គ្រោះថ្នាក់ក្រឡាប់រថភ្លើងសម្លាប់មនុស្ស៧៧នាក់ នៅអេស្ប៉ាញ
ចុះផ្សាយនៅថ្ងៃ៖
ស្តាប់ - ០៥:៤៥
កាលពីយប់ថ្ងៃពុធទី ២៤ កក្កដា គ្រោះថ្នាក់ក្រឡាប់រទេះភ្លើង បានសម្លាប់មនុស្សយ៉ាងហោច ៧៧នាក់ និងរបួស ១៤៣នាក់នៅក្នុងប្រទេសអេស្ប៉ាញ។ រថភ្លើងរត់ក្នុងល្បឿនលឿន បានបើកចេញពីទីក្រុងម៉ាដ្រីឌ ជួបគ្រោះថ្នាក់ នៅបួនគីឡូម៉ែត្រមុនទៅដល់ទីក្រុងSaint-Jacques de Compostelle ដែលជាទីក្រុងគោលដៅ និងស្ថិតនៅភាគពាយ័ព្យអេស្ប៉ាញ។ សោកនាដកម្មបានកើតមាននៅមួយថ្ងៃមុន ការប្រារព្ធពិធីបុណ្យរបស់អ្នកកាន់សាសនាគ្រឹស្តនៅទីក្រុង Saint-Jacques de Compostelle ក្នុងតំបន់Galice។ នាយករដ្ឋមន្រ្តីអេស្ប៉ាញដែលមានដើមកំណើតនៅGaliceបានចូលរួមសំដែងទុក្ខជាមួយប្រជាជនអេស្ប៉ាញ និងត្រូវចុះទៅកន្លែងកើតហេតុ នៅថ្ងៃព្រហស្បតិ៍។
អាជ្ញាធរអេស្ប៉ាញដែលកំពុងញាប់ដៃ ញាប់ជើងជួយសង្រ្គោះអ្នកដំណើរដែលរងរបួស មិនទាន់បានធ្វើសេចក្តីសន្និដ្ឋានជាផ្លូវការនៅឡើយទេអំពីមូលហេតុដែលធ្វើឲ្យរថភ្លើងក្រឡាប់ ដោយគេរង់ចាំ មើលប្រអប់ខ្មៅដែលផ្ទុកព័ត៌មានរទេះភ្លើង។
ប៉ុន្តែ កាសែតក្នុងស្រុកអេស្ប៉ាញចេញផ្សាយនៅថ្ងៃពុធនេះ បានទម្លាក់កំហុសទៅលើការបើកល្បឿនលឿនហួសកំណត់របស់រទេះភ្លើងដែលធ្វើឲ្យរទេះភ្លើង ក្រឡាប់ខ្ទាតចេញពីផ្លូវដែក។ បើតាមកាសែត នៅចំណុចផ្លូវបត់ចូលទីក្រុង រទេះភ្លើង ទាំងអស់(បើទោះបីជារថភ្លើង ល្បឿនលឿន Le TGV) ត្រូវតម្រូវឲ្យបន្ថយល្បឿន និងបើកក្នុងល្បឿនតែ៨០គីឡូម៉ែត្រប៉ុណ្ណោះ ដោយមូលហេតុថា នៅផ្លូវបត់មានលក្ខណៈ តូចចង្អៀត និងស្មុគស្មាញដោយសារតែមានផ្ទះប្រជាជនច្រើន នៅក្បែរនោះ។ ប៉ុន្តែ រថភ្លើង កាលពីថ្ងៃពុធ បានបើកដល់ទៅល្បឿនជាង ១៨០គីឡូម៉ែត្រក្នុងមួយម៉ោង គឺហួសល្បឿនកំណត់ដល់ទីពីរដង។
តាមរូបភាពដែលទូរទស្សន៍ថតបាន ទូរថភ្លើងមួយចំនួនបានខ្ទាតចេញពីផ្លូវដែក និងបុកគរលើគ្នា ចំណែកទូរមួយទៀត បានខ្ទាតប៉ើងឆ្ងាយចេញពីផ្លូវដែក ដែលនេះបង្ហាញពីកម្រិតប៉ះទង្គិចដែលមានលក្ខណៈខ្លាំង។
អ្នកបើករទេះភ្លើងផ្ទាល់ដែលរងរបួសស្រាលត្រង់ខ្នង បានចេញមុខមកសារភាពថា គឺកំហុស”មនុស្ស” ដែលបណ្តាលឲ្យរទេះភ្លើងក្រឡាប់។ តាមអ្នកកាច់ចង្កូតរទេះភ្លើង គាត់បានធ្វេសប្រហែល មិនអាច បន្ថយល្បឿនបានទាន់ពេល។ គាត់មិនអាចបន្ថយល្បឿន ក៏គំហុក ទៅតាមស្ថានភាពផ្លូវដែកដែលផ្លាស់ប្តូរភ្លាមៗ គឺចេញពីផ្លូវដែកសម្រាប់រថភ្លើង រត់ក្នុងល្បឿនលឿន ២០០គីឡូម៉ែត្រ មកចូលផ្លូវដែកសម្រាប់តែរថភ្លើងធម្មតា ដែលអាចរត់ក្នុងល្បឿន តែ៨០គីឡូម៉ែត្រនោះទេ។
គ្រោះថ្នាក់លើកនេះ មិនមែនត្រឹមបង្កដោយមនុស្សទេ ប៉ុន្តែ គឺជាកំហុសបច្ចេកទេសសុទ្ធសាធរបស់ក្រុមហ៊ុនអយស្ម័យានអេស្ប៉ាញ។ អ្នកបើករថភ្លើង បានតវ៉ាថា ផ្លូវដែកសម្រាប់រថភ្លើងធម្មតា ធ្វើឡើងដោយមិនស៊ីគ្នា គឺមិនសមទទួលរទេះភ្លើងរត់ក្នុងល្បឿនលឿនទេ។ អ្នកបើកបររថភ្លើង ក៏ដូចជាអាជ្ញាធរមូលដ្ឋានបានរអ៊ូរទាំពីភាពមិនប្រក្រតីរបស់ផ្លូវរទេះភ្លើងនេះ ចាប់តាំងពីគេដាក់ឲ្យដំណើរការ ឆ្នាំ ២០១១។ កន្លងមក ឲ្យតែពេលមកដល់ចំណុចបត់ ដែលជាកន្លែង កើតហេតុ កាលពីយប់ រទេះភ្លើងល្បឿនលឿនតែងតែផ្អៀងទៅម្ខាង បន្តិច ដែលតែងតែធ្វើឲ្យអ្នកធ្វើដំណើរញ័រ ផើតពោះរាល់តែលើក។
បើតាមអ្នកវិភាគខ្លះ អាជ្ញាធរមិនបានអភិវឌ្ឍន៍ផ្លូវដែក ជាពិសេសនៅចំណុចបត់ចូលទីក្រុង ដោយសារតែដីនៅតំបន់នោះដែលសំបូរប្រជាជនរស់នៅ មានតម្លៃថ្លៃ ខ្លាំង។
អេស្ប៉ាញជាប្រទេសអឺរ៉ុបទីមួយដែលមានផ្លូវដែកវែង ជាងគេ ប្រមាណ ៣៥០០គីឡូម៉ែត្រ។ ជាប់ចំណាត់ថ្នាក់លេខពីរបន្ទាប់ពីប្រទេសចិន។ អេស្ប៉ាញចំណាយលុយច្រើនដើម្បីអភិវឌ្ឍផ្លូវដែករបស់ខ្លួន ដោយក្នុងមួយឆ្នាំ ថវិកាប្រមាណ ១០០លានអឺរ៉ូត្រូវគេចាយដើម្បីរក្សា និងជួសជុលផ្លូវដែក ក្នុងទូទាំងប្រទេស។
ក្រុមហ៊ុនអយស្ម័យានរដ្ឋបាននិយាយប្រាប់ទីភ្នាក់ងារព័ត៌មានReuters ថា បើទោះជារដ្ឋាភិបាលធ្វើនយោបាយរឹតត្បិតថវិកា ប៉ុន្តែ រដ្ឋមិនបានកាត់បន្ថយថវិកាដើម្បីជួសជុល និងរក្សាផ្លូវដែកទេ។ ផ្លូវដែកដែលទើបជួបគ្រោះថ្នាក់ក្រឡាប់រទេះភ្លើង ទៀតសោតទើបត្រូវបានសម្ពោធដាក់ឲ្យប្រើប្រាស់កាលពីឆ្នាំ ២០១១កន្លងទៅ។
អាជ្ញាធរ៖គ្រោះថ្នាក់ក្រឡាប់រថភ្លើងថាបណ្តាលមកពីការវាយប្រហារភេរវកម្ម
អេស្ប៉ាញឧស្សាហ៍រងទទួលការវាយប្រហារពីក្រុមភេរវជនអ៊ីស្លាម ឬក្រុមភេរវជនETAដែលប្រយុទ្ធទាមទារឯករាជ្យភាពឲ្យប្រជាជនBasque នៅអេស្ប៉ាញ។ ប៉ុន្តែ លើកនេះ មន្រ្តីអេស្ប៉ាញមិនបានគិតថា គ្រោះថ្នាក់ក្រឡាប់រទេះភ្លើងលើកនេះ មានជាប់ទាក់ទងនឹងគម្រោងធ្វើវិច្ឆេទកម្ម ឬក៏ជាស្នាដៃរបស់ក្រុមភេរវជនណាមួយទេ។
យ៉ាងណាក៏ដោយ ការដែលគេសង្ស័យថា ការក្រឡាប់រទេះភ្លើង លើកនេះ អាចជាស្នាដៃរបស់ក្រុមភេរវជន ព្រោះចំនួនមនុស្សស្លាប់ក្នុងគ្រោះថ្នាក់រថភ្លើង មានច្រើនពេក។ គឺជាសោកនាដកម្ម សម្លាប់មនុស្សយ៉ាងច្រើន មិនធ្លាប់មាន នៅអេស្ប៉ាញក្នុងរយៈពេល ៤០ឆ្នាំចុងក្រោយនេះ។ សោកនាដកម្មនេះធ្វើឲ្យគេនឹកទៅដល់អំពើភេរវកម្ម បំផ្ទុះគ្រាប់បែក របស់ក្រុមអ៊ីស្លាមជ្រុលនិយម ដែលបានវាយប្រហាររទេះភ្លើង នៅក្នុងទីក្រុងម៉ាដ្រីឌ កាលពីឆ្នាំ ២០០៤ ដែលកាលណោះ បានសម្លាប់មនុស្ស១៩១នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ