ណូបែលសេដ្ឋកិច្ច ផ្តល់ជ័យលាភីដល់សេដ្ឋកិច្ចវិទ្យូវិភាគពីសមភាពចំណូលនិងចំណាយ
គណៈកម្មាធិការណូបែល បានប្រកាសនៅថ្ងៃចន្ទទី ១២ តុលានេះ ផ្តល់ជ័យលាភីរង្វាន់ណូបែលសេដ្ឋកិច្ចឆ្នាំ២០១៥ ដល់លោក Angus Deaton សញ្ជាតិអាមេរិក-អង់គ្លេស ចំពោះស្នាដៃស្រាវជ្រាវ ស្តីអំពីសមភាពនៃការចាយវាយ និងប្រាក់ចំណូល ជាពិសេសការចំណាយរបស់អ្នកមានជីវភាពក្រីក្រ។
ចុះផ្សាយនៅថ្ងៃ៖
ស្តាប់ - ០២:១៧
មានអាយុ៦៩ឆ្នាំ កើតនៅតំបន់អេកូសប្រទេសអង់គ្លេស ជាសាស្ត្រាចារ្យសេដ្ឋកិច្ចនៅសកលវិទ្យាល័យ Princetonដ៏ល្បីល្បាញរបស់សហរដ្ឋអាមេរិក លោក Angus Deaton បានក្លាយជាជ័យលាភីរង្វាន់ណូបែលសេដ្ឋកិច្ចប្រចាំឆ្នាំ២០១៥ ចំពោះស្នាដៃវិភាគ អំពីទំនាក់ទំនងរវាង ការចាយវាយ ភាពក្រីក្រ និងសុខុមាលភាព។
លោកបានធ្វើសិក្សាលើចំណុចបីជាសំខាន់ ៖ តើអ្នកចាយត្រូវបែងចែកចំណាយខ្លួនយ៉ាងដូចម្តេច ? នៅក្នុងសង្គមមួយតើគេត្រូវចាយវាយនិងសន្សំទុកប៉ុន្មាន ? តើត្រូវវាស់វែងសុខុមាលភាពរបស់ខ្លួនយ៉ាងដូចម្តេច ? តាមរយៈសំណួរនេះ លោក ឌីតុន បានធ្វើការវិភាគយ៉ាងស៊ីជម្រៅ ដល់ឬសគល់នៃបញ្ហា ដូចជាទំនាក់ទំនងរវាងប្រាក់ចំណូលនិងបរិមាណនៃថាមពលដែលទទួលទានចូល និងទំហំនៃការរើសអើងភេទនៅក្នុងរង្វង់គ្រួសារ។
សម្រាប់រាជបណ្ឌិតសភាស៊ុយអែត ដែលជាគណៈកម្មាធិការណូបែលផ្នែកសេដ្ឋកិច្ច ដើម្បីយល់អំពីនយោបាយសេដ្ឋកិច្ចដែលនាំដល់សុខុមាលភាព និងកាត់បន្ថយភាពក្រីក្រ គេត្រូវយល់ជាបឋមជម្រើសបុគ្គលផ្នែកចាយវាយបរិភោគសិន។ « លោកអេហ្គូ ឌីតុន បានជួយយើងឱ្យយល់កាន់តែច្បាស់បញ្ហានេះជាងគេ។ ដោយភ្ជាប់ជម្រើសបុគ្គលច្បាស់លាស់ ទៅនឹងលទ្ធផលសមូហភាព ការស្រាវជ្រាវរបស់លោក ជាចំណែកមួយនៃការប្តូរផ្លាស់មីក្រូសេដ្ឋកិច្ច មាក្រូសេដ្ឋកិច្ច និងសេដ្ឋកិច្ចអភិវិឌ្ឍន៍។ »
នៅក្នុងសៀវភៅ « ការលំហែ ៖ សុខភាព ភាពស្តុកស្តម្ភ និងប្រភពនៃវិសមភាព » ចេញផ្សាយនៅឆ្នាំ២០១៣ លោក បានរៀបរាប់លម្អិត អំពីថាតើមនុស្សជាតិ បានបង្កើនសុខុមាលភាព ដ៏អស្ចារ្យតាំងពីពីរសតវត្សរ៍កន្លះមុនយ៉ាងដូចម្តេច ? អាយុយឺនយូររបស់មនុស្ស និងការជម្នះលើរោគាខ្លះ ជាសាក្សី។ ប៉ុន្តែលោកក៏បានពន្យល់ដែរអំពីការជឿនលឿន ដែលអមទៅដោយវិសមភាព និងគម្លាតកាន់តែខ្លាំង។ លោកបានបរិហារកម្មវិធីផ្តល់ជំនួយអភិវឌ្ឍន៍អន្តរជាតិ របស់ក្រុមបស្ចឹមលោក ក្នុងការជួយជនទីទ័ល ឱ្យចេញផុតពីភាពក្រីក្រថានៅមានកំរិត។
ទាក់ទងនឹងបច្ចុប្បន្នភាពដ៏ក្តៅគគុកវិញ ស្តីពីបញ្ហាអន្តោប្រវេសន៍ស្វែងរកជីវិតប្រសើរនៅអឺរ៉ុប លោក Angus Deaton បានឆ្លើយយ៉ាងខ្លីថា នេះគឺជាលទ្ធផលនៃការអភិវឌ្ឍន៍មិនស្មើភាពគ្នារាប់រយឆ្នាំ ! ដែលធ្វើឱ្យចំណែកមួយនៃពិភពលោកជួបភាពយឺតយ៉ាវផ្នែកសង្គមនិងសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ