ម៉ាលី៖វត្តមានចុងក្រោយរបស់លោកហូឡង់ក្នុងជំនួបកំពូលបារាំង អាហ្រ្វិកនៅបាម៉ាកូ
នៅថ្ងៃសៅរ៍ ទី១៤ មករានេះ ទីក្រុងបាម៉ាកូ ប្រទេសម៉ាលីធ្វើជាម្ចាស់ផ្ទះរៀបចំជំនួបកំពូលបារាំង អាហ្រ្វិក។ លោកប្រធានាធិបតីបារាំងហ្រ្វង់ស័រ ហូឡង់ និងសមភាគីម៉ាលីលោកអ៊ីប្រាហ៊ីម ប៊ូបាកាធ្វើជាសហប្រធានដឹកនាំជំនួបកំពូលដែលមានការចូលរួមពីប្រមុខរដ្ឋ និងប្រមុខរដ្ឋាអាហ្រ្វិកប្រមាណជា ៣០រូប។ ការពង្រឹងសន្តិសុខ លទ្ធិប្រជាធិបតេយ្យ និងការអភិវឌ្ឍន៍ គឺជាប្រធានបទសំខាន់នៃជំនួបកំពូលបារាំង អាហ្រ្វិកឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:១៥
សម្រាប់លោកប្រមុខរដ្ឋបារាំងហ្រ្វង់ស័រ ហូឡង់ នេះជាវត្តមានលើកចុងក្រោយរបស់លោកនៅក្នុងជំនួបកំពូលបារាំង អាហ្រ្វិក មុននឹងបញ្ចប់អាណត្តិជាផ្លូវការនាខែឧសភាខាងមុខ។ នាឱកាសនោះ លោកហូឡង់បានបញ្ជូនសារនយោបាយទៅកាន់តំបន់អាហ្រ្វិកដែលបារាំងបានចូលរួមនៅក្នុងកិច្ចសហប្រតិបត្តិការយោធាចំនួនពីរកាលពីឆ្នាំ ២០១៣ គឺនៅក្នុងប្រទេសម៉ាលី និងនៅសាធារណរដ្ឋអាហ្រ្វិកកណ្តាល។ សម្រាប់ថ្នាក់នាំអាហ្រ្វិកភាគច្រើន ជំនួបកំពូលបារាំង អាហ្រ្វិកពេលនេះក៏ជាឱកាសមួយដើម្បីសម្តែងការអរគុណចំពោះលោកហូឡង់ដែលបានយកចិត្តទុកចំពោះតំបន់អាហ្រ្វិកដែរ។
មានប្រធានបទអាទិភាពមួយចំនួនដែលជំនួបកំពូលលើកទៅជជែករួមមាន ការពង្រឹងសន្តិសុខនៅក្នុងតំបន់ប្រឈមទប់នឹងការគំរាមកំហែងរបស់ក្រុមជីហាត ការពង្រឹងលទ្ធិប្រជាធិបតេយ្យ និងបង្កើនការអភិវឌ្ឍន៍រវាងប្រទេសនៅក្នុងតំបន់។ វិធានការពង្រឹងលទ្ធិប្រជាធិបតេយ្យ និងតម្លាភាពនៃការរៀបចំបោះឆ្នោតត្រូវបានគេមើលឃើញថា សុទ្ធសឹងជាប្រធានបទដ៏រសើបខ្លាំងនៅក្នុងជំនួបកំពូលសម្រាប់ប្រទេសអាហ្រ្វិកមួយចំនួននៅក្នុងតំបន់។ ការហ៊ាននិយាយយ៉ាងដូចនេះព្រោះមានប្រមុខរដ្ឋខ្លះដែលត្រូវចប់អាណត្តិបានព្យាយាមធ្វើវិសោតនកម្មច្បាប់រដ្ឋធម្មនុញ្ញដើម្បីអនុញ្ញាតឲ្យខ្លួនអាចតោនអំណាចបន្ថែមទៀត។
ក្រៅពីសំណុំរឿងផ្ទៃក្នុងរវាងប្រទេសនៅក្នុងតំបន់ ជំនួបកំពូលក៏ត្រូវជជែកលើប្រធានបទមួយចំនួនដែលទាក់ទងជាមួយតំបន់ផ្សេងដែរ ពិសេសអឺរ៉ុបក្នុងសំណុំរឿងអាន្តោប្រវេសន៍។ ជាមួយប្រទេសបារាំង ទំនាក់ទំនងបានផ្តោតខ្លាំងលើផែនការអភិវឌ្ឍន៍ និងផែនការយោធា។ នៅក្នុងផែនការអភិវឌ្ឍន៍ បារាំងបានផ្តល់ជាប្រាក់ជំនួយ និងប្រាក់កម្ចីក្នុងតម្លែការប្រាក់ទាបសរុប ៤ ០០០លានដុល្លារអឺរ៉ូក្នុងមួយឆ្នាំ ហើយទីក្រុងប៉ារីសគ្រោងនឹងដំឡើងឲ្យដល់ ៥ ០០០លានអឺរ៉ូពីពេលនេះដល់ឆ្នាំ ២០១៩។ នៅក្នុងផែនការយោធា បារាំងគ្រោងនឹងជួយបង្ហាត់បង្រៀនទាហានអាហ្រ្វិកឲ្យបាន ២៥ ០០០នាក់ក្នុង ១ឆ្នាំ។
ដោយឡែកនាឱកាសជំនួបកំពូលបារាំង អាហ្រ្វិកឆ្នាំនេះ លោកប្រមុខរដ្ឋបារាំងហូឡង់នឹងប្រកាសបង្កើតមូលនិធិវិនិយោគបារាំង អាហ្រ្វិកលើកទី១ ដែលមានទឹកប្រាក់ ៧៦លានអឺរ៉ូសម្រាប់រយៈពេល ១០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ