ស្តេចហ្សកដានី ភ្ជាប់សន្តិភាពនៅដើមបូព៌ា ទៅនឹងការប្រយុទ្ធប្រឆាំងភេរវនិយម
សហគមន៍អន្តរជាតិត្រូវតែប្រមូលផ្តុំគ្នាស្វែងរកសន្តិភាពឱ្យតំបន់ដើមបូព៌ា និងសិទ្ធិសេរីភាពរបស់ប៉ាឡេស្ទីន ប្រសិនបើពិភពលោកចង់ប្រយុទ្ធយកឈ្នះបានលើពួកភេរវនិយម។ នេះជាសេចក្តីថ្លែងការណ៍របស់ព្រះចៅអាប់ដាឡា នៃប្រទេសហ្សកដានី នៅចំពោះមុខសភាអឺរ៉ុប នាទីក្រុងស្ត្រាស្បួរ Strasbourg ប្រទេសបារាំង។
ចុះផ្សាយនៅថ្ងៃ៖ កែប្រែថ្ងៃទី៖
គ្មានដំណោះស្រាយនយោបាយ ឱ្យជម្លោះចំណាស់ជាង៦០ឆ្នាំ មានន័យថាធ្វើឱ្យទំនុកចិត្តលើច្បាប់អន្តរជាតិ ធ្លាក់ចុះ ហើយបើតាមព្រះចៅអាប់ដាឡា ការបាត់បង់ជំនឿនេះអាចជាឈ្នាន់សម្រាប់ពួកជីហាតសម្រាប់យកទៅបំពើងនយោបាយរបស់ពួកគេ។ នៅចំពោះមុខសភាអឺរ៉ុប នារសៀលថ្ងៃងអង្គារទី ១០មីនានេះ ព្រះចៅហ្សកដានី បានពន្យល់ថា ពួកអ៊ីស្លាមជ្រុលនិយម នឹងយកចំណេញពីភាពអយុត្តិធម៌ និងជម្លោះរ៉ាំរ៉ៃ មកធ្វើជាគ្រឹះសម្រាប់ស្ថាបនាភាពស្របច្បាប់របស់ពួកគេ និងសម្រាប់ជ្រើសរើសកម្លាំងប្រយុទ្ធថ្មី ជាយុទ្ធជនបរទេសមកពី អឺរ៉ុបឬមកពីជុំវិញពិភពលោក។
តើគេអាចឈ្នះសង្គ្រាមមនោគមន៍វិជ្ជាបានយ៉ាងដូចម្តេចបើយើងមិនត្រួសត្រាយផ្លូវសន្តិភាពឱ្យអ៊ីស្រាអែលនិងប៉ាឡេស្ទីននោះ ?! សម្រាប់ព្រះចៅអាប់ដាឡា ដែលយាងមកបំពេញទស្សនកិច្ចនៅអឺរ៉ុបជាលើកទីបួន ព្រះអង្គមិនភ្លេចទេ ភេរវកម្មជីហាតនៅទីក្រុងប៉ារីស និងឃាតកម្មដ៏សែនឃោរឃៅដែលពួកជីហាតរដ្ឋអ៊ីស្លាមបានដុតសម្លាប់អ្នកបើកបរយន្តហោះហ្សកដានីទាំងរស់។ ហ្សកដានី និងរដ្ឋអារ៉ាបផ្សេងទៀត ព្រមទាំងអ្នកកាន់សាសនាអ៊ីស្លាមទាំងអស់ ប្តេជ្ញាការពារ ពលរដ្ឋទេ និងជំនឿសាសនារបស់ខ្លួន ក្នុងន័យនេះ គេត្រូវធ្វើសង្គ្រាមប្រយុទ្ធប្រឆាំងនឹងសភាវៈអាក្រក់នៅក្នុងផ្ទៃអ៊ីស្លាម។
តែព្រះចៅអាប់ដាឡា ក៏បានពញ្ជាក់ស្មារតីជាទូទៅ ថា ការវិវត្តន៍នៃចលនាអ៊ីស្លាមប្រដាប់អាវុធនៅអាស៊ី នៅអាហ្វ្រិក ពេលនេះប្រៀបដូចជាការស្ទុះឡើងនៃចលនាហ្វាស៊ីស និងអ៊ីត្លែរ នៅអឺរ៉ុបក្នុងទសវត្សរ៍ឆ្នាំ៣០ ដែលនៅទីបំផុតទៅ សង្គ្រាមនៅអឺរ៉ុបបានក្លាយជាសង្គ្រាមលោក។ ហើយបច្ចុប្បន្ននេះ យើងកំពុងប្រឈមនឹង សង្គ្រាម ដែលមានទម្រង់ប្រហាក់ប្រហែលគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ