ព័រទុយហ្គាល់បោះឆ្នោតក្រោមបទពិសោធន៍រឹតត្បិតថវិកា និងវិបត្តិក្រិក
បន្ទាប់ពីបានឆ្លងកាត់ផែនការរឹតត្បិតអស់រយៈពេលបួនឆ្នាំជាប់គ្នា នៅថ្ងៃអាទិត្យនេះ ព័រទុយហ្កាល់រៀបចំបោះឆ្នោតជ្រើសរើសសភាថ្មី។ ដោយគ្មានស្រពិចស្រពិល និងថ្វីដ្បិតតែមានការប្រកួតប្រជែងគ្នាខ្លាំង តែគណបក្សកាន់អំណាច ជារដ្ឋាភិបាលចម្រុះស្តាំនិយម នៅតែនាំមុខ លើគណបក្សប្រឆាំងសង្គមនិយម។ នេះបើតាមការស្ទង់មតិចុងក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ម្ចាស់ឆ្នោតព័រទុយហ្កាល់ទំនងជាត្រៀមខ្លួនផ្តល់ទំនុកចិត្តឱ្យរដ្ឋាភិបាលចម្រុះស្តាំកណ្តាលនិយម បន្តដឹកនាំប្រទេសមួយអាណត្តិទៀត ជាមួយនឹងចេតនាផ្តល់ការគាំទ្រ៣៧%សម្រាប់គណបក្សកាន់អំណាច និង៣៣%ដល់គណបក្សប្រឆាំងសង្គមនិយម។ ព្រោះពលរដ្ឋព័រទុយហ្កាល់ហាក់បានយល់ កាន់តែច្បាស់ អំពីភាពចាំបាច់នៃនយោបាយរឹតត្បិតថវិកា។
រដ្ឋាភិបាលចម្រុះព័រទុយហ្កាល់របស់លោកនាយករដ្ឋមន្ត្រី Pendro Passo Coelho បានឡើងកាន់អំណាចនៅឆ្នាំ២០១១ ក្នុងពេលប្រទេសស្ថិតក្នុងស្ថានភាពហៀបក្ស័យធន។ ដាក់ក្រោមអាណាព្យាបាលរបស់សហភាពអឺរ៉ុប មូលនិធិរូបិយវត្ថុអន្តរជាតិ និងធនាគារកណ្តាលអឺរ៉ុប និងការរឹតត្បិតថវិកាយ៉ាងណែនមិនធ្លាប់មានរយៈពេលបួនឆ្នាំ ៖ ដំឡើងពន្ធដារ បញ្ចុះប្រាក់ខែមក ប្រទេសបានស្គាល់កំណើនសេដ្ឋកិច្ចឡើងវិញ អត្រាអ្នកអត់ការងារបានថយចុះ ! ពលរដ្ឋព័រទុយហ្កាល់ពិតជាមិនចង់ឃើញគណបក្សសង្គមនិយម វិលមកកាន់អំណាច និងវិលមកចំណាយថវិការដ្ឋខ្ជះខ្ជាយ នាំប្រទេសឱ្យត្រលប់រកស្ថានការណ៍ដូចកាលពីបួនឆ្នាំមុនឡើយ។
នេះជាអំណះអំណាងដ៏ប្រពៃមួយរបស់បក្សកាន់អំណាច ក្នុងការយកឈ្នះគណបក្សសង្គមនិយម។ លើសពីនេះទៀត វិបត្តិក្រិក ត្រូវបានពលរដ្ឋព័រទុយហ្កាល់តាមដានយ៉ាងយកចិត្តទុកដាក់បំផុត និងប្រៀបប្រដូចគណបក្សសង្គមនិយមព័រទុយហ្កាល់ទៅនឹងគណបក្សស៊ីរីហ្សារបស់ក្រិក ជាហេតុធ្វើឱ្យគណបក្សស្តាំនិយមអាចទាញយកចំណេញបាន។
ប៉ុន្តែប្រមុខគណបក្សសង្គមនិយម ជាបុគ្គលមានសមត្ថភាពខ្ពស់ខាងចរចា ដូច្នេះថ្វីបើមានមនោគមវិជ្ជានយោបាយខ្វែងគ្នាបន្តិចមែន តែគេអាចចាប់ដៃជាមួយក្រុមឆ្វេងនិយមផ្សេងទៀត ដើម្បីបង្កើនសំឡេង។ យោងទៅតាមលទ្ធផលឆ្នោត ព័រទុយហ្កាល់អាចនឹងមានរដ្ឋាភិបាលចម្រុះសង្គមនិយមជាមួយអ្នកឆ្វេងជ្រុលផងក៏ថាបាន។ សម្រាប់ពេលនេះអ្នកដែលឈ្នះខ្លាំង គឺអាចជាអ្នកអវត្តមានមិនទៅបោះឆ្នោត (៤១,៩% នៅឆ្នាំ២០១១)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ