ប្រទេសហូឡង់បោះឆ្នោតសភា ក្នុងផ្ទៃនៃសន្ទុះជាតិនិយមជ្រុល
ថ្ងៃពុធទី ១៥ មីនា ២០១៧ ប្រទេសហូឡង់បានរៀបចំការបោះឆ្នោតសភា ដែលជាវិញ្ញាសាដ៏សំខាន់ សម្រាប់ប្រទេស និងសម្រាប់អឺរ៉ុបទាំងមូលផង ព្រោះចរន្តជាតិនិយម ស្អប់ខ្ពើមអឺរ៉ុប អន្តរប្រវេសន៍ ស្ទុះឡើងខ្លាំង គ្រប់ទិសទី មិនថានៅហូឡង់ ឬបារាំង ឬអាល្លឺម៉ង់ទេ។ ថ្វីបើប្រទេសហូឡង់មានកំណើនសេដ្ឋកិច្ចល្អជាងគេនៅក្នុងតំបន់ ចំនួនអ្នកអត់ការងារធ្វើទាប អតិផរណាជាតិសមរម្យមែន ប៉ុន្តែពលរដ្ឋហូឡង់ភាគច្រើននៅអល់អែកក្នុងការគូសសន្លឹកឆ្នោត ! និងច្រើននាក់ចង់ផ្តល់ទំនុកចិត្តលើបក្សដើម្បីសេរីភាពដែលជាចលនាស្តាំនិយមជ្រុលនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ស្ទើរតែគ្មានឱនភាពថវិកាសោះនៅឆ្នាំនេះ និងកំណើនសេដ្ឋកិច្ចលើសពី២% សេដ្ឋកិច្ចប្រទេសហូឡង់មានសុខភាពល្អជាងគេ និងមានភាពប្រកួតប្រជែងខ្លាំងជាងគេក្នុងរង្វង់សហភាពអឺរ៉ុប ! ខុសស្រឡះកាលពីបីឆ្នាំមុន ដែលប្រទេសធ្លាក់ក្នុងវិបត្តិសេដ្ឋកិច្ចដើរថយក្រោយ អត្រាអ្នកអត់ការងារធ្វើឡើងដល់១០% ...
ប្រទេសបានងើបឡើងវិញតាំងពីឆ្នាំ២០១៤ ចំនួនអ្នកអត់ការងារធ្វើថយអស់ពាក់កណ្តាល ដោយសារតែកំណែទម្រង់រចនាសម្ព័ន្ធក្រុមហ៊ុនសហគ្រាស និងនយោបាយគាបរិតត្បិតថវិការបស់រដ្ឋាភិបាលលោក Mark Rutte នៃបក្សស្តាំកណ្តាលនិយម។
ទោះបីជាយ៉ាងដូច្នេះក្តី ក៏ចរន្តជាតិនិយមជ្រុលមិនចុះខ្សោយទេ ! បក្សស្តាំនិយមជ្រុលដើម្បីសេរីភាពរបស់លោក Geert Wilders កំពុងប្រដេញកែងបក្សសេរីប្រជាជននិងប្រជាធិបតេយ្យរបស់លោកនាយករដ្ឋមន្ត្រី (នៅក្នុងចំណោមបក្សតូចធំមធ្យមទាំង២៨ ចូលប្រកួតដណ្តើមអាសនៈ១៥០នៅក្នុងសភា)។ បក្សកាន់អំណាចនៅតែមានការគាំទ្រច្រើនមែន តែអាចទទួលបានអាសនៈនៅក្នុងសភាប្រមាណពី ២៤ទៅ២៨ប៉ុណ្ណោះ ក្នុងចំណោមអាសនៈសរុប១៥០កៅអី បើប្រៀបទៅនឹង៤០អាសនៈក្នុងសភាផុតអាណត្តិ។ គណបក្សនេះទំនងជាត្រូវសហការជាមួយបក្សនយោបាយផ្សេងៗទៀតដើម្បីបានសំឡេងភាគច្រើនដាច់ខាតនៅក្នុងសភាសម្រាប់បង្កើតរដ្ឋាភិបាលចម្រុះ។
ផ្ទុយទៅវិញ បក្សដើម្បីសេរីភាព របស់លោក Geert Wilders ដែលជាបក្សស្តាំនិយមជ្រុល ប្រឆាំងអ៊ីស្លាម ប្រឆាំងអឺរ៉ុប និងអន្តោប្រវេសន៍ បាននាំមុខរហូត តាំងជាច្រើនខែមកហើយ នៅក្នុងការស្ទង់មតិ ! មុននឹងធ្លាក់មកលំដាប់ទីពីរ ឬក៏អាចធ្លាក់ដល់ទៅ៥ បើតាមគំនូសសន្ទទស្សន៍ចុងក្រោយ តែយ៉ាងណាក៏ដោយក៏គណបក្សនេះនៅតែសង្ឃឹមថាបានទទួលការគាំទ្រច្រើនខ្លាំងនៅក្នុងការបោះឆ្នោតនៅថ្ងៃនេះ។ ក្នុងប្រព័ន្ធសមមាត្រដូចនៅហូឡង់ ការឡើងចុះសំឡេង អាចធ្វើឱ្យទម្ងន់នៃបង្កើតរដ្ឋាភិបាលផ្កាប់ផ្ញារបានយ៉ាងស្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ