អគារខ្ពស់បំផុតក្នុងលោកនឹងមានកំពស់ ១.០៥០ម៉ែត្រ
អគារនេះ នឹងត្រូវចាប់ផ្តើមសង់ឡើងនៅក្នុងរដ្ឋឯករាជ្យ អាស៊ែបៃហ្សង់ជាអតីតសាធារណរដ្ឋសូវៀត ស្ថិតនៅតំបន់នាយភ្នំកូកាស។ អាស៊ែបៃហ្សង់ជាប្រទេសកាន់សាសនាអ៊ីស្លាម សម្បូណ៌លុយបានមកពីការនាំចេញនូវប្រេងកាតឆៅ និងឧស្ម័នធម្មជាតិជីកបូមបានពីបាតសមុទ្រ Caspienne ជាសមុទ្ររួមជាមួយនឹងប្រទេសអ៊ីរ៉ង់នៅជិតខាងផ្ទាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
តាមដែល” គណៈកម្មាធិការរដ្ឋអាស៊ែបៃហ្សង់ខាងនគរូបនីយកម្មនិងស្ថាបត្យកម្ម“ ទើបប្រកាសជាផ្លូវការ ៖ អគារខ្ពស់បំផុតក្នុងលោក ដែលនឹងមានកំពស់ ១.០៥០ម៉ែត្រ ហើយ មានដល់ ១៨៩ ជាន់នឹងត្រូវចាប់ផ្តើមសង់ គឺក្នុងឆ្នាំ២០១៥។ វានឹងសង់ឡើង គឺនៅចម្ងាយ ២៣គ.ម. និរតី ពីទីក្រុង Bakou រដ្ឋធានីអាស៊ែបៃហ្សង់។
ជាការប្រៀបធៀបបច្ចុប្បន្នអគារដែលខ្ពស់បំផុតក្នុងលោក គឺស្ថិតនៅទីក្រុង Dubai រាជធានី ប្រទេសអារ៉ាប់រួម។ អាគារសែនខ្ពស់នេះ មានឈ្មោះថា Burj Khalifa។ វាមានកំពស់ ៨២៨ម៉ែត្រ និងមាន ១៦៣ជាន់។
ចំណែកអគារនៅក្បែរ រដ្ឋធានី អាស៊ែបៃហ្សង់ គឺនឹងលេចចេញមក លើប្រជុំកោះសិប្បនិម្មិតក្នុងសមុទ្រ Caspienne។ ប្រជុំកោះនេះ ដែលនឹងរួមក្តោប កោះចំនួន៤១ មានផ្ទៃក្រឡាសរុប ២.០០០ ហិកតា នឹងក្លាយទៅជាបុរីថ្មី ក្រោមឈ្មោះថា Khazar Islands។ វានឹងទទួលរ៉ាប់រងសង់ដោយក្រុមហ៊ុន Avesta Consern។
ស្ថាបកម្មគ្រាន់តែអគារខ្ពស់បំផុតនោះ នឹងទាមទារឲ្យចំណាយ ២.០០០លានដុល្លារអាមេរិក ហើយបើបូកនឹង បុរី Khazar Islands ទាំងមូលនឹងតម្រូវឲ្យចំណាយដល់ទឹកប្រាក់ ១០០ពាន់ លានដុល្លារ។ បុរី Khazar Islands គឺគ្រោងទុកសម្រាប់បណ្តាជនរស់នៅក្នុងចំនួន១លាននាក់។ ក្នុងទីក្រុងថ្មីនេះ នឹងមានសង់ឡើងជា ៖ អគារលំនៅខ្ពស់ៗចំនួនរាប់សិបកំពស់ពី២៥ដល់៦០ជាន់ សាលារៀនចំនួន ១៥០កន្លែង, មន្ទីរពេទ្យ ៥០កន្លែង, សួនសាធារណៈ, មជ្ឈមណ្ឌលពាណិជ្ជកម្ម, សាកលវិទ្យាល័យ, សណ្ឋាគារ, ទីលានវ៉ៃ Golf។ល។
លើដែនដីបុរីថ្មីនឹងមានសង់ឡើងជាខ្សែផ្លូវពិសេសសម្រាប់ការប្រណាំងរថយន្តល្បឿនលឿនដ៏ល្បីល្បាញលើពិភពលោកក្រោមឈ្មោះថា “ Formula-1 “ ព្រមទាំងនឹងមានសង់ឡើងជាអាកាសយានដ្ឋានតែម្តង។
ស្របនឹងគម្រោងអគារខ្ពស់បំផុតកំពស់១.០៥០ម៉ែត្រ ដែលនឹងចាប់ផ្តើមសង់ក្នុងឆ្នាំ២០១៥នឹងត្រូវសង់រួចក្នុងឆ្នាំ ២០១៨ ចំណែកបុរីថ្មី Khazar Islands ក្នុងឆ្នាំ២០១៦នឹងត្រូវដាក់ឲ្យដំណើរការបាន១០%សិន លុះទាល់តែសង់វាបានរួចរាល់ទាំងស្រុងគឺក្នុងឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ