លោកហ្រ្វង់ស័រ ហូឡង់៖អឺរ៉ុបជាលំហនៃសេរីភាព និងលទ្ធិប្រជាធិបតេយ្យ
ជំនួបកំពូលនៃបណ្តាប្រទេសអឺរ៉ុបនៅសមុទ្រមេឌីទែរ៉ាណេបានបើកធ្វើក្នុងទីក្រុងលីស្បូន ប្រទេសព័រទុយហ្កាល់នៅថ្ងៃសៅរ៍ ទី២៨ មករា។ នាឱកាសនោះ លោកប្រធានាធិបតីបារាំងហ្រ្វង់ស័រ ហូឡង់បានអំពាវនាវអឺរ៉ុបឲ្យឆ្លើយតបដោយភាពម៉ឹងម៉ាត់ទល់នឹងចំណាប់អារម្មណ៍របស់លោកប្រធានាធិបតីអាមេរិកដូណាល់ ត្រាំស្តីពីអឺរ៉ុប។ លោកហ្រ្វង់ស័របានបញ្ជាក់ច្បាស់ៗថា អឺរ៉ុបជាទ្វីបដែលមានតម្លៃ និងមានគោលការណ៍ជាក់ច្បាស់របស់វា និងថា សុន្ទរកថារបស់លោកដូណាល់ ត្រាំបានជួយលើកទឹកចិត្តដល់ក្រុមអ្នកប្រជានិយម។
ចុះផ្សាយនៅថ្ងៃ៖
ស្តាប់ - ០១:៣៦
« អ្វីដែលជាបញ្ហា គឺប្រជានិយម។ សុន្ទរកថាដែលយើងបានឮចេញពីអាមេរិកបានជួយលើកទឹកចិត្តដល់ក្រុមប្រជានិយមដាច់ខាត។ មានការលើកឡើងជាគំនិតថា មិនគួរមានសហភាពអឺរ៉ុបទេ មិនគួររួមរស់ជាសហគមន៍ទេ មិនគួរណាទទួលយកជនភៀសខ្លួនទេ គេត្រូវតែបោះបង់ចោលនូវកិច្ចព្រមព្រៀងស្តីពីអាកាសធាតុ ឬមួយក៏ថា គេត្រូវតែអនុវត្តន៍នយោបាយការពារប្រយោជន៍ផ្ទាល់ខ្លួន។
ពិតជាមិនអាចទៅរួចទេ អឺរ៉ុបមិនមែនជាអ្នកការពារតែប្រយោជន៍ខ្លួនឯងឡើយ អឺរ៉ុបមិនបានបិទទ្វារទេ ហើយអឺរ៉ុបក៏មិនមែនជាទ្វីបដែលគ្មានតម្លៃ និងគ្មានគោលការណ៍ជាក់លាក់របស់វាដែរ។ អឺរ៉ុបត្រូវតែយល់ដឹងឲ្យបានច្បាស់លាស់ពីតម្លៃ និងការទទួលខុសត្រូវរបស់ខ្លួនឲ្យបានច្បាស់លាស់។
យល់ដឹងពីតម្លៃ និងការទទួលខុសត្រូវរបស់ខ្លួនមិនមែនដើម្បីជាការតបស្នងចំពោះអ្នកមុនៗដែលបានបន្សល់ទុកតម្លៃអឺរ៉ុបជាកេរដំណែលប៉ុណ្ណោះទេ តែយើងទាំងអស់គ្នាត្រូវតែបន្តបំពេញកាតព្វកិច្ចនេះសម្រាប់ជំនាន់ក្រោយៗទៀត។
ចូរកុំភ្លេចថា អឺរ៉ុបគឺជាកម្លាំងមួយ អឺរ៉ុបគឺជាការធានាមួយ អឺរ៉ុបគឺជាការ ការពារមួយ ហើយអឺរ៉ុបក៏ជាលំហនៃសេរីភាព និងលទ្ធិប្រជាធិបតេយ្យដែរ។ ខ្ញុំគោរពគោលការណ៍ទាំងអស់នេះជានិច្ច »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ