អៀរឡង់ប្រទេសកាតូលិកបំផុត នឹងព្រមឱ្យមានអាពាហ៍ពិពាហ៍ភេទដូចគ្នា ?
អាចចាត់ទុកជាប្រទេស ដំបូងគេបំផុតក្នុងប្រវត្តិសាស្ត្រពិភពលោក ដែលអនុញ្ញាតឱ្យមាន អាពាហ៍ពិពាហ៍អ្នកស្រលាញ់ភេទដូចគ្នា ស្របច្បាប់តាមរយៈប្រជាមតិ ក្នុងខណៈដែលមានប្រទេសជាង២០ ទទួលស្គាល់ច្បាប់អាពាហ៍ពិពាហ៍ភេទដូចគ្នា ត្រឹមសភា។ នៅថ្ងៃសុក្រនេះ បណ្តាពលរដ្ឋអៀរឡង់ ត្រូវបញ្ចេញមតិ ថ្នាក់ជាតិ តាមរយៈសន្លឹកឆ្នោត ថា ព្រមឬប្រឆាំង។ ជាប្រទេសដែលប្រកាន់ប្រពៃណីកាតូលិកយ៉ាងខ្ជាប់ខ្ជួន សាសនាមានឥទ្ធិពលខ្លាំងក្នុងសង្គម ប៉ុន្តែបើជឿតាមការស្ទង់មតិ អ្នកគាំទ្រឱ្យមានច្បាប់រៀបអាពាហ៍ពិពាហ៍អ្នកស្រលាញ់ភេទដូចគ្នា នឹងត្រូវនាំមុខដល់ទៅ៦០%។
ចុះផ្សាយនៅថ្ងៃ៖ កែប្រែថ្ងៃទី៖
នៅប្រទេសអៀរឡង់ បើតាមច្បាប់រដ្ឋធម្មនុញ្ញ នៅពេលមានការកែប្រែច្បាប់ ត្រូវឆ្លងកាត់សភា ហើយបន្ទាប់មកត្រូវសុំការអនុម័តពីប្រជាពលរដ្ឋ ដោយផ្ទាល់ តាមរយៈប្រជាមតិ។ ប៉ុន្តែប្រជាមតិនៅថ្ងៃនេះ ត្រូវបានគេមើលឃើញថាជារបត់ថ្មីរបស់អៀរឡង់ ព្រោះថា អៀរឡង់ជាប្រទេសមានជំនឿស៊ុប និងមានប្រពៃណីចាក់ឬសចាក់គល់ ជាអ្នកកាតូលិក។ ឥលូវស្រាប់តែ ត្រូវនិយាយអំពី ការពង្រីកអត្ថន័យនៃពាក្យថាអាពាហ៍ពិពាហ៍ ការបង្កើតច្បាប់ឱ្យមនុស្សស្រលាញ់ភេទដូចគ្នាអាចរៀបការ និងទទួលការពារពីច្បាប់ដូចគូស្វាមីភរិយាដទៃ។ ប៉ុន្តែច្បាប់នេះកំណត់ត្រឹមអាពាហ៍ពិពាហ៍ប៉ុណ្ណោះ មិនបូកបញ្ចូលនឹងការស្មូមកូនទេ។ បើជឿតាមការស្ទង់មតិ ច្បាប់នេះនឹងត្រូវអនុម័តទទួលយកទៀត ព្រោះមានសំឡេងគាំទ្រដល់ទៅ ៦០% ប្រឆាំង២០% និងមិនទាន់សម្រេចចិត្ត២០%។
ស្រលាញ់ភេទដូចគ្នា ៖ ពីការដាក់ទោស ទៅការទទួលស្គាល់ដោយច្បាប់
ការស្រលាញ់ភេទដូចគ្នា ជាប្រធានបទដែលមិនអាចប៉ះពាល់បានសោះ នៅអៀរឡង់ កាលពីប៉ុន្មានឆ្នាំមុន។ នៅក្នុងទសវត្សរ៍ឆ្នាំ៦០ និង៧០ ពាក្យថាស្រលាញ់ភេទដូចគ្នាត្រូវបានហាមឃាត់ដោយវិហារកាតូលិក និងបង្ហាត់បង្រៀននៅសាលាថាទង្វើស្រលាញ់ភេទដូចគ្នាគឺជាអពើលីលា។ រហូតដល់ឆ្នាំ១៩៧៣ ច្បាប់អៀរឡង់ហាមឃាត់ស្រ្តីមានប្តីមិនឱ្យធ្វើជាអ្នករដ្ឋការ។ មកទល់នឹងថ្ងៃនេះទៅហើយ ស្ត្រីគ្មានសិទ្ធិរម្លូតកូនទេ លើកលែងតែជីវិតម្តាយត្រូវរងការគំរាមគំហែងដល់ស្លាប់។
ស្រលាញ់ភេទដូចគ្នា ជាទង្វើឧក្រិដ្ឋ និងទើបលែងមានទោស នៅឆ្នាំ១៩៩៣ ពោលគឺ២៣ក្រោយប្រទេសបារាំង និង២៦ឆ្នាំក្រោយប្រទេសអង់គ្លេស។ តាំងពីឆ្នាំ២០១០មក អ្នកស្រលាញ់ភេទដូចគ្នាអាចរួមរស់ជាមួយគ្នាដោយស្របច្បាប់ ក្នុងនាមជាជីវិតគូស្រករ គ្រាន់តែគ្មានសិទ្ធិ គ្មានជំនួយគ្រួសារ គ្រប់គ្រងកូន ដូចជីវិតគ្រួសារប្តីប្រពន្ធ។ ប៉ុន្តែ ថ្ងៃនេះអៀរឡង់នាំគ្នាធ្វើការតស៊ូមតិ យ៉ាងស្មោះត្រង់ និងរលូន ស្តីអំពីការទទួលស្គាល់ តាមផ្លុវច្បាប់ និងអនុញ្ញាតឱ្យមានអាពាហ៍ពិពាហ៍រវាងអ្នកស្រលាញ់ភេទដូចគ្នា ឱ្យក្លាយជាប្តីប្រពន្ធដូចគូធម្មតា។ ខុសឆ្ងាយស្រឡះអំពីទិដ្ឋភាពនៅទីក្រុងប៉ារីស និងនៅប្រទេសបារាំង កាលពីឆ្នាំ២០១៣ ក្នុងពេលដែលបារាំងអនុម័តច្បាប់អាពាហ៍ពិពាហ៍អ្នកស្រលាញ់ភេទដូចគ្នា។
អ្នកនយោបាយអៀរឡង់គាំទ្រអាពាហ៍ពិពាហ៍ភេទដូចគ្នា
អ្នកប្រឆាំង គឺក្រុមអ្នកសាសនា គ្រិស្ត កាតូលិក អេវ៉ង់ហ្សេឡិក ប្រូតេស្តង់ ... ឬជាសមាគមន៍ស៊ីវិល ដែលជាអ្នកអភិរក្សនិយម ចង់រក្សាតម្លៃគ្រួសារ ម្តាយជាស្រី ឪពុកជាបុរស។ សម្រាប់ក្រុមតំណាងសាសនា គេត្រូវតែការពារជំហរបោះឆ្នោតប្រឆាំង ព្រោះដឹងថាការស្រលាញ់ភេទដូចគ្នាជាទង្វើផ្ទុយនឹងធម៌ព្រះ។ ក្រុមនេះកំពុងធ្វើការឃោសនាមិនបន្ធូរដៃដែរ បើទោះបីជាដឹងថា មានសំឡេងប្រជាជនផ្អៀងទៅរកនិន្នាការគាំទ្រឱ្យមានច្បាប់អាពាហ៍ពិពាហ៍អ្នកស្រលាញ់ភេទដូចគ្នាក៏ដោយ !
ប៉ុន្តែក៏មានមិនខ្វះដែរក្រុមអ្នកសាសនាដែលផ្តាច់ខ្លួនទៅគាំទ្រច្បាប់នេះ ជាមួយអ្នកស្រលាញ់ភេទដូចគ្នា ក្រុមសហជីព ក្រុមអង្គការមនុស្សធម៌ និស្សិត និងជាពិសេសក្រុមអ្នកនយោបាយ។គណបក្សនយោបាយរបស់អៀរឡង់ទាំងអស់ ដែលមានអាសនៈនៅក្នុងសភា មិនថាជាក្រុមអ្នកឆ្វេង ឬស្តាំនិយមទេ បានបង្ហាញលក្ខណៈរបស់ខ្លួន គាំទ្រទាំងអស់គ្នាអាពាហ៍ពិពាហ៍ភេទដូចគ្នា។ រដ្ឋាភិបាលចម្រុះដែលជាអ្នកអភិរក្សខ្លាំងផ្នែកសង្គម និងបក្សពលករ ឡើងដឹកនាំប្រទេសតាំងពីឆ្នាំ២០១១មក ចង់ធ្វើវិសោធនកម្មច្បាប់អាពាហ៍ពិពាហ៍អ្នកស្រលាញ់ភេទដូចគ្នាតាំងដំបូងភ្លាមម៉្លេះ។ នាយករដ្ឋមន្ត្រីបច្ចុប្បន្ន បានថែមទាំងថតរូបយ៉ាងសង្ហារក្នុងរង្គសាលរបស់ក្រុមអ្នកស្រលាញ់ភេទដូចគ្នាទៀតផង។
វិហារកាតូលិកបាត់បង់អំណាច
វិហារកាតូលិក ដែលមានឥទ្ធិពលខ្លាំងនៅអៀរឡង់ ព្រោះសាសនាចក្របានដើរតួនាទីយ៉ាងសំខាន់ក្នុងការទាមទារឯករាជ្យជាតិ មានអំណាចគួរឱ្យរអា។ អ្វីដែលចេញពីវិហារកាតូលិក ច្រើនតែត្រូវបានចាត់ទុកជាបញ្ជា មិនអាចប្រកែកឬប្រឆាំងបានទេ។
ប៉ុន្តែ ការទម្លាយរឿងអាស្រូវ ទាក់ទងនឹងសកម្មភាពរបស់សង្ឃកាតូលិក កាលពីឆ្នាំ១៩៩០ និងអំពើរំលោភបំពានផ្លូវភេទលើក្មេងមិនទាន់ពេញវ័យ ជាទ្រង់ទ្រាយធំនៅក្នុងវង្វង់អ្នកសាសនា ដោយមានមេកើយជួយការពារ បានធ្វើឱ្យវិហារកាតូលិកបាត់បង់ឥទ្ធិពលរបស់ខ្លួនបន្តិចម្តងៗ។ ថ្វីដ្បិតតែពេលនេះ មានពលរដ្ឋអៀរឡង់ ជាង ៨៤% តាំងខ្លួនជាអ្នកកាតូលិក ប៉ុន្តែភាគច្រើនទៅវិហារសូត្រធម៌ តែពេលបុណ្យធំៗដូចជាបង្កក់កូន រៀបការ ឬស្លាប់ប៉ុណ្ណោះ។
នៅក្នុងរដ្ឋធានី និងក្រុងធំៗ គេឃើញអំពីទិដ្ឋភាពអៀរឡង់អត់ឱន និងបើកចំហ ប៉ុន្តែបើមើលឱ្យស៊ីជម្រៅ អៀរឡង់មិនរីករាយស៊ីវីល័យប៉ុន្មានទេ។ ថ្វីបើ អ្នកស្រលាញ់ភេទដូចគ្នាអាចមានសិទ្ធិពេញលេញ អាចរៀបការនឹងគ្នាបាន អៀរឡង់មិនមែនជាប្រទេសក្រីក្រ និងឯការដូចមុនមែន ប៉ុន្តែអៀរឡង់នៅតែរក្សាលក្ខណៈពិសេសរបស់ខ្លួនជានិច្ច គឺស្ត្រីអៀរឡង់ត្រូវធ្វើដំណើរទៅប្រទេសជិតខាងដូចយ៉ាងអង់គ្លេសដើម្បីរម្លូតកូន ព្រោះច្បាប់ក្នុងប្រទេសមិនអនុញ្ញាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ