ក្រិកផ្តល់សំណើថ្មី ធ្វើសម្បទានខ្លាំងដល់ម្ចាស់បំណុល
ជាសំណើហ្មត់ចត់ គួរឱ្យជឿទុកចិត្ត និងសុទិដ្ឋនិយម ! នេះជាប្រតិកម្មជាបន្តបន្ទាប់របស់ថ្នាក់ដឹកនាំបារាំង ក្រោយពីបានទទួលគម្រោងធ្វើកំណែទម្រង់ ដែលរដ្ឋាភិបាលក្រិកបញ្ជូនមកឱ្យម្ចាស់បំណុល សហភាពអឺរ៉ុប ធនាគារកណ្តាលអឺរ៉ុប និងអង្គការមូលនិធិរូបិយវត្ថុ បានទាន់ពេលវេលា ដើម្បីអាចចរចាស្វែងរកកិច្ចព្រមព្រៀងបិទបញ្ចប់វិបត្តិ។ គួរឱ្យភ្ញាក់ផ្អើល រដ្ឋាភិបាលក្រិកសុខចិត្តធ្វើសម្បទានខ្លាំង ដំឡើងពន្ធ ធ្វើកំណែទម្រង់ប្រព័ន្ធចូលនិវត្តន៍ មិនខុសអ្វីពីសំណើរបស់ម្ចាស់បំណុល ដែលពលរដ្ឋក្រិកច្រានចោលក្នុងប្រជាមតិទេ។ សភាក្រិក ត្រូវបញ្ចេញមតិយោបល់លើសំណើថ្មីនេះ ចាប់ពីថ្ងៃពីសុក្រទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ជាមួយឯកសារកម្រាស១៣ទំព័រ មានចំណងជើងថា “សកម្មភាពជាអាទិភាពនិងកិច្ចសន្យា" បញ្ជូនទៅដល់ដៃម្ចាស់បំណុល ទាន់ពេលវេលា ក្រិកធ្វើគ្រប់យ៉ាងដើម្បីបំពេញចិត្តអឺរ៉ុប ដើម្បីអាចទទួលបានវិញនូវប្រាក់កម្ចី ៥៣,៥ពាន់លានអឺរ៉ូ សម្រាប់រយៈពេលបីឆ្នាំ២០១៨ និងការសងបណ្តាក់វែង។ ក្រិកបានសន្យាធ្វើកំណែទម្រង់ជាប្រព័ន្ធ។
ដំឡើងពន្ធ ៖ ក្រិកគ្រោងនឹងដំឡើងពន្ធលើតម្លៃបន្ថែម ដែលពីមុនមកជាចំណុចខ្ទាស់គ្នាខ្លាំងជាមួយម្ចាស់បំណុលពី ឱ្យឡើងដល់ ២៣% រាប់ទាំងវិស័យភោជនីដ្ឋាន លើកលែងតែផលិតផលមូលដ្ឋានដូចជាអគ្គិសនី សណ្ឋាគារ ត្រូវរក្សាទុកត្រឹម១៣%ដដែល។ ឯផលិតផលថ្នាំ សៀវភៅ សំបុត្រល្ខោន ៦%។ ពន្ធលើសហគាស ក្រុមហ៊ុននឹងឡើងពី២៦% ទៅ ២៨%។ លុបចោលការអនុគ្រោះពន្ធនៅតាមតំបន់កោះ។
ប្រាក់និវត្តន៍ ៖ ដំឡើងអាយុចូលនិវត្តន៍ដល់៦៧ឆ្នាំ ឬ ៦២ឆ្នាំចំពោះអ្នកដែលបានធ្វើការគ្រប់៤០ឆ្នាំ ដោយឡើងបន្តិចម្តងចាប់ពីពេលនេះដល់ឆ្នាំ២០២២។
ចំណាយយោធា ៖ កាត់បន្ថយចំណាយយោធា ១០០លានអឺរ៉ូនៅឆ្នាំ២០១៥ និង២០០លាននៅឆ្នាំ២០១៦។ ម្ចាស់បំណុលទាមទារកាត់បន្ថយដល់ទៅ៤០០លានអឺរ៉ូ។
បើកទូលាយទីផ្សារ ៖ រដ្ឋាភិបាលក្រិកបានព្រមព្រៀងលក់ភាគហ៊ុនរដ្ឋដែលនៅសេសសល់ក្នុងផ្នែកទូរគមនាគមន៍ឱ្យទៅឯកជនគ្រប់គ្រង។ កំពង់ផែ Pirée និងក្រុង Thessalonique ក៏នឹងត្រូវដាក់ឱ្យឯកជនដេញថ្លៃដែរ។ វិស័យសាធារណៈក៏នឹងត្រូវធ្វើទំនើបកម្មដោយចាត់វិធានការមួយចំនួនធំ។
នៅក្នុងគម្រោងកំណែទម្រង់ថ្មីនេះ ក្រិកចង់ដាក់ឱ្យមានវិធានជាបទដ្ឋានបំណុលសាធារណៈ ១៨០%នៃផលិតផលសរុបក្នុងស្រុក។ សុំកម្ចី៥៣ពាន់លានកន្លះដើម្បីសងបំណុលគេ និង៣៥ពាន់លានសម្រាប់ផ្តល់សន្ទុះដល់កំណើនសេដ្ឋកិច្ច។ “ការកាត់បន្ថយបំណុល” ត្រូវបានក្រិកនិយាយតិចតួចបំផុត។ តែជាទូទៅ ដើម្បីបើកកិច្ចចរចាជាមួយម្ចាស់បំណុលឡើងវិញ រដ្ឋាភិបាលក្រិកបានធ្វើសម្បទានច្រើន ច្រើនហួសពីការគិត ហួសឆ្ងាយពីគម្រោងចាស់ដែលប្រជាពលរដ្ឋក្រិកបានច្រានចោល ក្នុងសម័យបោះឆ្នោតប្រជាមតិទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ