បារាំងរងព្យុះរដូវរងារ អ.ស.ប.ស្រែកអាសន្នជំនួសជនភៀសខ្លួន
ព្យុះរដូវរងារ ដែលមានកម្លាំងខ្យល់បោកបក់១៤៦គ.ម.ក្នុងម៉ោង អមដោយទឹកកកសំឡី និងទឹកភ្លៀងយ៉ាងត្រជាក់ បានវាយបោកបក់លើប្រទេសបារាំង នៅយប់មិញ និងកំពុងបន្តទៅឆ្ពោះទៅទិសអាគ្នេយ៍ ព្រមទាំងបណ្តាប្រទេសអឺរ៉ុបបែកខាងកើតមួយចំនួនទៀត។ ព្យុះ កំណាចដ៏កម្រប្រចាំរដូវមួយនេះ បានផ្តាច់ជីវិតមនុស្សម្នាក់ និងបង្កការខូចខាតជាសម្ភារៈជាច្រើន។ ប៉ុន្តែគឺជនភៀសខ្លួន និងអន្តោប្រវេសន៍ទេ ដែលកំពុងរងគ្រោះខ្លាំងជាងគេ។ នេះបើតាមការប្រកាសអាសន្នរបស់អង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០១:៤១
ព្យុះដ៏កំណាចឈ្មោះ Egon បានបោកបក់លើប្រទេសបារាំងភាគខាងជើងទៅអាគ្នេយ៍ និងកំពុងបន្តរាតត្បាត នៅតាមបណ្តាប្រទេសអឺរ៉ុបខាងកើតផ្សេងទៀត ដោយកាត់តាមស្វ៊ីស អាល្លឺម៉ង់។ ក្នុងដំណើរឆ្លងកាត់ប្រទេសបារាំងយប់មិញ ព្យុះកំណាចបានសម្លាប់ជីវិតស្ត្រីវ័យ៣៤ឆ្នាំម្នាក់ ដោយដើមឈើរលើងឬសបាក់រំលំសង្កត់លើ។ មនុស្សជាងមួយពាន់នាក់ ត្រូវជម្លៀស ជាង៣៣០ ០០០គ្រួសារគ្មានអគ្គិសនីប្រើប្រាស់។ ចរាចរណ៍ផ្លូវគោក ត្រូវរអាក់រអួលយ៉ាងខ្លាំង អាជ្ញាធរបានណែនាំឱ្យពលរដ្ឋកំរិតការធ្វើដំណើរ។ រថភ្លើងល្បឿនលឿនភ្ជាប់ពីក្រុងប៉ារីស -ព្រុចសែល ជួបការយឺតយ៉ាវយ៉ាងខ្លាំង។
ឧតុនិយមបារាំងទើបបានលើកសេចក្តីប្រកាសអាសន្នកំរិតខ្ពស់ នៅរសៀលថ្ងៃសុក្រនេះ ប៉ុន្តែភ្នាក់ងារទទួលបន្ទុកជនភៀសខ្លួននៃអង្គការសហប្រជាជាតិ ជាអ្នកទាញសញ្ញាអាសន្នថ្មីមួយទៀត អំពីភាពប្រឈមខ្លាំងរបស់ជនភៀសខ្លួន និងជនអន្តោប្រវេសន៍ ចំពោះអាកាសធាតុត្រជាក់ធ្លាក់ទឹកកក និងព្យុះភ្លៀងរដូវរងារ។ មានជនភៀសខ្លួនយ៉ាងហោចណាស់ក៏៥នាក់ថ្មីទៀត បានស្លាប់ ដោយហេតុតែអាកាសធាតុត្រជាក់ខ្លាំងនេះ។
អង្គការសហប្រជាជាតិ បានស្នើសុំឱ្យរដ្ឋាភិបាលអឺរ៉ុបទាំងអស់ ប្រឹងប្រែងជួយពួកគេ និង បញ្ឈប់ការបញ្ជូនទៅព្រំដែនឱ្យផុតអឺរ៉ុប។ ស្ថានភាពជនភៀសខ្លួន កាន់តែដុនដាបទៅទៀត នៅក្នុងប្រទេសក្រិកនិងស៊ែរប៊ី ដោយជនភៀសខ្លួនរស់នៅក្នុងជំរំក្រណាត់ដែលមិនអាចធន់នឹងអាកាសធាតុព្យុះភ្លៀងទឹកកក ត្រជាក់ក្រោមសូន្យបានឡើយ។ HCR បានអំពាវនាវឱ្យអាជ្ញាធរក្រិកពន្លឿន ការដឹកជញ្ជូនជនភៀសខ្លួនពីកោះ ទៅដែនដីទ្វីប និងសូមឱ្យសមាជិកអឺរ៉ុប ចូលរួមចំណែកជួយ។
បើតាមភ្នាក់ងារអង្គការសហប្រជាជាតិ អាកាសធាតុត្រជាក់ពិបាកទ្រាំ ជនភៀសខ្លួនត្រូវរងអំពើហិង្សា របស់ប៉ូលិសទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ