បើលុយអឺរ៉ូធ្លាក់ថ្លៃស្មើដុល្លារអាមេរិក តើជាដំណឹងអាក្រក់ឬ ?
ចុះផ្សាយនៅថ្ងៃ៖
ស្តាប់ - ០៤:០៩
ពីរសប្តាហ៍ក្រោយផែនការ ៦០ពាន់លាន របស់ធនាគារកណ្តាលអឺរ៉ុបទិញបំណុលជារៀងរាល់ខែ រហូតដល់ដំណាច់ឆ្នាំ២០១៦មក ប្រាក់អឺរ៉ូបានបន្តធ្លាក់ថ្លៃយ៉ាងលឿន បើប្រៀបទៅនឹងប្រាក់ដុល្លារ ដែលកាន់តែទាក់ទាញខ្លាំងសម្រាប់អ្នកវិនិយោគ។ នៅថ្ងៃសុក្រទី ១៣មីនា ប្រាក់អឺរ៉ូបានធ្លាក់ថ្លៃទាបបំផុតជាលើកទីមួយគិតចាប់ពីឆ្នាំ២០០៣មក ដោយ១អឺរ៉ូដូរបានតែ១,០៥ដុល្លារអាមេរិក។ តម្លៃដ៏ទាបដែលសឹងតែធ្វើឱ្យគ្រប់គ្នាអត់គិតមិនបាន ថានៅថ្ងៃខាងមុខ ប្រាក់អឺរ៉ូ និងដុល្លារមានតម្លៃស្មើគ្នា។ ប្រសិនបើដូច្នេះមែន តើជាដំណឹងអាក្រក់ ឬដំណឹងល្អ សម្រាប់អឺរ៉ុប ?!
ជាលើកដំបូងគិតចាប់ពីឆ្នាំ២០០៣មក ដែលប្រាក់អឺរ៉ូបានស្គាល់ការធ្លាក់ថ្លៃ ដល់កំរិតទាបបែបនេះ (មួយអឺរ៉ូដូរបានមិនដល់១,០៥ដុល្លារសហរដ្ឋអាមេរិកផង នៅថ្ងៃសុក្រទី ១៣មីនា២០១៥)។ ក្នុងរយៈពេលតែបីខែដំបូងនៃឆ្នាំ២០១៥នេះសោះ ប្រាក់អឺរ៉ូ បានបាត់បង់តម្លៃអស់១៣%។ មិនតែប៉ុណ្ណោះ រូបិយបណ្ណអឺរ៉ុប ក៏បានធ្លាក់ចុះដែរនៅចំពោះមុខប្រាក់យេនជប៉ុន និងលុយហ្វ្រង់ស៊្វីស។ ដំណើរធ្លាក់ចុះយ៉ាងលឿននេះបានធ្វើឱ្យគ្រប់គ្នាគិតថា ប្រាក់អឺរ៉ូអាចនឹងមានតម្លៃស្មើលុយដុល្លារអាមេរិក នៅថ្ងៃណាមួយ។
បាតុភូតអឺរ៉ូស្មើដុល្លារមិនអាចច្រានចោលបានទេ ព្រោះការគិតទុកបញ្ចុះជាមុននេះនឹងធ្វើឱ្យការពិតកើតឡើង ៖ អឺរ៉ូត្រូវបន្តធ្លាក់ថ្លៃទៀត រួចបន្ទាប់មកទើបអឺរ៉ូនឹងរើបឡើងវិញទៅរកតម្លៃដើម គឺមួយអឺរ៉ូដូរបាន១,២០ដុល្លារអាមេរិក។ ធនាគារធំៗ បានភ្នាល់រួចជាស្រេចទៅហើយថា អឺរ៉ូនឹងធ្លាក់ថ្លៃមកស្មើដុល្លារនៅប៉ុន្មានខែខាងមុខនេះ។ ធនាគារអាល្លឺម៉ង់ហ៊ានទាយថានៅដាច់ឆ្នាំ២០១៥នេះគេនឹងបានឃើញមួយអឺរ៉ូដូរបានមួយដុល្លារហើយ។ ចំណែកធនាគារស្វ៊ីស បានព្យាករថាអឺរ៉ូនឹងធ្លាក់ក្រោមដុល្លារ នៅ១២ខែទៀត (1 €=0.98$) រួចនឹងបន្តធ្លាក់ទៀត មកត្រឹម មួយអឺរ៉ូដូរបានតែពី 0.80$-0.95$ ដុល្លារ នៅឆ្នាំ២០១៦។
ឥទ្ធិពលនៃប្រាក់អឺរ៉ូថោកចំពោះអឺរ៉ុប
អឺរ៉ូថ្លៃ ជាប្រការល្អ សម្រាប់ពលរដ្ឋដែលចង់ដំណើរទេចរណ៍ ទៅប្រទេសផ្សេង ប៉ុន្តែសម្រាប់សេដ្ឋកិច្ចប្រទេសគឺមិនប្រសើរសោះឡើយ ព្រោះវាអាចធ្វើឱ្យបាត់បង់ភាពប្រកួតប្រជែង ជាមួយដៃគូ។ ជាក់ស្តែងក្នុងករណីប្រទេសស៊្វីស ដែលល្បីខាងមានសុខភាពសេដ្ឋកិច្ចល្អ ក៏មិនអាចគេចផុតពីបាតុភូតរូបិយបណ្ណឡើងថ្លៃខ្លាំងពេក នាំឱ្យភាពប្រកួតប្រជែងធ្លាក់ចុះនេះដែរ។ រដ្ឋាភិបាលស្វ៊ីសបានទប់រហូតមកឱ្យប្រាក់លុយហ្វ្រង់ស៊ីសស្ថិតនៅក្នុងកំរិត ១,២០ហ្វ្រង់ = ១ អឺរូ តែកាលពីពាក់កណ្តាលខែមករា ធនាគារជាតិស្វ៊ីសបានប្រកាសដំណឹងគួរឱ្យភ្ញាក់ផ្អើលលែងទប់ ជាហេតុធ្វើឱ្យរូបិយបណ្ណមួយនេះស្ទុះឡើងថ្លៃដល់ទៅ២០% (១អឺរ៉ូ=១,០៥ហ្វ្រង់)។ ជាលទ្ធផល ស្វ៊ីសបាត់បង់ការប្រកួតប្រជែងខ្លាំង ក្រុមហ៊ុនត្រូវរិះរកគ្រប់មធ្យោបាយ ដើម្បីទប់ទល់។ ក្រុមហ៊ុនខ្លះបានសុខចិត្តបង្កើនម៉ោងធ្វើការដល់ទៅ ៤៥ម៉ោង ក្នុងមួយសប្តាហ៍ ដោយផ្តល់ប្រាក់ខែ៤០ម៉ោង។
ដូច្នេះបើវិលមកនិយាយអំពីប្រាក់អឺរ៉ូវិញ អឺរ៉ូទាបមិនមែនជាដំណឹងអាក្រក់ទាំងស្រុងទេ។ ជាទូទៅ សម្រាប់តំបន់ចាយប្រាក់អឺរ៉ូ លុយចុះថ្លៃជាភាពចាំបាច់ ព្រោះការធ្លាក់ថ្លៃនេះនឹងធ្វើឱ្យលេចឡើងនូវអតិផរណា និងសម្រួលដល់ពាណិជ្ជកម្មក្នុងស្រុក (អឺរ៉ុប)។ ជាពិសេសនៅក្នុងបរិបទដែលអឺរ៉ុបមានតម្រូវការក្នុងស្រុកទាបខ្លាំងយ៉ាងដូច្នេះ។
ការសិក្សាមួយ ចេញផ្សាយកាលពីខែមករា២០១៤ បានបង្ហាញថា ប្រសិនបើប្រាក់អឺរ៉ូធ្លាក់ថ្លៃ មានអត្រាប្តូរធ្លាក់ចុះត្រឹម១០% នោះនឹងការកំណើននាំចេញប្រមាណជា៧,៥% ជាមធ្យម។ ដូច្នេះហើយបានជាគេឃើញ ប្រធានាធិបតីបារាំង សម្តែងការរីករាយនៅសប្តាហ៍នេះ ចំពោះឥទ្ធិពលជាវិជ្ជមាន សម្រួលដល់សកម្មភាពសេដ្ឋកិច្ច នៃការចុះថ្លៃរបស់ប្រាក់អឺរ៉ូ ស្ទើរស្មើប្រាក់អាមេរិក។ លោកហ្វ្រង់ស័រហូឡង់ បានធ្វើសេចក្តីថ្លែងការណ៍ប្រកាសអំពីមោទនភាពនេះថា ៖ “នៅពេលមានអត្រាការប្រាក់ទាប លុយអឺរ៉ូជិតស្មើលុយដុល្លារអាមេរិក ជំរុញឱ្យក្រុមហ៊ុនកាន់តែមានសមត្ថភាពធ្វើវិនិយោគ នោះកំណើនសេដ្ឋកិច្ចនឹងកើតមានជាក់ពុំខាន”។ អាល្លឺម៉ង់ដែលជាប់ចិត្តនឹងប្រាក់អឺរ៉ូថ្លៃខ្ពស់ ក៏ជាអ្នកទទួលផលប្រយោជន៍ច្រើនដែរ ជាពិសេសលើវិស័យនាំចេញ ដែលអាល្លឺម៉ង់មានឯកទេសខ្លាំង។
ក្រុមហ៊ុននាំចេញក្នុងវិស័យឧស្សាហកម្ម (រថយន្ត អេឡិចត្រូនិក សម្ភារៈដឹកជញ្ជូន និងកសិកម្ម ជាអ្នកទាញប្រយោជន៍ធំពីប្រាក់អឺរ៉ូទាបស្ទើរស្មើដុល្លារ។ ប៉ុន្តែវិស័យចូល អាចនឹងត្រូវក្រញាញ់មុខបន្តិច។ ចំពោះជីវិតប្រចាំថ្ងៃវិញ ផលិតផលនាំចូលអាចនឹងឡើងថ្លៃជាងមុន ពលរដ្ឋអាចនឹងមានទស្សនវិស័យថ្មី ងាកមកសំលឹងមើលផលិតផល។ តែកញ្ចប់ថវិការងផលប៉ះពាល់តិច ដោយហេតុតែទន្ទឹមគ្នានេះ តម្លៃប្រេងពិភពលោកក៏ចុះថ្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ