សហភាពអឺរ៉ុបប្រារព្ធខួបកំណើត៦០ឆ្នាំ ដោយគ្មានអង់គ្លេស
ចុះផ្សាយនៅថ្ងៃ៖
ស្តាប់ - ០៧:០៤
ថ្នាក់ដឹកនាំប្រទេសអឺរ៉ុប នៅថ្ងៃសៅរ៍ទី២៥មីនា បានជួបជុំគ្នានៅទីក្រុងរ៉ូម ប្រទេសអ៊ីតាលី ដើម្បីបា្ររព្ធ រំលឹកខួប៦០ឆ្នាំនៃសន្ធិសញ្ញាក្រុងរ៉ូម ដែលជាប្រភពកំណើតសហភាពអឺរ៉ុប។ ប៉ុន្តែ សហភាពអឺរ៉ុប នៅថ្ងៃនេះ នឹងប្រារព្ធខួបកំណើតរបស់ខ្លួន ជាមួយសមាជិកចំនួន ២៧ គឺគ្មានអង់គ្លេស ដែលបានសម្រេចចិត្តបោះឆ្នោតប្រជាមតិ ដើរចេញពីអឺរ៉ុប។
ជំនួបកំពូលអឺរ៉ុបបានបើកធ្វើជាពិសេស នៅប្រទេសអ៊ីតាលី ដើម្បីប្រារព្ធខួប ៦០ឆ្នាំ នៃសន្ធិសញ្ញាក្រុងរ៉ូម។ នៅថ្ងៃសៅរ៍ នេះ ថ្នាក់ដឹកនាំកំពូលរបស់បណ្តាប្រទេសសមាជិកសហភាពអឺរ៉ុបត្រូវចុះហត្ថលេខាលើសេចក្តីប្រកាសថ្មីមួយ ដែលនឹងទៅជំនួសលើសេចក្តីប្រកាស ដែលត្រូវបានគេធ្វើ កាលពី៦០ឆ្នាំមុន។
នៅថ្ងៃទី ២៥ មីនា ឆ្នាំ ១៩៥៧ សន្ធិសញ្ញាក្រុងរ៉ូម ត្រូវបានចុះហត្ថលេខា ដោយប្រទេសចំនួន ៦ គឺបារាំង អាល្លឺម៉ង់ អ៊ីតាលី បែលហ្ស៊ិក ហូឡង់ ហើយនិងលុចសំបួរ។ សន្ធិសញ្ញាក្រុងរ៉ូម សំដៅដល់សន្ធិសញ្ញាពីរ គឺសន្ធិសញ្ញាស្តីពីសហគមន៍អឺរ៉ុបផ្នែកថាមពលអាតូមិក ហើយនិងសន្ធិសញ្ញា ស្តីពីសហគមន៍សេដ្ឋកិច្ចអឺរ៉ុប ដែលក្រោយមកបានក្លាយជាសហភាពអឺរ៉ុបរហូតដល់សព្វថ្ងៃនេះ។
សន្ធិសញ្ញាដែលសំខាន់ គឺសន្ធិសញ្ញាស្តីពីសហគមន៍សេដ្ឋកិច្ចអឺរ៉ុប។ សន្ធិសញ្ញានេះបានចែងពីការបង្កើតសហភាពពន្ធគយរួមគ្នា និងបង្កើតឲ្យមានសេរីភាពក្នុងការធ្វើដំណើរចេញចូល របស់មនុស្ស សេវា ទំនិញ ហើយ និងលំហូរមូលធន ក្នុងបណ្តាប្រទេសអឺរ៉ុប ដែលបានចុះហត្ថលេខាលើសន្ធិសញ្ញាក្រុងរ៉ូម។ សន្ធិសញ្ញាបានចែងផងដែរ ពីច្បាប់វិន័យ ដើម្បីជៀសវាងការប្រកួតប្រជែង មិនស្មើភាព និងដើម្បីហាមឃាត់ការលួចបន្លំ ដើម្បីយកចំណេញតែម្នាក់ឯងរបស់ប្រទេសសមាជិកណាមួយ។
ពីមួយឆ្នាំ ទៅមួយឆ្នាំ ជាមួយនឹងកំណើននៃការដោះដូរសេដ្ឋកិច្ច ដែលជាលទ្ធផលនៃការគ្មានរបាំងរនាំងពន្ធគយ នៅព្រំដែន សហគមន៍សេដ្ឋកិច្ចអឺរ៉ុប កាន់តែរីកមាឌ វិសាលភាពធំៗឡើង និងបានប្រែក្លាយជាសហភាពអឺរ៉ុប ដែលមានប្រទេសសមាជិកសរុបចំនួន ២៨ប្រទេស។ ក្នុងរយៈពេល៦០ឆ្នាំទៅនេះ ស្ថាប័នជាច្រើនបានកើតចេញឡើង ដែលមានដូចជាគណៈកម្មការអឺរ៉ុប សភាអឺរ៉ុប និងតុលាការជាដើមអឺរ៉ុប។
សហភាពអឺរ៉ុបប្រារព្ធខួប៦០ឆ្នាំ ក្នុងកាលៈទេសៈដែល សហភាពអឺរ៉ុប កំពុងជួបការបែកបាក់
សមាជិករបស់សហភាពអឺរ៉ុបបានកើនឡើងពី ៦ នៅដំបូងទី មកចំនួន ២៨ប្រទេស។ លំហSchengen បានបើកផ្លូវឲ្យប្រជាជននៅអឺរ៉ុបធ្វើដំណើរដោយសេរី។ ការសិក្សារបស់និស្សិតអឺរ៉ុបក៏ត្រូវបានបើកទូលាយ និងទទួលបានជំនួយពីកម្មវិធីអឺរ៉ុប ដូចជា Eramus ជាដើម។ នេះគេនៅមិនទាន់និយាយពីលុយអឺរ៉ូ រូបិយបណ្ណអឺរ៉ុប រួម ដែលបានជួយសម្រួលច្រើន ក្នុងការចាយវាយរបស់ប្រជាជនអឺរ៉ុប។
សហភាពអឺរ៉ុបនៅតែជាគំរូនៃការរួបរួមគ្នា បើទោះបីជាពេលខ្លះ ត្រូវជួបវិបត្តិផ្ទៃក្នុង ក៏ដោយ។ ជាការពិត ប្រទេសដែលបានសម្រេចចេញ ឬចូលជាសមាជិករបស់សហភាពអឺរ៉ុប ក៏ដោយសារតែគេមើលឃើញប្រយោជន៍របស់ស្ថាប័នអឺរ៉ុប។ ប្រទេសដែលមានសេដ្ឋកិច្ចមធ្យម ដូចក្រិក ឬទន់ខ្សោយ ដូចបណ្តាប្រទេសអឺរ៉ុបខាងកើត ដូចជាប៉ូឡូញ ជាដើម បានទទួលជំនួយថវិកាច្រើនណាស់ពីសហភាពអឺរ៉ុប។
ចំណែកអង់គ្លេសវិញ ដែលមានសេដ្ឋកិច្ចខ្លាំងទី ២ បន្ទាប់ពីអាល្លឺម៉ង់ នៅអឺរ៉ុបបានចូលជាសមាជិកកន្លងមក ដើម្បី ទាញយកប្រយោជន៍ពីទីផ្សារអឺរ៉ុប ដែលនៅក្នុងនោះ អង់គ្លេសអាចគេចផុតពីការបង់ពន្ធលើទំនិញរបស់ខ្លួន។ ប៉ុន្តែ អង់គ្លេស សម្រេចដើរចេញសហភាពអឺរ៉ុបនៅពេលនេះ ក៏ដោយសារតែអង់គ្លេសគិតឃើញថា ប្រយោជន៍ដែលខ្លួនបានពីសហភាពអឺរ៉ុប គឺតិចជាងកម្លាំងដែលខ្លួនបានបរិច្ចាគទៅឲ្យអឺរ៉ុប។ ប្រជាជនអង់គ្លេសបោះឆ្នោត ចាកចេញពីសហភាពអឺរ៉ុប ក៏ដោយសារតែមិនចង់រងការដាក់គំនាបឲ្យអនុវត្តនយោបាយអន្តោប្រវេសន៍របស់អឺរ៉ុប។ សូមបញ្ជាក់ថា កន្លងមក ដោយសារតែ គ្មានការកំណត់ព្រំដែនសម្រាប់អ្នកធ្វើការនៅអឺរ៉ុប ប្រជាជននៅ ប្រទេសអឺរ៉ុបខាងកើតជាច្រើនបានចូលទៅធ្វើការដោយសេរី នៅប្រទេសអង់គ្លេស។ នៅពេលដែលវិបត្តិសេដ្ឋកិច្ចកើតឡើង ប្រជាជនអង់គ្លេសជាច្រើនវាយតម្លៃថា គឺប្រជាជនបរទេស ដែលបានមកដណ្តើមការងាររបស់ពួកគេ។ អង់គ្លេសសម្រេចចាកចេញពីសហភាពអឺរ៉ុបដើម្បីប្រយោជន៍ផ្ទាល់ខ្លួន។
អឺរ៉ុបនៅ តែសាមគ្គីគ្នា
សហភាពអឺរ៉ុបបានបាត់បង់អង់គ្លេស ដែលជាសមាជិកសកម្ម ផ្តល់វិភាគច្រើនច្រើនគួរសមមួយ ក្នុងកញ្ចប់ថវិកាអឺរ៉ុប។ ការចាកចេញរបស់អង់គ្លេស បានស្តែងពីការបាក់បែកផ្ទៃក្នុងរបស់អឺរ៉ុប។ ប៉ុន្តែ អឺរ៉ុបទាំងមូលបែកបាក់ និងដួលរលំដោយសារតែគ្មានអង់គ្លេសនោះទេ។ អឺរ៉ុបនៅតែបោះជំហានទៅមុខ ទោះជាគ្មានអង់គ្លេស។
ក្រិក ហើយនិង ប៉ូឡូញ ប្រទេសទាំងពីរចេញមុខតវ៉ាច្រើនជាងគេ ដោយសារតែ ពួកគេមិនចង់អឺរ៉ុប ភ្លេច ទុកពួកគេ នៅកន្លែង គន្លៀតជញ្ជាំងមួយតែប៉ុណ្ណោះ។ ក្រិក ដែលជាប់វិបត្តិប្រាក់បំណុលចង់ទាមទារឲ្យសហភាពអឺរ៉ុប ដែលជាម្ចាស់ប្រាក់បំណុលមួយផ្នែក យោគយល់ អធ្យាស្រ័យ កុំសង្កត់កប្រជាជនក្រិក ឲ្យត្បិតត្បៀតខ្លាំង រហូតត្រូវបាត់បង់សេវាសង្គម។ ចំណែកប៉ូឡូញវិញ ដែលទទួលប្រាក់ជំនួយច្រើនជាងគេ បំផុត ពីសហភាពអឺរ៉ុប មិនចង់លឺ ពាក្យថា អឺរ៉ុបមានបែងចែកច្រើនក្រុម និងអាចចូលរួម ទៅតាមសមត្ថភាព និងល្បឿនរបស់ខ្លួន។
សហភាពអឺរ៉ុបដែលដឹកនាំមុខដោយប្រទេសសេដ្ឋកិច្ចសំខាន់ៗ ដូចជាអាល្លឺម៉ង់ បារាំង អេស្ប៉ាញ និងអ៊ីតាលីបានស្តាប់លឺពីកង្វល់របស់ក្រិក និងប៉ូឡូញ ប៉ុន្តែ គឺដើម្បី ជៀសវាងកុំឲ្យគេចោទថា យន្តការអឺរ៉ុប មិនដំណើរការ និងដើម្បីអនាគតអឺរ៉ុបមួយថ្មី ទើបអឺរ៉ុបចង់ អនុម័តវិធានការថ្មីៗ នៅតាមវិស័យមួយចំនួន ដោយមិនចាំបាច់ ត្រូវរង់ចាំឲ្យមានការបោះឆ្នោត យល់ព្រមទាំងស្រុងរបស់ប្រទេសសមាជិក។
ការកើនឡើងនៃចលនាប្រជាពិថុត ក្រោយការបោះឆ្នោតលោកដូណាល់ ត្រាំ ជាប្រធានាធិបតីអាមេរិក វិបត្តិជនភៀសខ្លួន ការគំរាមកំហែងរបស់ក្រុមភេរវនិយម ថ្នាក់ដឹកនាំរបស់ប្រទេសអឺរ៉ុបកំពុងប្រឈមនឹងពិភពលោកមួយដែលមិនច្បាស់លាស់។ គេសង្ឃឹមថា ការដកំណែទម្រង់អឺរ៉ុបដ៏ស៊ីជម្រៅ នឹងអាចធ្វើឡើង នៅក្រោយការបោះឆ្នោតនៅប្រទេសអាល្លឺម៉ង់ ហើយនិងបារាំង ដែលនៅក្នុងនោះ ក្រុមគណបក្សស្តាំជ្រុលនិយម ដែលស្អប់ជនបរទេស កំពុងឡើងកូដខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ