរសាស្ត្ររបស់ខ្លួនកាលនៅវិទ្យាល័យ លោកម៉ាក្រុង បានផ្តើមលេចមុខដំបូងនៅឆ្នាំ២០១៣ ក្នុងនាមទីប្រឹក្សាជំនិតម្នាក់របស់លោកប្រធានាធិបតីបារាំង ហ្វ្រង់ស័រ ហូឡង់។ ជាអ្នកសង្គមនិយម ជាអ្នកឆ្វេងនិយមបែបថ្មី ទំនើប លើកស្ទួយផ្នែកជំនួញ និងសេដ្ឋកិច្ចសង្គម។ នៅថ្ងៃទី ២៦សីហា ២០១៤ លោកត្រូវបានតែងតាំងជារដ្ឋមន្ត្រីក្រសួងសេដ្ឋកិច្ច។ នៅឆ្នាំ២០១៥ លោកបានធ្វើកំណែទម្រង់ បើកទូលាយទីផ្សារ ដោយអនុម័តច្បាប់ឱ្យធ្វើការថ្ងៃអាទិត្យ។
នៅខែមេសា ២០១៦ លោកបានបង្កើតចលនានយោបាយថ្មី ដោយដាក់ឈ្មោះថា En Marche ក្នុងបំណងចង់ឈរឈ្មោះជាប្រធានាធិបតី តែមិនបញ្ចេញ។ នៅថ្ងៃទី ៣០ សីហា ២០១៦ លោកក៏បានលាលែងចេញពីតំណែងរដ្ឋមន្ត្រីក្រសួងសេដ្ឋកិច្ច ហើយពីរបីខែក្រោយក៏បានប្រកាសជាផ្លូវការឈរឈ្មោះជាបេក្ខជនប្រធានាធិបតី ក្នុងនាមជាអ្នកកណ្តាលនិយម តំណាងឱ្យចលនានយោបាយថ្មី។
ក្នុងរយៈពេលមិនដល់កន្លះឆ្នាំផង ចលនានយោបាយបានទទួលការគាំទ្រខ្លាំងឡើងៗ រហូតបានជាប់ឆ្នោតនៅជុំទីមួយ។ នៅក្នុងសុន្ទរកថាក្រោយលទ្ធផលឆ្នោតយប់មិញ លោកបានតាំងខ្លួនធ្វើដូចជាបានឈ្នះឆ្នោត នៅជុំទីពីរ បានក្លាយជាប្រធានាធិបតីបារាំងស្រេចទៅ ហើយ !
លោកស្រី ម៉ារីន ឡឺប៉ែន បានទទួលសំឡេងគាំទ្រកើនឡើង តែមិនបានមុខ
នេះជាលើកទីពីរហើយដែលបេក្ខជនប្រធានាធិបតីបក្សរណសិរ្សជាតិ បានឈ្នះឆ្នោតឡើងដល់ជុំទីពីរ។ កាលពីឆ្នាំ២០០២ លោក ហ្សង់ម៉ារី ឡឺប៉ែន ជាឪពុកលោកស្រីម៉ារីន ឡឺប៉ែន ក៏បានឡើងទៅប្រកួតប្រជែងយកតំណែងប្រធានាធិបតីទល់បក្សស្តាំនិយមម្តងដែរ ក្រោមអារម្មណ៍ភ្ញាក់ផ្អើលជាទីបំផុត ក្នុងសំឡេងគាំទ្រជាង១៨%។
នៅឆ្នាំ២០១៧នេះ ដំណើរឡើងមកដល់ជុំទីពីរ របស់លោកស្រីម៉ារីន ឡឺប៉ែន ត្រូវបានវិទ្យាស្ថានស្ថិតិ ព្យាករ តាំងពីឆ្នាំ២០១៣មក។ លោកស្រី នាំមុខរាល់គ្រប់ការស្ទង់មតិ មុននឹងផ្តើមចុះវិញបន្តិចនៅពេលចុងក្រោយ។ ដូច្នេះហើយបានជាមិនសូវមានការភ្ញាក់ផ្អើល។ លោកស្រី ម៉ារីន ឡឺប៉ែន ដែលមានគោលនយោបាយជាតិនិយមជ្រុល ចង់បិទព្រំដែន ប្រឆាំងនឹងអន្តោប្រវេសន៍ ចង់ចេញពីអឺរ៉ុប ដើម្បីលើស្ទួយសេដ្ឋកិច្ចបារាំង បានធ្វើល្អជាងឪពុក និងបានទទួលសំឡេងគាំទ្រច្រើនជាងឪពុក ប៉ុន្តែតិចជាងការសង្ឃឹមទុក និងមិនបានជាប់ក្នុងលំដាប់ទីមួយ ដូចប្រាថ្នា។
ជាមួយសំឡេងគាំទ្រតែ ២១,៤៣% គឺពិតជាឆ្ងាយនឹងសំឡេង ៥០%ដាច់ខាតដែលត្រូវប្រមូលឱ្យបានដើម្បីបានក្លាយជាប្រធានាធិបតីណាស់ ! ម្យ៉ាងវិញទៀត លោកស្រីហាក់ដូចជាគ្មានសំឡេងបំរុងឯណាច្រើនមកជួយ ដូចលោកម៉ាក្រុងឡើយ។ ក្រោយដឹងលទ្ធផលឆ្នោតជុំទីមួយភ្លាម បេក្ខជននិងបក្សនយោបាយធំៗដែលចាញ់ឆ្នោត ដូចជាលោក បឺណ័រ អាម៉ុង បក្សសង្គមនិយម លោក ហ្វ្រង់ស័រ ហ្វីយ៉ុង បេក្ខជនបក្សសាធារណរដ្ឋ លើកលែងតែបេក្ខជនឆ្វេងនិយមជ្រុល មេឡង់ស្ហុងចេញ បានអំពាវនាវភ្លាម ឱ្យពលរដ្ឋបារាំងនាំគ្នាធ្វើរនាំងឃាំងកុំឱ្យបេក្ខជនម៉ារីន ឡឺប៉ែន បានឡើងជាដឹកនាំប្រទេស ដោយត្រូវទៅបោះឆ្នោតគាំទ្រ ឱ្យលោក អេមានុយអែល ម៉ាក្រុង ទោះបីជាគ្មានជំហរនយោបាយ ដូចគ្នាក៏ដោយ។ តើពលរដ្ឋបារាំងគិតយ៉ាងណា គេនឹងបានដឹងនៅយប់ថ្ងៃទី ៧ ឧសភា។
ប្រតិកម្មអន្តរជាតិនិងអឺរ៉ុប
អ្វីដែលគេព្រួយបារម្ភខ្លាំងបំផុតនោះ គឺគេខ្លាចបេក្ខជននៃបក្សជ្រុលនិយម ឆ្វេង និងស្តាំនិយម ដែលប្រឆាំងអឺរ៉ុប បានឈ្នះឆ្នោតឡើងដល់ជុំទីពីរ។ តែនៅពេលលទ្ធផលនៃការបោះឆ្នោតជុំទីមួយ ប្រៀបដូចជាដកបន្លាមួយចេញពីទ្រូងអឺរ៉ុប (ឧបសគ្គនៅមិនទាន់អស់ ព្រោះបន្ទាប់ពីបារាំង នឹងមានការបោះឆ្នោតសភានៅអាល្លឺម៉ង់ នៅខែកញ្ញា បន្ទាប់មកអ៊ីតាលី នៅឆ្នាំ២០១៨ទៀត។) ! ហានិភ័យនយោបាយទាក់ទងនឹងអឺរ៉ុប មិនត្រឹមត្រូវរលុប អស់មួយភាគទេ តែថែមទាំងបានផ្តល់ពន្លឺនៃសង្ឃឹមឱ្យអឺរ៉ុបផង។
អាល្លឺម៉ង់ របស់លោកស្រី មែរកិល ដែលសំងំតាមដានបំផុតការបោះឆ្នោតបារាំង បានសម្តែងអំណរនឹងជោគជ័យដំណាក់កាលដំបូងរបស់លោក ម៉ាក្រុង។ លោក ម៉ាក្រុង ដែលជាអ្នកសេរីនិយម និងការពារបំផុតអឺរ៉ុប។ ទីផ្សារមូលប័ត្រនៅអឺរ៉ុប បានបើកទ្វារនៅថ្ងៃចន្ទជាមួយនឹងការកើនឡើងយ៉ាងខ្លាំង។ ប្រាក់អឺរ៉ូ ក៏បានឡើងថ្លៃបន្តិចដែរ។ សារព័ត៌មានបរទេស តាំងពីអាមេរិក ដល់សិង្ហបុរី ដោយឆ្លងកាត់ អេស្ប៉ាញ អ៊ីស្រាអែល ... បានចាត់ទុកលទ្ធផលឆ្នោតបារាំងជុំទីមួយថាជាបដិវត្តនយោបាយ។
ប៉ុន្តែផ្ទៃមេឃនយោបាយបារាំង នៅមិនទាន់ស្រលះទេ ! ពីព្រោះថាបេក្ខជន ដែលកំពុងប្រកួតប្រជែងគ្នានៅជុំទីពីរនេះ បើទោះជានរណាត្រូវឈ្នះឆ្នោតនៅថ្ងៃទី ៧ ឧសភា ក្លាយជាប្រធានាធិបតីក៏ដោយ ក៏ត្រូវឆ្លងឧបសគ្គមួយទៀត គឺប្រមូលសំឡេងភាគច្រើនដាច់ខាតនៅក្នុងការបោះឆ្នោតសភាខែមិថុនាខាងមុខទៀត។
អ្នកវិភាគព្រួយបារម្ភខ្លាចបារាំងត្រូវមានរដ្ឋាភិបាលចម្រុះ។ បើគេពិនិត្យមើលទៅលទ្ធផលឆ្នោតជុំទីមួយទៅ មានបេក្ខជនបួនរូបដែលបានទទួលសំឡេងយ៉ាងប្រកៀកប្រកិតគ្នា។ លោក ម៉ាក្រុង ដែលមានចលនានយោបាយក្មេងខ្ចី ថ្វីបើនាំមុខមែន តែក្នុងសំឡេងតិច (តិចជាង២៥%) បើប្រៀបទៅនឹងការបើឆ្នោតប្រធានាធិបតីមុន ត្រូវធ្វើយ៉ាងណាប្រមូលផ្តុំនិង
គណបក្សនយោបាយធំៗជាប្រពៃណី បានចាញ់ និងគ្មានវត្តមានសោះ នៅជុំទីពីរ ដែលជាករណីពិសេសមិនធ្លាប់មានសោះ ក្នុងប្រវត្តិសាស្ត្រសាធារណរដ្ឋបារាំងចាប់តាំងពី៥០ឆ្នាំមក កំពុងបង្វិលបរាជ័យពេលនេះ ទៅជាកម្លាំងសម្រាប់យកឈ្នះនៅក្នុងការបោះឆ្នោតសភា ដើម្បីបានគ្រប់គ្រងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ