តំបន់អឺរ៉ុបមួយផ្នែកកំពុងប្រឈមនឹងការបំពុលបរិយាកាសដ៏ធ្ងន់ធ្ងរពុំធ្លាប់មានពីមុនឡើយ
តំបន់អឺរ៉ុបមួយផ្នែក កំពុងប្រឈមនឹងការបំពុលបរិយាកាសដ៏ធ្ងន់ធ្ងរ ជាពិសេសដោយសារតែចរាចរនៅលើដងផ្លូវ មានសភាពណែនណាន់តាន់តាប់ពេកនៅតាមទីក្រុងធំៗ។ ដូច្នេះហើយបានជាអាជ្ញាធរទីក្រុង ប៉ារីស ទីក្រុង Londres ឬនៅក្រុង Cracovie ប្រទេស ប៉ូឡូញ នាំគ្នាចាត់វិធានការជាបន្ទាន់ដើម្បីទប់ស្កាត់នឹងការបំពុលបរិយាកាសដ៏ធ្ងន់ធ្ងរបែបនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
តំបន់អឺរ៉ុបមួយផ្នែកកំពុងប្រឈមនឹងការបំពុលបរិយាកាសដ៏ធ្ងន់ធ្ងរពុំធ្លាប់មានពីពេលមុន ឡើយ។ នៅប្រទេសបារាំង អាជ្ញាធរ បានចេញបំរាមមិនឲ្យអ្នកមានរថយន្តចាស់ខ្លាំងចាប់ពី២០ឆ្នាំឡើងទៅ បើកបរនៅលើផ្លូវក្នុងទីក្រុងប៉ារីសនិងនៅក្រុងGrenobleឡើយ ។
នៅឯទីក្រុងLondres ប្រទេសអង់គ្លេសវិញ អាជ្ញាធរ បានទូន្មានប្រជាជនខ្លួនអោយកម្រិតការចេញដើរក្រៅផ្ទះ ដើម្បីជៀសវៀងការរងផ្សែងពុលនៅក្នុងបរិយាកាសដែលកំពុងគ្របដណ្តប់នៅលើប្រទេសអង់គ្លេស។ ក្នុងករណីដែលទីក្រុង Londres ត្រូវប្រឈមនឹងការរងផ្សែងពុលយូរពេលនោះ សាលាក្រុង ថែមបានគិតគូរពីការអភិវឌ្ឈន៍នៅលើកង់ជិះដើម្បីអនុញ្ញតអោយពលរដ្ឋអង់គ្លេស ប្រើប្រាស់ជំនួសយាន្តយន្តវិញ។ នៅលើគម្រោងការណ៍នេះ សាលាក្រុងអង់គ្លេស សន្យាថានឹងជួយជាថវិការជាង១ពាន់លានអឺរ៉ូ។
នៅប្រទេសប៉ូឡូញ ក្រុងCracovie ដែលស្ថិតនៅភាគខាងត្បូងប្រទេស ត្រូវបានគេចាត់ទុកជាក្រុងមួយដែលរងដោយផ្សែងពុលខ្លំាងជាងគេបំផុត។ ដូចនេះហើយ បានជាសភានៅតំបន់Cracovie ទើបនឹងអនុម័តសេចក្តីសម្រេចជាលើកទីមួយដើម្បីទប់ស្កាត់ប្រឆាំងនឹងការបំពុលបរិយាកាស ដោយមានវិធានការដាក់ជំនួសចង្រ្កានកំដៅផ្ទះដែលប្រើអុស ចាប់ពីពេលនេះរហូតដល់ឆ្នាំ២០២៣ខាងមុខ។
ចំពោះអ្នកជំនាញវិញ យល់ឃើញថា ពុំចាំតែដល់ពេលរងផ្សែងពុលខ្លាំង ទើបគេនាំគ្នាចាត់វិធានការទប់ស្កាត់នោះទេ ផ្ទុយទៅវិញ គេត្រូវតែខិតខំចាត់វិធានជាបណ្តើរៗទៅ។ ហើយដើម្បីប្រយុទ្ធប្រឆាំងទល់នឹងការបំពុលបរិយាកាសនេះដែរ ប្រជាជនរាល់រូបគួរតែផ្លាស់ប្តូរឥរិយាបទរៀងរាល់ថ្ងៃរបស់ខ្លួន ដូចជាការចេញដើរឬក៏ជិះកង់វិញ ជំនួសការជិះរថយន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ